নিৰ্বাচনী বণ্ডৰ পৰা ধন সংগ্ৰহৰ ক্ষেত্ৰত বিজেপিৰ ওচৰে পাজৰে কোনো দল নাই। ২০১৯ চনৰ ১২ এপ্ৰিলৰ পৰা ২০২৪ চনৰ জানুৱাৰীলৈকে নিৰ্বাচনী বণ্ডৰ জৰিয়তে সৰ্বাধিক অনুদান লাভ কৰা দলসমূহৰ তালিকাত দ্বিতীয় স্থানত আছে তৃণমূল কংগ্ৰেছ। অৰ্থাৎ পশ্চিম বংগৰ শাসকীয় দলে কংগ্ৰেছতকৈ অধিক ধন লাভ কৰিছে। সেইদৰে তেলেংগানাৰ আঞ্চলিক দল বিআৰএছতকৈ কংগ্ৰেছে অলপহে বেছি ধন লাভ কৰিছে।
বৃহস্পতিবাৰে নিৰ্বাচন আয়োগে প্ৰকাশ কৰা তথ্য অনুসৰি ২০১৯ চনৰ ১২ এপ্ৰিলৰ পৰা ২০২৪ চনৰ জানুৱাৰীলৈকে নিৰ্বাচনী বণ্ডৰ জৰিয়তে বিজেপিয়ে ৬০,৬০,৫১,১১,০০০ টকা (৬,০৬০.৫ কোটিতকৈ অধিক) অনুদান লাভ কৰিছিল। তৃণমূলে লাভ কৰা অনুদানৰ পৰিমাণ ১৬,০৯,৫৩,১৪,০০০ টকা (১,৬০৯.৫৩ কোটি টকাতকৈও অধিক)।
ভাৰতৰ সৰ্ববৃহৎ চৰকাৰী বেংক ষ্টেট বেংক অৱ ইণ্ডিয়াই উচ্চতম ন্যায়ালয়ৰ নিৰ্দেশৰ পিছত বুধবাৰে বিয়লিৰ ভিতৰত নিৰ্বাচনী বণ্ড সম্পৰ্কীয় তথ্য নিৰ্বাচন আয়োগক দাখিল কৰে। সেই তথ্যৰ ভিত্তিত বৃহস্পতিবাৰে নিৰ্বাচনী বণ্ডৰ সকলো পৰিসংখ্যা নিৰ্বাচন আয়োগৰ ৱেবছাইটত প্ৰকাশ কৰা হৈছে।
সেই অনুসৰি, কোনটো দলক কিমান টকা দিয়া হৈছে সেই কথা প্রকাশ কৰা হোৱা নাই যদিও এটা দলে কিমান টকা পাইছে সেইটো হিচাপ কৰাটো সহজ৷ আৰু তাৰ ওপৰত ভিত্তি কৰি চাওক কোনটো দলে নিৰ্বাচনী বণ্ডৰ জৰিয়তে সৰ্বাধিক অনুদান লাভ কৰিছে। তাৎপৰ্যপূৰ্ণভাৱে চিপিআইএম শীৰ্ষ ২০টা দলৰ ভিতৰত নাই।
নিৰ্বাচনী বণ্ডৰ পৰা কোনটো ৰাজনৈতিক দলে কিমান অনুদান লাভ কৰিছে?
১) বিজেপি: ৬০,৬০,৫১,১১,০০০ টকা।
২) তৃণমূল কংগ্ৰেছ: ১৬,০৯,৫৩,১৪,০০০ টকা।
৩) ভাৰতীয় জাতীয় কংগ্ৰেছ: ১৪,২১,৮৬,৫৫,০০০ টকা।
৪) ভাৰত ৰাষ্ট্ৰীয় সমিতি (তেলেংগানাৰ শাসকীয় দল আছিল): ১২,১৪,৭০,৯৯,০০০ টকা।
৫) বিজু জনতা দল (ওড়িশাৰ শাসকীয় দল): ৭,৭৫,৫০,০০,০০০ টকা।
৬) ডি এম কে (তামিলনাডুৰ শাসকীয় দল): ৬,৩৯,০০,০০,০০০ টকা।
৭) ৱাই এছ আৰ কংগ্ৰেছ (অন্ধ্ৰ প্ৰদেশৰ শাসকীয় দল): ৩,৩৭,০০,০০,০০০ টকা।
৮)তেলেগু দেশম পাৰ্টি : ২,১৮,৮৮,০০,০০০ টকা।
৯) শিৱসেনা (ৰাজনৈতিক দল): ১,৫৮,৩৮,১৪,০০০ টকা।
১০)ৰাষ্ট্ৰীয় জনতা দল (আৰ জে ডি): ৭২,৫০,০০,০০০ টকা।
১১) আম আদমি পাৰ্টি (আপ): ৬৫,৪৫,০০,০০০ টকা।
১২) জনতা দল (ছেকুলাৰ): ৪৩,৫০,০০,০০০ টকা।
১৩) ছিকিম ক্ৰান্তিকাৰী মৰ্চাঃ ৩৬,৫০,০০,০০০ টকা।
১৪) নেচনেলিষ্ট কংগ্ৰেছ পাৰ্টি: ৩০,৫০,০০,০০০ টকা।
১৫) জনসেনা পাৰ্টি : ২১,০০,০০,০০০ টকা।
১৬) সমাজবাদী পাৰ্টি : ১৪,০৫,০০,০০০ টকা।
১৭) বিহাৰ প্ৰদেশ জনতা দল (ইউনাইটেড): ১৪,০০,০০,০০০ টকা।
১৮) ঝাৰখণ্ড জনমুক্তি মৰ্চাঃ ১৩,৫০,০০,০০০ টকা।
১৯) শিৰোমণি আকালি দলঃ ৭,২৬,০০,০০০ টকা।
২০) এ আই এ ডি এম কে : ৬,০৫,০০,০০০ টকা।
