বিজেপি নেতৃত্বাধীন চৰকাৰখনে যি সময়ত দুৰ্নীতিৰ বিৰুদ্ধে শূন্য সহনশীলতাৰ ঢোল বজাই আছে সেই সময়তেই বিজেপিৰ বৰপেটা জিলা সমিতিয়ে বৰপেটা নগৰ মণ্ডল সমিতিৰ সভাপতিক লটাৰীৰ অবৈধ ব্যৱসায়ৰ সৈতে জড়িত থকাৰ অভিযোগত পদচ্যুত কৰাৰ লগতে কাৰণ দৰ্শোৱাৰ জাননী জাৰি কৰিছে।
বৰপেটা নগৰ মণ্ডল সমিতিৰ সভাপতি মুকুট ৰঞ্জন দাস আৰু লটাৰী চক্ৰৰ মধু দাস নামৰ এজন সদস্যৰ মাজত হোৱা কথোপকথনৰ অডিঅ’ ছ’চিয়েল মিডিয়াত ভাইৰেল হৈ পৰাৰ পাছত এই কথা প্ৰকাশ পাইছে।
অডিঅ’ ৰেকৰ্ডিংটোত মুকুট ৰঞ্জন দাসে বৰপেটা জিলাত লটাৰী অনুষ্ঠিত কৰাৰ অনুমতি দিয়াৰ বাবে লটাৰী ব্যৱসায়ীৰ হৈ মধু দাসৰ পৰা পাঁচ লাখ টকা বিচাৰি দৰ দাম কৰি থকা কথা উন্মোচিত হৈছিল। অন্যহাতে মধুৱে অবৈধ লটাৰী অনুষ্ঠিত কৰাৰ নামত দুই লাখ টকা দিবলৈ ৰাজি হৈছিল।
এই ভাইৰেল অডিঅ’টোৱে ২০১৬ চনত পৰিবৰ্তনৰ শ্লগান দি ক্ষমতালৈ অহা বিজেপি চৰকাৰখনৰ ‘শূন্য সহনশীলতা’ক লৈ ৰাইজৰ মনত প্ৰশ্নৰ উদ্ৰেক ঘটাইছে।
এই ঘটনা পোহৰলৈ অহাৰ পাছত বিজেপিৰ বৰপেটা জিলা সমিতিয়ে মুকুট ৰঞ্জন দাসলৈ পত্ৰ প্ৰেৰণ কৰি তেওঁক দায়িত্বৰ পৰা অব্যাহতি দিয়াৰ লগতে সাত দিনৰ ভিতৰত কাৰণ দৰ্শোৱাৰ জাননী দিছে।
‘’অতি সম্প্ৰতি বিভিন্ন ব্যক্তিৰ মোবাইলত সিঁচৰতি হৈ পৰা এটি অডিঅ’ বাৰ্তালাপৰ ৰেকৰ্ডিংত আপুনি লটাৰী ব্যৱসায়ীৰ পৰা ৫ লাখ টকা দাবী কৰা প্ৰমাণিত হৈছে। সম্পূৰ্ণ অসাধু উপায় অৱলম্বন কৰি গোপনে অবৈধভাৱে ধন সংগ্ৰহ কৰাৰ অৰ্থে ভাৰতীয় জনতা পাৰ্টিৰ বৰপেটা নগৰ মণ্ডল সভাপতিৰ দৰে গুৰুত্বপূৰ্ণ দায়িত্বত থাকি আপুনি কৰা উক্ত বাৰ্তালাপে জনমানসত দলৰ ভাৱমূৰ্তিত যথেষ্ট আঘাত সানিছে,’’- বিজেপিৰ বৰপেটা জিলা সমিতিৰ সভাপতি শংকৰ চন্দ্ৰ দাসে প্ৰেৰণ কৰা পত্ৰখনত এইদৰে উল্লেখ কৰিছে।
সেয়েহে তৎকালীনভাৱে বলৱৎ হোৱাকৈ আপোনাক বৰপেটা নগৰ মণ্ডল সমিতিৰ সভাপতিৰ দায়িত্বৰ পৰা অব্যাহতি দিয়া হ’ল।
বিজেপি নেতৃত্বাধীন চৰকাৰখনে দুৰ্নীতিৰ বিৰুদ্ধে শূন্য সহনশীলতাৰ নীতি লোৱাৰ সময়ত এজন বিজেপি নেতাৰ বিৰুদ্ধে এনে অভিযোগ স্বাভাৱিকতে তাৎপৰ্য্যপূৰ্ণ বিবেচিত হৈছে।
শেহতীয়াভাৱে নগাঁৱৰ সাংসদ তথা ৰাজ্যৰ প্ৰাক্তন মন্ত্ৰী প্ৰদ্যুৎ বৰদলৈয়ে অসমৰ মুখ্য মন্ত্ৰী সৰ্বানন্দ সোণোৱাল মাৰ্ঘেৰিটা সমষ্টিত চলি থকা কয়লা চিণ্ডিকেটৰ লগত জড়িত থকা বুলি অভিযোগ আনিছে।
কংগ্ৰেছ নেতাজনে এই চিণ্ডিকেটত প্ৰশাসন, বন বিভাগ, অসম চৰকাৰৰ বিষয়া আৰু সাংবাদিকো জড়িত থকাৰ অভিযোগ আনিছে।