দুদিনীয়া ভ্ৰমণসূচীৰে আজি অসমলৈ আহিব বিজেপিৰ ৰাষ্ট্ৰীয় সভাপতি অমিত শ্বাহ। প্ৰাপ্ত তথ্য মতে আজি নিশা ৮ বজাত তেওঁ গুৱাহাটীৰ বৰঝাৰ বিমাণবন্দৰত উপস্থিত হ’ব।
শ্বাহে আজি নিশাটো গুৱাহাটীত কটাই দেওবাৰে লখিমপুৰত এখন জনসমাৱেশত ভাগ লোৱাৰ কথা।
যোৱা ১৩ ফেব্ৰুৱাৰিত ৰাজ্যসভাত বিজেপিয়ে নাগৰিকত্ব সংশোধনী বিধেয়ক উত্থাপন কৰাত বিফল হোৱাৰ পিছত দলটোৰ ৰাষ্ট্ৰীয় সভাপতি গৰাকীৰ এইয়া প্ৰথম অসম ভ্ৰমণ।
এক সূত্ৰৰ পৰা জানিব পৰা মতে লোকসভা নিৰ্বাচনৰ পূৰ্বে অমিত শ্বাহে দলৰ কৰ্মকৰ্তাসকলৰ সৈতে আলোচনাত মিলিত হোৱাৰ লগতে এন ডি এৰ সহযোগী দলসমূহৰ সৈতে নিৰ্বাচনী ৰণ-কৌশল তৈয়াৰ কৰাৰ কথা।
উল্লেখযোগ্য যে নাগৰিকত্ব বিধেয়কৰ বিৰোধিতাত অসমত বিজেপিৰ সৈতে অগপই মিত্ৰটা ভংগ কৰাৰ উপৰি উত্তৰ-পূবত এন ডি এৰ আন সহযোগী দল নেশ্যনেল পীপলছ পাৰ্টি (এন পি পি) আৰু মিজোৰাম নেশ্যনেল ফ্ৰণ্ট (এম এন এফ)-এও বিধেয়কৰ তীব্ৰ বিৰোধিতা কৰিছিল।
ইয়াৰ পৰিপ্ৰেক্ষিতত বিজেপিৰ ৰাষ্ট্ৰীয় সভাপতিগৰাকীৰ অসম আগমনে কেনেধৰণৰ ৰাজনৈতিক সমীকৰণ তৈয়াৰ কৰে সেয়া লক্ষণীয় হ’ব।