যদি আমাক ভোট নিদিয়ে, তেন্তে কংগ্ৰেছক ভোট দিয়ক! পূবৰ বেলি পশ্চিমত উদয় হোৱাৰ দৰে এইবাৰ এজন বিজেপি নেতাৰ মুখত শুনা গ’ল এই ভাষ্য। শুনিবলৈ আচৰিত লাগিলেও যেন ৰাজনীতিত সকলো সম্ভৱ!
এই আজৱ ঘটনা ঘটিছে নিৰ্বাচনমুখৰ ৰাজ্য পঞ্জাৱত। ইতিমধ্যে ভোটগ্ৰহণ চলি থকা ৰাজ্যখনৰ বিজেপি সভাপতি অশ্বিনী শৰ্মাই ভোটাৰসকলক উদ্দ্যেশ্যি এইদৰে কৈছে।
দেওবাৰে এটা নিৰ্বাচনী কেম্পেইনত তেওঁ কয় যে যদি ভোটাৰসকলে বিজেপিক ভোট দিব বিচৰা নাই, তেন্তে আম আদমী পাৰ্টিকো ভোট নিদিব। বৰঞ্চ কংগ্ৰেছক ভোট দিয়ক!
আনহাতে, পঞ্জাৱৰ বিজেপি সভাপতি শৰ্মা নিজেও এজন নিৰ্বাচনী প্ৰাৰ্থী। পাঠানকোট সমষ্টিৰ পৰা তেওঁ নিৰ্বাচনত অৱতীৰ্ণ হৈছে। এজন জ্যেষ্ঠ বিজেপি নেতা হৈও এইদৰে কংগ্ৰেছক ভোট দিবলৈ কোৱাৰ ফলত ৰাজ্যখনত বিৰাট চৰ্চা চলিছে।
তেওঁৰ বক্তব্যটোৰ ভিডিঅ’ত কোৱা শুনা গৈছে যে আম আদমী পাৰ্টিক ভোট দিয়া মানেই সন্ত্ৰাসবাদীক ভোট দিয়া।
আম আদমী পাৰ্টিক ভোট দিয়া প্ৰতিজন লোকেই দেশ আৰু পঞ্জাৱক বিশ্বাসঘাটকতা কৰিছে। এইধৰণেই শৰ্মাই ভোটাৰসকলক কংগ্ৰেছক ভোট দিবলৈ অনুৰোধ কৰিছে।
উল্লেখযোগ্য যে পঞ্জাৱত ইতিমধ্যে আম আদমী পাৰ্টিয়ে স্থিতি মজবুত কৰিছে বুলি খবৰ পোৱা গৈছে। ৰাজ্যখনৰ শাসনাধীষ্ঠ দল কংগ্ৰেছৰ সমুখত প্ৰত্যহ্বানস্বৰূপ হৈ পৰিছে অৰবিন্দ কেজৰিৱালৰ জনপ্ৰিয়তা।
আনহাতে প্ৰাক্তন মুখ্যমন্ত্ৰী কেপ্টেইন অমৰিন্দৰ সিঙৰ নতুন দল পাঞ্জাৱ লোক কংগ্ৰেছৰ স’তে নিৰ্বাচনত অৱতীৰ্ণ হৈছে বিজেপি।
কিন্তু শাসনাধীষ্ঠ কংগ্ৰেছক উফৰাবলৈ বদ্ধপৰিকৰ হৈছে আম আদমী পাৰ্টি। সেইবাবেই বিজেপি সভাপতি শৰ্মাৰ ভিডিঅ’টো ভাইৰেল হৈ পৰিছে।
