বহু অপেক্ষাৰ অন্তত ভাৰতীয় জনতা পাৰ্টিয়ে লোকসভা নিৰ্বাচনৰ বাবে বৰ্তমান আৰু মাত্ৰ এমাহতকৈয়ো কম সময় থকা অৱস্থাত অসমৰ পৰা প্ৰতিদ্বন্দ্বিতা কৰিবলগীয়া ৮জন প্ৰাৰ্থীৰ নাম প্ৰথমখন তালিকাত প্ৰকাশ কৰিছে।
ৰঙৰ উৎসৱ হোলীৰ আনন্দৰ মাজতে বৃহস্পতিবাৰে সন্ধিয়া সমৰ্থকসকলে শিলচৰৰ বিলপাৰ অঞ্চলত থকা ডাঃ ৰাজদ্বীপ ৰয়ৰ বাসগৃহত উপস্থিত হৈ আশা আৰু আনন্দৰ ৰঙ ছটিয়াই উৎফুল্লিত হৈ পৰে।
অৱশ্যেই নহ’বই বা কিয়, অহা ১৮ এপ্ৰিলত ভোটগ্ৰহণ অনুষ্ঠিত হ’বলগীয়া বহু চৰ্চিত শিলচৰ লোকসভা সমষ্টিত প্ৰতিদ্বন্দ্বিতাৰ বাবে যে প্ৰাৰ্থিত্ব প্ৰদান কৰা হৈছে ডাঃ ৰাজদ্বীপ ৰয়ক।
সমষ্টিটোত প্ৰায় ১১ লাখ ভোটাৰে তেওঁলোকৰ পৰৱৰ্তী নেতাগৰাকীক নিৰ্বাচিত কৰাৰ বাবে ভোটদান কৰিব।
তেওঁৰ ‘ডক্টৰ চেম্বাৰ’ত বহি তেওঁক প্ৰাৰ্থিত্ব লাভৰ বাবে শুভেচ্ছা জনাবলৈ অহা সমৰ্থকসকলৰ সৈতে হোলীৰ আনন্দ লৈ থকাৰ মাজতে ডাঃ ৰাজদ্বীপ ৰয়ে ‘নৰ্থইষ্ট নাও’ৰ আগত চমুকৈ তেওঁৰ আশা-আকাংক্ষাৰ বিষয়ে জানিব দিয়ে।
সাক্ষাৎকাৰঃ
নৰ্থইষ্ট নাও : প্ৰাৰ্থিত্বৰ বাবে আপোনাৰ নাম ঘোষণা হোৱাৰ বাতৰি শুনাৰ পাছত আপোনাৰ প্ৰথম প্ৰতিক্ৰিয়া। ঘোষণা কৰাত বিলম্ব হ’ল যদিও আজিৰ এই উৎসৱৰ দিনটোতে খৱৰ অহা শিলচৰ আসনৰ পৰা প্ৰতিদ্বন্দ্বিতাৰ বিষয়ে আপুনি কি ক’ব?
ডাঃ ৰাজদ্বীপ ৰয় : ঘোষণাত বিলম্ব হোৱাটো কোনো ইচ্ছ্যু নহয়, কিন্তু আপুনি চাওক, বিগত পাঁচ বছৰ দিল্লীত আৰু অসমত তিনিবছৰত আমাৰ চৰকাৰে এক উন্নয়নৰ জোৱাৰ আনিছে অথবা সকলোকে সামৰি লৈছে, যাৰ বাবে সকলোৰে মত হৈছে যে নৰেন্দ্ৰ মোডীক পুনৰ এবাৰ ক্ষমতা প্ৰদান কৰা উচিত। আমি ভাল কামবোৰ অব্যাহত ৰাখিব লাগিব আৰু তেওঁ গ্ৰহণ কৰা ব্যৱস্থাসমূহক সমৰ্থন কৰিব লাগিব।
নৰ্থইষ্ট নাও : সমষ্টিটোত কি ইচ্ছ্যু লৈ আৰু কি প্ৰতিশ্ৰুতি লৈ আপুনি ভোটাৰসকলৰ কাষ চাপিব?
ডাঃ ৰাজদ্বীপ ৰয় : আমাৰ শিলচৰ সমষ্টিত আপুনি দেখিব যে বিগত পাঁচ বছৰত কোনো উন্নয়ন হোৱা নাই। কোনো প্ৰকল্প গ্ৰহণ কৰা হোৱা নাই। সাংসদ উন্নয়ন পুঁজিৰ ৩০ৰপৰা ৩৫ শতাংশ ধন উভতি গৈছে যিটো গণতন্ত্ৰৰ বাবে অত্যন্ত দুৰ্ভাগ্যজনক কথা। নাগৰিকত্ব সংশোধনী বিধেয়ক সন্দৰ্ভত সুষ্মিতা দেবৰ স্থিতি অতি দুখজনক আছিল। তেওঁ সংসদত বিষয়টো সঠিকভাৱে উপস্থাপন কৰিব নোৱাৰিলে। এই বিষয়টোত তেওঁৰ স্থিতি শিলচৰত তেওঁ যি কয় সেয়া দিল্লী আৰু ব্ৰহ্মপুত্ৰ উপত্যকাত একে নহয়। জনসাধাৰণে কংগ্ৰেছৰ ৰণ নীতি বুজি পোৱাৰ প্ৰয়োজন। আমাৰ ভাৰতীয় জনতা পাৰ্টিয়ে দিল্লীত যিটো কয় সেয়া দিচপুৰ আৰু শিলচৰতো কয়। আমি আমাৰ স্থিতিৰ পৰা আঁতৰি নাহো আৰু জনসাধাৰণে সেয়া বুজি পোৱাটো প্ৰয়োজন।
নৰ্থইষ্ট নাও : সুষ্মিতা দেব এগৰাকী বৰ্তমানৰ সাংসদ আৰু লগতে নিখিল ভাৰত কংগ্ৰেছৰ সভানেত্ৰী। তেওঁ দুৰ্গত আপুনি তেওঁৰ প্ৰত্যাহ্বান গ্ৰহণ কৰিবলৈ সাজুনে?
ডাঃ ৰাজদ্বীপ ৰয় : হয়, মই তেওঁক প্ৰত্যাহ্বান জনাম আৰু কিছুদিনৰ পৰাই মই সেয়া কৰি আহিছো। আমি অত্যন্ত আত্মবিশ্বাসী আৰু কেৱল শিলচৰ আসনখনেই নহয়, লগতে কৰিমগঞ্জতো ভাল প্ৰদৰ্শনেৰে বিজয়ী হৈ সেয়া প্ৰধান মন্ত্ৰী নৰেন্দ্ৰ মোডীক উপহাৰ দিবৰ বাবে সাজু হৈছো।