দেশত ক্ষমতাৰ অপব্যৱহাৰেৰে নিজা পচন্দ অনুযায়ী ৰাজনৈতিক নেতাই কাৰ্য সম্পাদন কৰা কোনো নতুন কথা নহয়। এই নেতাসকলে নিজৰ স্বাৰ্থত প্ৰশাসনক ব্যৱহাৰ কৰাটো দেশত এক তেনেই সহজলভ্য দৃশ্য।
এনে এক ঘটনাই সংঘটিত হৈছে এইবাৰ কৰ্ণাটকত। ৰাজ্যখনৰ মহাদেৱপুৰা সমষ্টিৰ বিজেপি বিধায়ক অৰবিন্দ লিম্বাৱলীৰ বিৰুদ্ধে এগৰাকী মহিলাই ৰাজহুৱাকৈ ভূমি বেদখলৰ অভিযোগ তুলি প্ৰশ্ন উত্থাপন কৰাৰ বাবে আৰক্ষীৰ হতুৱাই মহিলাগৰাকীক আটক কৰোৱা হয়।
বেংগালুৰুত এক স্থানীয় সমস্যাৰ বুজ ল’বলৈ যোৱাৰ সময়তে বিধায়ক গৰাকী এই পৰিস্থিতিৰ সন্মুখীন হয়। এনে অপ্ৰত্যাশিত পৰিস্থিতিৰ সন্মুখীন হোৱাৰ ফলত বিজেপি বিধায়কগৰাকী বিমোৰত পৰে।
এই সমগ্ৰ ঘটনাৰ এক ভিডিঅ’ সম্প্ৰতি ভাইৰেল হৈ পৰিছে। ভিডিঅ’টোত মহিলাগৰাকীয়ে হাতত এখন কাগজ লৈ মহাদেৱপুৰাৰ বিধায়কজনৰ কাষ চাপি কিবা ক’বলৈ চেষ্টা কৰা দেখা গৈছে।
কিন্তু উত্তেজিত বিধায়কগৰাকীয়ে মহিলাগৰাকীৰ হাতৰ পৰা কাগজখন কাঢ়ি লৈ লগে লগে ফালি পেলায় আৰু মহিলাগৰাকীক তৎক্ষণাত আটক কৰিবলৈ আৰক্ষীক নিৰ্দেশ দিয়ে।
ভিডিঅ’টো ভাইৰেল হৈ পৰাৰ পিছতে দেশজুৰি তীব্ৰ বিতৰ্কৰ সৃষ্টি হৈছে। বিধায়ক গৰাকীৰ বিৰুদ্ধে ক্ষমতাৰ অপব্যৱহাৰৰ অভিযোগ উত্থাপন কৰাৰ লগতে এই ভিভিআইপি সংস্কৃতিৰ নিন্দা কৰিছে সচেতন ৰাইজে।
