‘বিগত CAA আন্দোলনৰ সময়ৰ পৰাই কেৱল মাথোঁ নিজ ৰাজনৈতিক স্বাৰ্থ পূৰণৰ উদ্দেশ্যৰে আছুৰ সত্বাক ব্যৱহাৰ কৰিছে লুৰীণজ্যোতি গগৈয়ে ।‘ নৰ্থ ইষ্ট নাওলৈ প্ৰেৰণ কৰা এক বিজ্ঞপ্তিৰ জৰিয়তে এইদৰে আছুৰ সাধাৰণ সম্পাদকগৰাকীক সমালোচনা কৰে বিজেপি যুৱ মৰ্চাৰ সভাপতি অনুপ বৰ্মণে।
লুৰীণজ্যোতি গগৈক কটাক্ষ কৰি তেওঁ আৰু কয় ‘অসমৰ জনসাধাৰণৰ আৱেগক ধুলিসাৎ কৰি ভৰিৰে মোহাৰিবলৈয়ো কুণ্ঠিত হোৱা নাই বৰ্তমানৰ আছুৰ এই সম্পাদক গৰাকী৷ সুদীৰ্ঘ সময় অসমৰ ছাত্ৰ সমাজক প্ৰতিনিধিত্ব কৰি অহা অসমীয়া জাতীয় সংগঠনটোক কেৱল মাথোঁ কেইজনমান নেতাৰ ন্যস্ত স্বাৰ্থ পূৰণৰ এক আহিলা হিচাপে ব্যৱহাৰ কৰিবলৈ আৰম্ভ কৰিছে বৰ্তমানৰ আছুৰ সম্পাদকগৰাকীয়ে৷’
অনুপ বৰ্মণৰ মতে ‘বৰ্তমান আৰু আছু কোনো জাতীয় সংগঠন হৈ থকা নাই, ক্ৰমান্বয়ে ই এক ৰাজনৈতিক দললৈ পৰিৱৰ্তন হৈছে৷ এই কথা সংগঠনটোৰ নেতৃত্বৰ মুখত ইতিমধ্যেই স্পষ্ট হৈ পৰিছে।
ইপিনে, অসম চুক্তিৰ ৬ নং দফা ৰূপায়ণ আৰু কাৰ্যকৰী কৰাৰ ক্ষেত্ৰত কেন্দ্ৰীয় চৰকাৰে গঠন কৰি দিয়া কমিটিখনৰ প্ৰস্তাৱসমূহ নিৰ্দিষ্ট সময়সীমাৰ পূৰ্বেই ৰাজহুৱা কৰাটোৱে আছুৰ ন্যস্ত অভিসন্ধিকে সূচায় বুলি বৰ্মণে দাবী কৰে।
‘অন্যথা কমিটিখনে চৰকাৰক বান্ধি দিয়া দুবছৰ সময়সীমাৰ পাঁচ মাহ নহওঁতেই আছুৱে ইমান লৰালৰিকৈ প্ৰস্তাৱসমূহ ৰাজহুৱা কৰাৰ বিশেষ কোনো কাৰণ নাছিল৷ হয়তো বিগত ৩৫ বছৰে কাৰ্যকৰী নোহোৱাকৈ পৰি ৰোৱা বিষয় এটা সমাধানৰ ক্ষেত্ৰত চৰকাৰে লোৱা কাৰ্যপন্থাই আছুৰ আগন্তুক ৰাজনৈতিক কুচকাৱাজত প্ৰভাৱ পেলাব বুলি লুৰিণজ্যোতি গগৈ প্ৰমুখ্যে একাংশ নেতৃবৰ্গ শংকিত হৈছে আৰু সেয়েহে ইচ্ছ্যুটোক লৈ বিতৰ্কৰ সৃষ্টি কৰি ৰাজনৈতিক বতাহ উত্তাল কৰি ৰাখিবলৈ চৰকাৰক আক্ৰমণ আৰম্ভ কৰিছে৷’ অনুপ বৰ্মণে এইদৰে কয়।
