অসম ৰাজ্যিক বিজেপিয়ে ১৫ গৰাকী নেতাক দলৰ প্ৰাখমিক সদস্য পদৰ পৰা বহিষ্কাৰ কৰিছে।
বৃহস্পতিবাৰে ৰাজ্যিৰ বিজেপিৰ সাধাৰণ সম্পাদক ৰাজদীপ ৰয় স্বাক্ষৰিত এক জাননী যোগে দলটোৰ ১৫ গৰাকী নেতাক দলৰ পৰা বহিষ্কাৰ কৰাৰ কথা ঘোষণা কৰিছে।
২০২১ৰ অসম বিধান সভা নিৰ্বাচনত নিৰ্দলীয়ভাৱে প্ৰতিদ্বন্দিতা আগবঢ়োৱাৰ বাবেই দিলীপ পাল, প্ৰিয়ংকা নেওগ, লক্ষেশ্বৰ মৰাণ, ৰাজেশ কিষাণ, দেৱজিত মৰাণসহ ১৫ জন বিজেপি নেতাক দলৰ পৰা বহিষ্কাৰ কৰিছে ৰাজ্যিক বিজেপিয়ে।
উল্লেখ্য যে টিকটৰ পৰা বঞ্চিত হৈ বিজেপিৰ এইসকল নেতাই ক্ষোভ উজাৰি নিজ নিজ সমষ্টিসমূহত নিৰ্দলীয়ভাৱে প্ৰতিদ্বন্দ্বিতা আগবঢ়াইছে।
নিৰ্বাচনত নিৰ্দলীয়ভাৱে প্ৰতিদ্বন্দ্বিতা কৰি দল বিৰোধী কাৰ্যকলাপত লিপ্ত থকাৰ অভিযোগত দলৰ সাংবিধানৰ ধাৰা ২৫ৰ উপধাৰা ৯ অনুসৰি ৰাজ্যিক বিজেপিৰ সভাপতি ৰঞ্জিত কুমাৰ দাসে তাৎক্ষণিকভাৱে কাৰ্যকৰী হোৱাকৈ বিধানসভাৰ প্ৰাক্তন উপাধ্যক্ষ দিলীপ পালসহ ১৫ জনক বিজেপি নেতাক বহিষ্কাৰ কৰিছে।
আটাইকেইগৰাকী নেতাকে দলটোৰ প্ৰাথমিক সদস্য পদৰ পৰা ৬ বছৰৰ বাবে বহিস্কাৰ কৰা হৈছে।
এই কেইগৰাকী নেতাক বহিষ্কাৰ কৰাৰ পাছত এটা কথা স্পষ্ট হৈ পৰিছে যে বিজেপিত এক প্ৰকাৰৰ খহনীয়াৰ সৃষ্টি হৈছে।
অসম বিধান সভাৰ প্ৰাক্তন উপাধ্যক্ষ দিলীপ পালৰ শিলচৰত প্ৰভূত্ব থকাৰ লগতে ডুমডুমাৰ প্ৰাক্তন বিধায়ক লক্ষেশ্বৰ মৰাণৰো আছে বিশাল ভোটবেংক। ইয়াৰোপৰি চাবুৱাৰ বিনোদ হাজৰিকাৰ সমৰ্থকসকলে প্ৰিয়ংকা নেওগক সমৰ্থন জনাব বুলি জানিব পৰা গৈছে।
