গোলাঘাটত ৰাজনৈতিক বাতাবৰণে এক ৰোমাঞ্চকৰ পৰিবেশৰ সৃষ্টি কৰিছে।
কংগ্ৰেছ – বিজেপিৰ ৰদ- বদলে একপ্ৰকাৰ ধূসৰ কৰি তুলিছে গোলাঘাটৰ ৰাজনৈতিক পৰিবেশ।
আজি এসময়ৰ কংগ্ৰেছৰ প্ৰাক্তন শক্তিশালী মন্ত্ৰী তথা বিধায়িকা অজন্তা নেওগে বিজেপিৰ হৈ মনোনয়ন পত্ৰ দাখিল কৰে।
পুৱাৰে পৰা নেওগৰ এৰেঙাপাৰাস্থিত বাসগৃহত শ শ সমৰ্থকে ভিৰ কৰা পৰিলক্ষিত হয়।
মন্ত্ৰী পীযুষ হাজৰিকাৰ উপস্থিতিত সমৰ্থকৰ হৰ্ষ উল্লাহৰ মাজেৰে পদব্ৰজে আহি উপায়ুক্ত হাতত মনোনয়ন পত্ৰ অৰ্পন কৰে। ইফালে হাজাৰোৰ্ধ সমৰ্থকৰ উপস্থিতিত নিজৰ শক্তি প্ৰদৰ্শন কৰি পূৰ্বৰ সক্ৰিয় বিজেপি নেতা বিতোপন শইকীয়ায়ো হাতীৰ পিঠিত উঠি কংগ্ৰেছৰ হৈ মনোনয়ন পত্ৰ দাখিল কৰে।সৌসিদিনালৈ অজন্তা নেওগৰ সোঁৱে-বাওঁৱে থকা হাজাৰ হাজাৰ সমৰ্থকে আজি বিতোপন শইকীয়াৰ হৈ হৰ্ষোল্লাস কৰাত স্বাভাৱিকতে শংকিত হৈ পৰিছে ন-বিজেপি অজন্তা নেওগ।
নেতাজনক সংগ দিয়ে সাংসদ গৌৰৱ গগৈ আৰু বিধায়ক ৰকিবুল হুছেইনে।
একেদৰে খুমটাই বিধান সভা সমষ্টিৰ কংগ্ৰেছৰ প্ৰাৰ্থী একালৰ মন্ত্ৰী বিস্মিতা গগৈ আৰু অ জা প ৰ প্ৰাৰ্থী পৱন শইকীয়াও মনোনয়ন পত্ৰ দাখিল কৰে।
উল্লেখ্য যে , মনোনয়ন পত্ৰ প্ৰদান কৰি একেদিনাই বিজেপিয়ে নিৰ্বাচনৰ ৰণডংকা বজালে গোলাঘাটত। ৯৫ নং গোলাঘাট বিধান সভা সমষ্টিৰ বিজেপি প্ৰাৰ্থী অজন্তা নেওগৰ হৈ নিৰ্বাচনী প্ৰচাৰত নামিল মন্ত্ৰী হিমন্ত বিশ্ব শৰ্মা।
পদযাত্ৰা কৰি অজন্তা নেওগৰ হৈ প্ৰচাৰ চলালে মন্ত্ৰী জনে।নেওগে মনোনয়ন পত্ৰ দাখিল কৰা পিছতে গোলাঘাটত বিজেপিৰ প্ৰচাৰ অভিযান তুংগত উঠিল।
হাজাৰ হাজাৰ সমৰ্থকৰ সৈতে কৰা এই পদযাত্ৰা গোলাঘাট সমন্বয় ক্ষেত্ৰৰ পৰা আৰম্ভ হৈ চহৰখনৰ মাজেদি বাহিৰ কৰে।