হাওৰাঘাটত উৎকোচ লৈ গ্ৰেপ্তাৰ হ’ল বিজেপি নেতা; চৰকাৰী আঁচনি দিয়াৰ নামত সংগ্ৰহ কৰিছিল ধন
কাৰ্বি আংলং জিলাৰ হাওৰাঘাটৰ শ্যামগুৰি বজাৰৰ পৰা উৎকোচ লোৱাৰ অভিযোগত গ্ৰেপ্তাৰ কৰা হৈছে এগৰাকী বিজেপি নেতা যীশু কেম্প্ৰাইক।
যীশু কেম্প্ৰাই কাৰ্বি আংলং গ্ৰাম উন্নয়ন সমিতিৰ অধ্যক্ষ।
কাৰ্বি আংলং জিলা আৰক্ষীৰ দুৰ্নীতি নিবাৰক শাখাৰ এটা অভিযানকাৰী দলে কেম্প্ৰাইক শ্যামবজাৰৰ পৰা গ্ৰেপ্তাৰ কৰে।
যীশু কেম্প্ৰাই তেওঁৰ সহযোগীসকলৰ সৈতে দীৰ্ঘদিন ধৰি চৰকাৰী আঁচনিৰ নামত বিভিন্নজনৰ পৰা উৎকোচ গ্ৰহণ কৰি আহিছিল।
কেম্প্ৰাই আৰু তেওঁৰ সহযোগীসকলে পিএমজিএছৱাই আঁচনিৰ ধন মোকলাই দিয়াৰ নামত দহ হাজাৰ টকালৈকে উৎকোচ গ্ৰহণ কৰিছিল।
যীশু কেম্প্ৰাই কাৰ্বি আংলং স্বায়ত্ত শাসিত পৰিষদৰ স্বাস্থ্য বিভাগৰ কাৰ্যবাহী সদস্য খনসিং ৰংপিৰ ঘনিষ্ঠ হিচাপে পৰিচিত।
কেম্প্ৰাইক আৰক্ষীয়ে উৎকোচ গ্ৰহণৰ সময়ত হাতে-লোটে ধৰা পেলায় আৰু গ্ৰেপ্তাৰ কৰে।
উল্লেখ্য যে আজি কিছুদিন পূৰ্বে কাৰ্বি স্বায়ত্ত পৰিষদৰ নেতাৰ ঘনিষ্ঠই এইদৰে ধন সংগ্ৰহৰ এটা অ’ডিপি ক্লিপ ছচিয়েল মিডিয়াত ভাইৰেল হৈ পৰিছিল।
দুৰ্নীতিত জড়িত এনে বিজেপি নেতাক গ্ৰেপ্তাৰৰ পাছতে গৃহ বিভাগৰ দায়িত্বত থকা মুখ্য মন্ত্ৰী সোণোৱালক তেওঁৰ শূন্য সহনশীলতাৰ নীতি অধিক কাৰ্যকৰী কৰি তোলাৰ বাবে আহ্বান জনাইছে।
কাৰ্বি পৰিষদত চলি থকা বিয়াগোম দুৰ্নীতিৰ স্বৰূপ উদঙাই উন্নয়নৰ গতি তৰান্বিত কৰিবলৈকো মুখ্যমন্ত্ৰীগৰাকীক বিভিন্নজনে আহ্বান জনাইছে।