অসমবাসীৰ প্ৰাণৰ শিল্পী জুবিন গাৰ্গৰ মৃত্যুৱে সমগ্ৰ ৰাজ্যক শোকস্তব্ধ কৰি ৰাখিছে। জুবিন গাৰ্গৰ মৃত্যুৰ বাতৰি পোৱাৰ লগে লগে শোকত ডুব যায় ৰাজ্যবাসী। জুবিন গাৰ্গৰ হাজাৰ হাজাৰ অনুৰাগীৰ লগতে ৰাজ্য বিভিন্ন শ্ৰেণীৰ লোকে জুবিন গাৰ্গৰ মৃত্যুত শোক প্ৰকাশ কৰি ৰাজপথলৈ ওলাই আহে। সকলোৱে একে মুখে জুবিন গাৰ্গৰ ৰহস্যজনক মৃত্যুৰ তদন্তৰ দাবী কৰিছে। সকলোৱে সমস্বৰে জুবিন গাৰ্গৰ ৰহস্যজনক মৃত্যুত জড়িতসকলৰ শাস্তিৰ দাবী উত্থাপন কৰিছে।
এনে সময়তে সামাজিক মাধ্যমত এক দুষ্ট চক্ৰই ৰাজ্যৰ বিশিষ্ট চিন্তাবিদ ডঃ হীৰেন গোহাঁই আৰু ৰাজ্যসভাৰ সাংসদ অজিত কুমাৰ ভূঞাৰ বিৰুদ্ধে অতি নিকৃষ্ট পৰ্যায়ৰ ভুৱা প্ৰচাৰ চলাবলৈ ধৰিছে। এই দুষ্ট চক্ৰটো বিজেপিৰ আইটি চেলৰ লোক বুলিও চৰ্চা চলিছে। উজ্বল ভূঞা নামৰ এই চক্ৰটোৰে এজন সদস্যই ফেচবুকত ভুৱা প্ৰচাৰৰ নেতৃত্ব লোৱা দেখা গৈছে। নিজৰ ফেচবুক একাউণ্টত এই লোকজনে টেমপ্লেট শ্বেয়াৰ কৰি লিখিছে যে পূৱবঙ্গীয় মুছলমানৰ ঔৰসত জন্ম লোৱাকেইটাই নিজৰ নিজৰ লেতেৰা চৰিত্ৰ আৰু এজেণ্ডাবোৰ প্ৰকাশ কৰা আৰম্ভ কৰিছে। ৰাইজ এই কেইটাৰ কথাত গুৰুত্ব নিদিব। আমাক ন্যায় লাগে এই কেইটাৰ ফটুৱা ৰাজনীতি নালাগে। এই বিকৃত মানসিকতাৰ লোকজনে পোষ্টটোত কৰা টেমপ্লেটকেইখনত ডঃ হীৰেন গোহাঁই আৰু ৰাজ্যসভাৰ সাংসদ অজিত কুমাৰ ভূঞাৰ নাম উল্লেখ কৰা হৈছে।
চিন্তাবিদ ডঃ হীৰেন গোহাঁইৰ নাম উল্লেখ থকা প্লেটখনত জুবিন গাৰ্গৰ হত্যাকাণ্ডত অসমৰ মুখ্যমন্ত্ৰী আৰু বিজেপি দল জড়িত থকাৰ মোৰ সন্দেহ হয় বুলি লিখা আছে। সকলো সময়তে মিঞাক দোষ দি থাকে, জুবিন গাৰ্গক মিঞাই হত্যা কৰা নাই অসমীয়াই হত্যা কৰিলে বুলি লিখা আছে ৰাজ্যসভাৰ সাংসদ অজিত কুমাৰ ভূঞাৰ নামত থকা প্লেটখনত। জনমানসত তেওঁলোকক হেয় প্ৰতিপন্ন কৰাৰ লগতে সামাজিকভাৱে বদনাম কৰিবলৈ দুষ্ট চক্ৰটোৱে এই নিকৃষ্ট কাণ্ড কৰিছে বুলি ধাৰণা কৰা হৈছে। উল্লেখ্য যে, চিন্তাবিদ ডঃ হীৰেন গোহাঁই আৰু সাংসদ অজিত কুমাৰ ভূঞাই অসম নাগৰিক সন্মিলনৰ হৈ জুবিন গাৰ্গৰ মৃত্যুত শোক প্ৰকাশ কৰাৰ লগতে তেওঁৰ ৰহস্যজনক মৃত্যুৰ নিৰপেক্ষ তদন্ত বিচাৰি প্ৰেছ বিবৃতিয়ো প্ৰদান কৰিছিল। তেওঁলোকে এজন সৎ আৰু নিৰ্ভীক প্ৰাক্তন আৰক্ষী সঞ্চালক প্ৰধান, এজন উচ্চ ন্যায়ালয়ৰ ন্যায়াধীশ, এজন অপৰাধ বিশেষজ্ঞ আৰু এজন উচ্চ ন্যায়ালয়ৰ অধিবক্তাক লৈ এই তদন্ত কমিটি গঠন কৰিবলৈ চৰকাৰক আহ্বান জনাইছিল। চৰকাৰৰ লগত হলি-গলি নথকা এনে লোকৰ দ্বাৰা অনুসন্ধান চলালেহে জুবিনৰ মৃত্যুৰ সকলো কথা পোহৰলৈ আহিব। অন্যথা অসমৰ ৰাইজৰ বাবে জুবিনৰ অকাল আৰু আকস্মিক বিয়োগ চিৰদিনৰ বাবে সাঁথৰ হৈ ৰ’ব বুলিও বিবৃতিত উল্লেখ কৰিছিল।
