আজি সমগ্র দেশৰ লগতে অসমতো পালন কৰা হ’ব পোহৰৰ উৎসৱ দীপাৱলী। এই উৎসৱ পালনৰ বাবে জনসাধাৰণে আজিৰ নিশাটো আলোকজ্জ্বল কৰি তুলিবলৈ মাটিৰ চাকিকে ধৰি বৈদ্যুতিক আলোকসজ্জাৰ সামগ্ৰী ক্ৰয় কৰিবলৈ বজাৰত ভিৰ কৰিছে।
ইয়াৰ মাজতে দীপাৱলী উপলক্ষে আজি ৰাতিপুৱা ১১বজাৰ পৰা আৰম্ভ কৰি গুৱাহাটী জিলা বিজেপি মহিলা মৰ্চাৰ উদ্যোগত গুৱাহাটীৰ ৰাইজৰ মাজত মাটিৰ চাকি,মিঠাতেল আদি বিতৰণ কৰা হয়। চীনা সামগ্ৰীক প্ৰত্যাহ্বান জনাই থলুৱা মৃৎ শিল্পীসকলক উৎসাহ যোগাবৰ বাবে এই পদক্ষেপ গ্ৰহণ কৰা হৈছে বুলি উদ্যোক্তা সকলে জানিবলৈ দিয়ে।
তদুপৰি, এনে কাৰ্যৰ দ্বাৰা আনেও অসমৰ থলুৱা মৃৎশিল্পীসকলক সহায় কৰিবলৈ পদক্ষেপ হাতত লোৱা বুলি গুৱাহাটী মহানগৰ জিলা মহিলা মৰ্চাৰ সভানেত্ৰী বিজুলী কলিতা মেধিয়ে সংবাদমাধ্যমৰ আগত ব্যক্ত কৰে।
আনহাতে, জনসাধাৰণে যাতে চীনা লাইট ব্যৱহাৰ নকৰে তাৰ বাবে ৰাইজৰ মাজত সজাগতা সৃষ্টিৰ বাবেই এনেধৰণৰ পদক্ষেপ লোৱা বুলি তেওঁ জানিবলৈ দিয়ে।
বিজেপিৰ গুৱাহাটী মহিলা মৰ্চাই প্ৰত্যেককে ১০ গছি চাকি-বন্তি, এপেকেট মিঠাতেল বিতৰণ কৰে। তদুপৰি, আজি ৰাজ্যখনৰ সকলো জিলাতে বিজেপিৰ মহিলা মৰ্চাই চাকি বিতৰণ কাৰ্য্যসূচী লোৱা বুলি জানিব পৰা গৈছে।