যি সময়ত সমগ্ৰ দেশৰ জনতাই প্ৰধান মন্ত্ৰী মোদীৰ আহ্বানৰ প্ৰতি সঁহাৰি জনাই ম’ম, চাকি জ্বলোৱাৰ লগতে ঘৰৰ লাইট বন্ধ কৰি ৰাখিছিল সেই সময়ত ৰিভ’লভাৰেৰে গুলী বৰ্ষণ কৰি বিতৰ্কত সোমাই পৰিছে উত্তৰ-প্ৰদেশৰ এগৰাকী বিজেপি নেত্ৰী।
মঞ্জু তিৱাৰী নামৰ উত্তৰ-প্ৰদেশৰ বলৰামপুৰৰ বিজেপি নেত্ৰী গৰাকীয়ে গুলী ফুটোৱাৰ উক্ত ভিডিঅ’ পিছত ছ’চিয়েল মিডিয়াত ভাইৰেল হৈ পৰে।
আনহাতে ভিডিঅ’টোক কেন্দ্ৰ কৰি যথেষ্ট প্ৰতিক্ৰিয়া সৃষ্টি হোৱাত নেত্ৰী গৰাকীৰ বিৰুদ্ধে গোচৰ ৰুজু কৰা হয় বুলি বলৰামপুৰ আৰক্ষীয়ে জানিবলৈ দিয়ে।
মঞ্জু তিৱাৰী বিজেপিৰ মহিলা মৰ্চাৰ জিলা সভানেত্ৰী।
ভিডিঅ’টোত তেওঁক আকাশলৈ টোঁৱাই গুলী ফুটোৱা দেখা যায় আৰু গুলী ফুটাৰ লগে লগে এজন লোকে আনন্দত কিৰিলি পৰা শুনা যায়।
নেত্ৰী গৰাকীৰ বিৰুদ্ধে Arms Act 1959ৰ ৩০ ধাৰা আৰু ভাৰতীয় দণ্ডবিধিৰ ২৮৬ ধাৰাৰ অধীনত এক গোচৰ ৰুজু কৰা হৈছে।
পিছত এটা ব্যক্তিগত নিউজ চেনেলত নেত্ৰীগৰাকীয়ে ক্ষমা বিচাৰি কয় যে নিজৰ ‘অসাৱধানতা’ৰ বাবে নিশা ৯ বজাত চাকীৰ পোহৰ আৰু ফটকাৰ শব্দত নগৰখনত এক ‘দেৱালীৰ দৰে উৎসৱমুখ’ৰ পৰিৱেশে বিৰাজ কৰাত তেওঁ নিজকে ধৰি ৰাখিব নোৱাৰিলে।
‘মই যেতিয়া বাহিৰলৈ ওলাই আঁহো, গোটেই চহৰখনকে চাকী আৰু ম’মৰ পোহৰত জিলিকি থকা দেখোঁ। মোৰ এনে লাগিল যেন এইয়া দেৱালী হয়।‘ তিৱাৰীয়ে কয়।
প্ৰধান মন্ত্ৰী নৰেন্দ্ৰ মোদীয়ে দেশৰ জনসাধাৰণক ৫ তাৰিখৰ নিশা ৯ বজাত ৯ মিনিটৰ বাবে ঘৰৰ লাইট বন্ধ ৰাখি চাকী বা মোবাইলৰ ফ্লেছ লাইট জ্বলাই COVID-19 বিৰোধী যুঁজৰ প্ৰতি ঐক্যবদ্ধতা দেখুৱাবলৈ আহ্বান জনাইছিল।
