কোৰাণ পাঠৰ সময়তে মছজিদৰ বাহিৰত বিস্ফোৰণৰ ফলত ১৫টি শিশুৰ মৃত্যু ঘটিছে। এই কৰুম ঘটনাটো সংঘটিত হৈছে আফগানিস্তানৰ গজনী চহৰৰ পৰা ১২০ কিলোমিটাৰ দূৰৰ গিলান জিলাত।
কোনো সন্ত্ৰাসবাদী সংগঠনে এই আক্ৰমণৰ ঘটনাৰ দায়িত্ব স্বীকাৰ কৰা নাই যদিও ইয়াৰ আঁৰত তালিবানৰ হাত থকাৰ সন্দেহ প্ৰকাশ কৰিছে প্ৰশাসনে।
বাতৰি অনুসৰি, শুকুৰবাৰে গিলান জিলাৰ এটা বিতৰুৱা অঞ্চলৰ মছজিদত কোৰাণ পাঠ চলিছিল। সেই সময়ত মছজিদত অঞ্চলটোৰ বহু শিশুৱে ভিৰ কৰিছিল। তেনেতেই এগৰাকী ব্যক্তিয়ে মটৰ চাইকেলেৰে বিভিন্ন মনোহাৰী সামগ্ৰী কৰিবলৈ তাত উপস্থিত হয়।
শিশুসকলে মছজিদৰ পৰা ওলাই আহি সেইবোৰ চাবলৈ তেওঁক ঘেৰি ধৰে। তেতিয়াই বিস্ফোৰণত কঁপি উঠে অঞ্চলটো।
সেই প্ৰচণ্ড বিস্ফোৰণত ঘটনাস্থলীতে ১৫টি শিশুৰ মৃত্যু ঘটে আৰু আৰু আন ২০জনক আহত অৱস্থাত হাস্পাতলত ভৰ্তি কৰোৱা হয়।
উল্লেখ্য যে কাতাৰৰ ডোহাত আফগান চৰকাৰৰ প্ৰতিনিধিৰ সৈতে তালিবানৰ শান্তি আলোচনা চলি থকাৰ সময়তে আফগানিস্তানৰ বিভিন্ন প্ৰান্ত ৰক্তাক্ত হৈ পৰিছে।
বিগত সপ্তাহত কৰ্মস্থানলৈ যোৱাৰ সময়ত কাৰ বোমা বিস্ফোৰণৰ ফলত কাবুলৰ ডেপুটি গৱৰ্ণৰৰ মৃত্যু হৈছিল।
