সংবিধানৰ ওপৰত সংঘ পৰিৱাৰৰ আক্ৰমণ কোনো নতুন কথা নহয়। বিজেপিয়ে কেন্দ্ৰত ক্ষমতালৈ অহাৰ পিছৰে পৰা মাজে মাজে সংঘ পৰিৱাৰে সংবিধানৰ ওপৰত মৌখিক আক্ৰমণ কৰি আহিছে।
কিন্তু এইবাৰ সংবিধানৰ ওপৰত আক্ৰমণ কেৱল সংঘ পৰিৱাৰতে সীমাৱদ্ধ হৈ থকা নাই। পৱিত্ৰ সংসদৰ মজিয়াতে সংবিধানৰ ওপৰত এইবাৰ আক্ৰমণ কৰিলে স্বয়ং বিজেপি সাংসদে।
ৰাজ্যসভাৰ এগৰাকী বিজেপি সাংসদে এইবাৰ সংবিধানৰ প্ৰস্তাৱনাৰ ‘সমাজতান্ত্ৰিক’ শব্দটো আঁতৰাবলৈ সংসদতে দাবী জনাইছে।
বিজেপি সাংসদ কেজে আলফ’নছে এই ‘সমাজতান্ত্ৰিক’ শব্দটো আঁতৰাই সেই স্থানত ‘ন্যায়সংগত’ শব্দটো প্ৰৱতৰ্নৰ বাবে দাবী জনাইছে।
অৱশ্যে শাসকীয় সাংসদগৰাকীৰ এই দাবীৰ তীব্ৰ বিৰোধিতা কৰে বিৰোধী সাংসদসকলে।
উল্লেখ্য যে যোৱা শুকুৰবাৰে ধ্বনিভোটৰ পিছতে ৰাজ্যসভাত সংবিধান(সংশোধনী) বিল, ২০২১ উত্থাপন কৰা হয়।
ইফালে বিধায়কখন সংসদৰ মজিয়াত উত্থাপনৰ পিছতে জনতা দলৰ সাংসদ মনোজ ঝা আৰু কংগ্ৰেছ নেতা জয়ৰাম ৰমেশে শাসকীয় দলৰ এই প্ৰচেষ্টাক তীব্ৰ সমালোচনা কৰে।
চৰকাৰে ৰাষ্ট্ৰপতিৰ অনুমোদন নোলোৱাকৈয়ে ৰাজ্যসভাত বিলখন উত্থাপন কৰাৰো অভিযোগ কৰিছে সাংসদ ঝাএ। উল্লেখ্য যে সংসদ কোনো বিধেয়ক উত্থাপন কৰাৰ পূৰ্বে চৰকাৰে ৰাষ্ট্ৰপতি অনুমোদন লোৱা প্ৰয়োজন।
স্মৰ্তব্য যে, কেশৱানন্দ ভাৰতী বনাম কেৰালা ৰাজ্য, ১৯৭৩ গোচৰত উচ্চতম ন্যায়ালয়ৰ ৰায় অনুসৰি সংসদে সংবিধানৰ মৌলিক গাঁথনি সলনি কৰিব নোৱাৰে। ইয়াৰ পিছতো বিজেপিৰ প্ৰস্তাৱনা সংশোধনৰ প্ৰচেষ্টা ভাৰতীয় গণতন্ত্ৰৰ বাবে এক অশুভ সংকেত হিচাপে বিবেচিত হৈছে।
