আজি নতুন দিল্লীত সম্পাদিত ঐতিহাসিক বড়ো চুক্তিত ৰাজনৈতিক ষড়যন্ত্ৰ জড়িত থকাৰ গুৰুতৰ অভিযোগ উত্থাপন কৰিছে কোকৰাঝাৰৰ সাংসদ নৱ শৰণীয়াই।
সাংসদগৰাকীয়ে বি টি এ ডি অঞ্চলত বাস কৰি থকা অবড়ো লোকসকলৰ সুৰক্ষা প্ৰদানৰ ক্ষেত্ৰতো পদক্ষেপ গ্ৰহণ কৰিবলৈ চৰকাৰক আহ্বান জনায়।
গুৱাহাটী প্ৰেছ ক্লাবত সংবাদমেল সম্বোধন কৰি সাংসদ শৰণীয়াই ২০০৩ চনত হোৱা বিটিচি চুক্তিৰ পিছত তাত থকা বহুলোকৰ অধিকাৰ খৰ্ব হৈছিল বুলি মন্তব্য কৰে।
স্বাক্ষৰিত চুক্তি অনুসৰি বি টি চিত হ’বলগীয়া ভোটাৰ তালিকা সংশোধনৰ বিৰোধিতা কৰি সাংসদগৰাকীয়ে ২০১৯ৰ লোকসভা নিৰ্বাচনৰ সময়ৰ ভোটাৰ তালিকাকে কাৰ্যকৰী ৰখাৰ দাবী তোলে।
কোনো লোককে এই চুক্তিৰ বাবে হতাশ নোহোৱাৰ বাবে আহ্বান জনাই শৰণীয়াই কয়, ‘এইবোৰ কথা হ’বলৈ গৈ আছিল বুলি কংগ্ৰেছে আগৰে পৰা জানিছিল’।
চুক্তি সন্দৰ্ভত গুৰুত্বপূৰ্ণ মন্তব্য কৰি তেওঁ লগতে কয়, ‘চুক্তি কৰক কিন্তু নৃশংস ঘটনাৰে জড়িতসকলক আইনমতে যাবলৈ দিব লাগে’।
তেওঁ লগতে হাগ্ৰামা মহিলাৰীক তীব্ৰ সমালোচনা কৰি তেওঁক এগৰাকী বিগ জ’কাৰ বুলি মন্তব্য কৰে।
কেন্দ্ৰীয় চৰকাৰে কোৱাৰ দৰে যদি আজি সম্পাদিত চুক্তিৰ ফলত বড়োসকলৰ উগ্ৰপন্থী সমস্যা চিৰদিনৰ বাবে বন্ধ হৈ যায় তেন্তে সেইটো আমাৰ বাবে ভাল কথা বুলিও মন্তব্য কৰে শৰণীয়াই।
সাংসদ তথা নিষিদ্ধ ঘোষিত উগ্ৰপন্থী সংগঠন আলফাৰ প্ৰাক্তন নেতাগৰাকীয়ে চৰকাৰৰ এই কাৰ্য ভৱিষ্যত অসমৰ শান্তিৰ বাবে প্ৰয়োজনীয় নহয় বুলিও মন্তব্য কৰে।
উল্লেখ্য যে আজি নতুন দিল্লীত কেন্দ্ৰীয় গৃহ মন্ত্ৰী অমিত শ্বাহ, মুখ্য মন্ত্ৰী সৰ্বানন্দ সোণোৱাল, বিত্ত মন্ত্ৰী হিমন্ত বিশ্ব শৰ্মাৰ উপস্থিতিত বড়ো নেতৃত্বই স্বাক্ষৰ কৰে ঐতিহাসিক শান্তি চুক্তিত।
কেন্দ্ৰীয় গৃহ মন্ত্ৰ্যালয়ত স্বাক্ষৰিত চুক্তিখনত এন ডি এফ বিৰ আটাইকেইটা গোটৰ লগতে বি পি এফৰ মুৰব্বী প্ৰধান হাগ্ৰামা মহিলাৰী আৰু এবছুৰ সভাপতি প্ৰমোদ বড়োৱেও স্বাক্ষৰ কৰে।
