আজি বহু প্ৰতীক্ষিত লোকসভা নিৰ্বাচন-২০১৯ ৰ ভোটগণনা। ইতিমধ্যে ই ভি এম ৰখা ষ্ট্ৰ ৰূম সমূহ খোলা হৈছে। ৰাতিপুৱা ৮ বজাৰ পৰা আৰম্ভ হ’ব ভোটগণনা প্ৰক্ৰিয়া। ভোট গণনাৰ পূৰ্বে গুৱাহাটী লোকসভা সমষ্টিৰ বিজেপিৰ প্ৰাৰ্থী কুইন ওজাই ফলাফলৰ ক্ষেত্ৰত ভগৱানৰ ওপৰত নিৰ্ভৰশীল বুলি মন্তব্য কৰে।
ভোটগণনাৰ পূৰ্বে সাংবাদিকে কুইন ওজাক কেনেধৰণৰ অনুভৱ হৈ আছে বুলি সোধা এক প্ৰশ্নৰ উত্তৰত বিজেপি প্ৰাৰ্থীগৰাকীয়ে ফলাফলক লৈ কিছু উৎকণ্ঠাত থকা বুলি কয়।
‘আমি নিৰ্বাচনৰ প্ৰচাৰৰ বাবে যিমান খিনি কৰিব পাৰো কৰিছো, এতিয়া ফলাফল পৰম পিতা পৰমেশ্বৰৰ হাতত’ ওজাই এনেদৰে মনৰ ভাৱ প্ৰকাশ কৰে।
আনহাতে, ভোটগণনাৰ পূৰ্বে মন্দিৰলৈ গৈ ভগৱানৰ আশিস গ্ৰহণ কৰিব বুলিও সাংবাদিকৰ আগত মত প্ৰকাশ কৰে কুইন ওজাই।
তদুপৰি তেওঁ নিজৰ বাবে নহয় প্ৰধান মন্ত্ৰী নৰেন্দ্ৰ মোদীক গুৱাহাটী সমষ্টিৰ আসনখন উপহাৰ দিব পাৰিলে অতিশয় আনন্দিত হ’ব বুলি কয়। ওজাক বহু বছৰৰ মূৰত বিজেপিয়ে এটা মৰ্যদা দিছে গতিকে দলে দিয়া মৰ্যদা আটুত ৰাখিব পাৰিলে তেওঁ অতিশয় আনন্দিত হ’ব বুলি সংবাদ মাধ্যমৰ আগত প্ৰকাশ কৰে।