এসময়ত বিদেশী মুক্ত অসম গঢ়াৰ নিমিত্তে ৰাষ্ট্ৰীয় নাগৰিক পঞ্জীৰ উন্নীতকৰণ প্ৰক্ৰিয়া আগবঢ়াই নিয়াৰ কৃতিত্ব লোৱা বিজেপিৰ ৰোষত পৰিছে প্ৰাক্তন মুখ্য মন্ত্ৰী প্ৰফুল্ল কুমাৰ মহন্ত।
মহন্তৰ দোষ ‘ৰাষ্ট্ৰীয় নাগৰিক পঞ্জীক লৈ সন্তুষ্টি প্ৰকাশ।‘
উল্লেখযোগ্য যে, এনআৰচিৰ চুড়ান্ত তালিকা প্ৰকাশ পোৱাৰ পাছতেই এক সংবাদমেল সম্বোধন কৰি প্ৰাক্তন মুখ্য মন্ত্ৰীগৰাকীয়ে এক সংবাদমেল সম্বোধন কৰি ইয়াক ‘মাইলৰ খুটি’ আখ্যা দিয়ে।
মহন্তই এনআৰচিক লৈ আগবঢ়োৱা বক্তব্যৰ পাছতে তেওঁৰ বিৰুদ্ধে সৰব হৈ পৰিছে বিজেপিৰ মিডিয়া পেনেলিষ্ট সুভাষ দত্ত।
শণিবাৰে ৰাজ্যিক বিজেপিৰ কাৰ্য্যালয়ত মহন্তৰ বক্তব্যৰ অন্তৰালত প্ৰতিক্ৰিয়া প্ৰকাশ কৰি দত্তই কয়, ‘’সময়ত সদৌ অসম ছাত্ৰ সন্থাকে ধৰি জাতীয় জনগোষ্ঠীয় সংগঠন, অনুষ্ঠান প্ৰতিষ্ঠানো এই ৰাষ্ট্ৰীয় নাগৰিক পঞ্জীক লৈ সন্তুষ্ট নহয়। ৰাষ্ট্ৰীয় নাগৰিকপঞ্জীখন ত্ৰুটিপূৰ্ণ, লাখ লাখ বিদেশীৰ নাম সোমাই যোৱা বুলি সন্দেহ হৈছে, তেনে অৱস্থাত প্ৰাক্তন মুখ্য মন্ত্ৰীজনে এই যি বক্তব্য ৰাখিছে এই বক্তব্যই তেওঁৰ অবৈধ বাংলাদেশী প্ৰীতি প্ৰমাণ কৰিছে।‘’
ইপিনে, বিজেপিৰ মতে মহন্তই এইবাৰেই প্ৰথম বুজাবুজি কৰা নাই।
‘’প্ৰফুল্ল মহন্তই এই কম্প্ৰমাইছ আজিয়েই কৰা নাই, ১৯৯৬ চনত আব্দুল মহিম মজুমদাৰক তেওঁৰ কেবিনেটৰ সদস্য পাতিছিল। অসম আন্দোলনৰ বিৰোধিতা কৰা, বাংলাদেশী ৰক্ষণাবেক্ষণৰ পক্ষত থকা চিপিআই, চিপিএমৰ লগত লগ লাগি প্ৰফুল্ল মহন্তই চৰকাৰ কৰা দিনাই প্ৰথম কম্প্ৰমাইছ কৰিছিল,’’ -মহন্তৰ বুজাবুজিৰ বৰ্ণনা দি সুভাষ দত্তই কয়।
তদুপৰি,‘’অবৈধ বিদেশীক বহিস্কাৰ কৰাৰ দাবীত অসম আন্দোলনত ৮৫৫ জন চহিদ হৈছিল’’ বুলি মন্তব্য কৰি দত্তই কয়, ‘’তেওঁলোক চহিদ হোৱাৰ পাছত প্ৰফুল্ল মহন্ত মুখ্য মন্ত্ৰী হৈছিল। অসম আন্দোলনৰ আলম লৈ তথা অসম চুক্তিৰ আলম লৈ তেওঁ ১০ বছৰ মুখ্য মন্ত্ৰীৰ আসনত আছিল।‘’
বিজেপিৰ মতে মহন্তৰ বক্তব্যই অকল চহিদ সকলকেই অপমান কৰা নাই।
‘’মহন্তই স্বাভাৱিকতে সেই সময়ত যিটো আন্দোলনৰ নেতৃত্ব দিছিল, সেই আন্দোলনৰ নেতৃত্ব দিয়াৰ অন্তৰালত তেওঁৰ ব্যক্তিগত অভিলাষৰ কথাও প্ৰতিফলিত কৰে,’’- দত্তই এইদৰে কয়।
