শেহতীয়াকৈ মহাৰাষ্ট্ৰ, গুজৰাটকে ধৰি একাধিক ৰাজ্যত ক’ভিড আক্ৰান্তসকলৰ শৰীৰত দেখা দিয়া ‘ব্লেক ফাংগাছ’ৰ সংক্ৰমণে আতংকিত কৰি তুলিছে স্বাস্থ্যকৰ্মী আৰু ৰোগীসকলক।
বিশেষজ্ঞসকলে জনোৱামতে, ধৰা পৰাৰ লগে লগে এই ৰোগৰ চিকিৎসা নকৰিলে ৰোগীৰ মৃত্যু পৰ্যন্তও হ’ব পাৰে।
শুকুৰবাৰে কেন্দ্ৰীয় স্বাস্থ্যমন্ত্ৰী হৰ্ষ বৰ্ধনে ‘ব্লেক ফাংগাছ’ সম্পৰ্কে এক বক্তব্য প্ৰদান কৰে।
স্বাস্থ্যমন্ত্ৰীজনে জনায় যে এই ৰোগৰ চিকিৎসা হিচাপে ব্যৱহাৰ কৰা ‘এম্ফোটেৰিচিন বি’ নামৰ ঔষধবিধৰ সৰবৰাহৰ বৃদ্ধিৰ বাবে কেন্দ্ৰীয় চৰকাৰে ব্যৱস্থা হাতত লৈছে।
তেওঁ কয় যে ভাইৰাচৰ সংক্ৰমণৰ পৰা ৰোগী সুস্থ হৈ উঠিলেও ৰোগীৰ ৰোগ প্ৰতিৰোধক ক্ষমতা কমি যায়, তেতিয়াই এই ‘ব্লেক ফাংগাছে’ শৰীৰত বাহ লয়।
যিসকল ৰোগীক দীৰ্ঘদিন আইচিইউত ৰাখি চিকিৎসা কৰা হৈছে আৰু যিসকলৰ ‘অনিয়ন্ত্ৰিত’ ডায়বেটিচ আছে, তেওঁলোকৰ মাজত এই সংক্ৰমণ বেছি দেখা পোৱা গৈছে বুলিও তেওঁ কয়।
এই ৰোগৰ প্ৰধান উপসৰ্গ হৈছে- চকুৰ বিষ আৰু ৰঙা পৰি যোৱা, জ্বৰ, মূৰৰ কামোৰণি, কাঁহ, শ্বাসকষ্ট আৰু তেজ বমি।
যিসকল এই ৰোগত আক্ৰান্ত হৈছে, তেওঁলোকৰ ‘ব্লাড চুগাৰ’ অৰ্থাৎ তেজত চেনি তথা গ্ল’কজৰ পৰিমাণ নিয়ন্ত্ৰণত ৰখাৰ পৰামৰ্শ প্ৰদান কৰে স্বাস্থ্যমন্ত্ৰালয়ে।