অইল ইণ্ডিয়া লিমিটেডৰ বিষয়াই দাবী কৰা মতে, তিনিচুকীয়াৰ বাঘজানৰ গেছখাদৰ চৌপাশৰ জুই নিৰ্বাপিত কৰা হৈছে।
তেওঁলোকে কয় যে এই সময়ত কেৱল খাদৰ মুখতহে নিৰ্গত গেছসমূহ জ্বলি আছে।
“বৰ্তমান খাদৰ মুখৰ নিৰ্গত গেছহে কেৱল জ্বলি আছে। আমি ১.৫ কি.মি. এলেকা ৰেড জ’নৰূপে ঘোষণা কৰিছো যাতে কোনো বাহিৰা ব্যক্তি ছাইটৰ সমীপলৈ নাহে। সাৱধানতামূলক পদক্ষেপ হিচাপে এয়া কৰা হৈছে,” অইলৰ জ্যেষ্ঠ পৰিচালক (জন পৰিক্ৰমা) জয়ন্ত বৰমুদৈয়ে বৃহস্পতিবাৰে সাংবাদিকক জনায়।
তেওঁ কয় যে ৪৫০০ পি এছ আই (pounds per square inch)ত চাপত অনিয়ন্ত্ৰিতভাৱে গেছ নিৰ্গত হৈ আছে আৰু নিৰ্গমন নিয়ন্ত্ৰণৰ বাবে ই “অতি বেছি”।
“তাৰোপৰি, অতিমাত্ৰা তাপৰ বাবে খাদটোৰ ৫০ মিটাৰতকৈ দূৰলৈকে কোনো ব্যক্তি আগবাঢ়িব পৰা নাই। আমাৰ অগ্নিনিৰ্বাপন কৰ্মীসকলে এতিয়া পানী ছটিয়াই আছে আৰু চৌপাশে এক পানীৰ ছাতি সৃষ্টি কৰিছে। চৌপাশ শীতল কৰি বিশেষজ্ঞসকলে লাহে লাহে আগবাঢ়িব খুজিছে,” তেওঁ কয়।
যোৱা ১৬ দিন ধৰি অনিয়ন্ত্ৰিতভাৱে গেছ নিৰ্গত হৈ থকাৰ পিছত মঙলবাৰে বিয়লি অগ্নিকাণ্ড সংঘটিত হয় আৰু অইলৰ দুজন অগ্নিনিৰ্বাপন কৰ্মীৰ মৃত্যু হয়।
নিহত দুৰ্লভ গগৈ আৰু তিখেশ্বৰ গোহাঁই কোম্পানিটোৰ অগ্নিনিৰ্বাপন বিভাগৰ সহকাৰী অপাৰেটৰ আছিল।
খাদটোত সংঘটিত বিস্ফোৰণটো ইমানেই প্ৰচণ্ড আছিল যে ৩০ কি.মি.তকৈয়ো অধিক দূৰত্বৰ পৰা বহু মিটাৰ উচ্চতালৈকে ডাঠ, ক’লা ধোঁৱা ওলাই থকা দেখা পোৱা গৈছে।