যুৱমৰ্চাৰ সভাপতি গৰাকীয়ে লগতে কয় ‘সৌ সিদিনা লুৰীণজ্যোতি গগৈয়ে “হু ইজ হিমন্ত বিশ্ব শৰ্মা” বুলি কোৱা কথাটোৱে আচলতে তেওঁৰে অজ্ঞতাৰ কথা সূচাইছে। তেওঁ হয়তো পাহৰিছে যে, আছুৰ পৰাই জন্ম লভা আৰু প্ৰায় দহ বছৰ কাল শাসনত অধিষ্ঠিত থকা প্ৰফুল্ল কুমাৰ মহন্ত দেৱৰ নেতৃত্বাধীন অগপ চৰকাৰে কিম্বা কংগ্ৰেছ চৰকাৰে সামান্যতমো সদিচ্ছা প্ৰকাশ নকৰাকৈয়ে ৩৫ বছৰ কাল অসম চুক্তিৰ প্ৰতিটো দফা কেৱল কাগজতেই পৰি ৰ’ল।‘
‘কিন্তু বিজেপি দলে ক্ষমতালৈ আহিয়েই অসম আন্দোলনৰ শ্বহীদৰ পৰিয়ালসমূহক মৰ্যদা প্ৰদান কৰি আৰ্থিক অনুদানো আগবঢ়াইছিল।‘ বৰ্মণে এইদৰে কয়।
লুৰীণজ্যোতি গগৈক সকিয়াই অনুপ বৰ্মণে কয় ‘লুৰিণজ্যোতি ডাঙৰীয়া, আপুনি নিশ্চয় জানে যে, ড° হিমন্ত বিশ্ব শৰ্মা ডাঙৰীয়া অসম চৰকাৰৰ এজন সন্মানীয় মন্ত্ৰী, অসমৰ ৰাইজৰ প্ৰতিনিধি। ৬ নং দফা সন্দৰ্ভত অসমৰ সকলো ৰাইজৰে মাত মতাৰ অধিকাৰ আছে কাৰণ সেইটো কেৱল লুৰীণজ্যোতি গগৈৰ ব্যক্তিগত বিষয় নহয়। ৰাইজৰ প্ৰতিনিধি হিচাপে এইক্ষেত্ৰত মত প্ৰকাশ কৰাৰ সম্পূৰ্ণ অধিকাৰ আছে মন্ত্ৰীগৰাকীৰ।‘
তেওঁ লগতে কয় ‘গগৈ ডাঙৰীয়াই এইটোও জনা উচিত যে অসম বিধানসভাই গ্ৰহণ কৰাৰ পিছতহে অসমীয়াৰ সংজ্ঞা নিৰূপণ হ’ব৷ আৰু তেতিয়াহে অসম চুক্তিৰ ৬ নং দফাৰ ৰূপায়ণ বাস্তৱায়িত হ’ব।‘
‘আজি যদিহে অসমৰ ৰাইজে প্ৰশ্ন কৰে “হু ইজ লুৰীণজ্যোতি বুলি?? অসমৰ ৰাইজৰ ক্ষেত্ৰত তেওঁৰ অৱদান কি বুলি?” কি উত্তৰ দিব তেখেতে? শ্ৰীমন্ত শংকৰ শংঘৰ দৰে এক জাতীয় অনুষ্ঠানকো অপমান কৰিব পৰা লুৰীণজ্যোতি গগৈৰ শিষ্টাচাৰ অসমৰ ৰাইজে ইতিমধ্যে জানিছেই।‘ বৰ্মণে এইদৰে গগৈক সমালোচনা কৰি কয়।
অসমৰ ৰাইজলৈ আহ্বান জনাই বৰ্মণে কয় ৰাইজে বিচাৰ কৰক, অসমৰ ৰাইজৰ আৱেগ, শ্বহীদৰ তেজ আৰু আত্মাৰ অনুষ্ঠান আছুক মাথোঁ কেইজনমান ব্যক্তিৰ ন্যস্ত স্বাৰ্থ পূৰণৰ কাৰণে কোনোৱে ব্যৱহাৰ নকৰে৷’
আছুৰ সাধাৰণ সম্পাদকগৰাকীক এইদৰে সমালোচনা কৰাৰ পাছত এতিয়া তেওঁৰ প্ৰতিক্ৰিয়া কি হ’ব সেয়া সময়ত লক্ষ্যণীয় হ’ব।