আজি পুৱাৰে পৰা আৰম্ভ হোৱা শ্ৰীমন্ত শংকৰদেৱ সংঘৰ ৮৯ সংখ্যক অধিৱেশন ভক্তৰ পদধ্বনি আৰু ভক্তিৰসত উদুলি-মুদুলি হৈ পৰিছে।
কাজিৰঙা সমন্বয় ক্ষেত্ৰ নামেৰে নামকৰণ কৰা বোকাখাত মহকুমাৰ কমাৰগাৱঁৰ দিহিঙীয়া মহুৰা পথাৰত উত্তৰ-পূৰ্বাঞ্চলৰ সৰ্ববৃহৎ আধ্যাত্মিক অনুষ্ঠানটোলৈ ৰাজ্যৰ বিভিন্ন স্থানৰ পৰা ভকত-ভকতনী আৰু অনুৰাগীৰ সোঁত বৈছে।
অধিৱেশনৰ বাবে আটক ধুনীয়াকৈ সজাই-পৰাই তোলা হৈছে বৈষ্ণৱ পণ্ডিত সোণাৰাম চুতীয়া সোঁৱৰণী মূল মণ্ডপ আৰু প্ৰতিনিধি শিবিৰ৷
একেলগে ১০ হাজাৰ লোকে আহাৰ গ্ৰহণ কৰিব পৰাকৈ নিৰ্মাণ কৰা হৈছে ভোজনালয়৷
আয়োজকে জানিবলৈ দিয়া মতে, ১৮শ বিঘা মাটিত প্ৰসাৰিত অধিৱেশনথলীত নিৰ্মাণ কৰা হৈছে ৫৪৮খন গ্রন্থ বিপণি আৰু ৩৬০ খন বহিঃবাণিজ্যৰ বিপণি।
আজি পুৱাতেই প্ৰথম দিনৰ কাৰ্য্যসূচী আৰম্ভ হয় পৰিৱেশ নিকাকৰণ, প্ৰাতঃপ্ৰসংগ, বৃক্ষৰোপণ আৰু নাম প্ৰসংগৰে।
পৰমানন্দ আতৈ সোঁৱৰণী মূল তোৰণৰ লগতে অধিৱেশনৰ বাবে নিৰ্মাণ কৰা সকলো তোৰণ উন্মোচন কৰা হয়৷
আদৰণী সমিতিৰ কাৰ্যালয়ৰ দ্বাৰ উন্মোচন কৰে বোকাখাতৰ প্ৰাক্তন বিধায়ক অৰুণ ফুকনে৷ মূল কাৰ্য্যালয় আৰু আৰু ৰেমাকান্ত মৰাং সোঁৱৰণী গ্ৰন্থমেলা আৰু প্ৰদৰ্শনীৰ দ্বাৰ মুকলি কৰে ক্ৰমে ৰাজহ চক্ৰ বিষয়া খনীন দাস আৰু জেষ্ঠ সাংবাদিক ভৱেশ শইকীয়াই৷
বৈষ্ণৱ পণ্ডিত সোণাৰাম চুতীয়া সোঁৱৰণী মূল মণ্ডপ আৰু মুক্তিযোদ্ধা বেণুৰাম বৰুৱা সোঁৱৰণী মূল মঞ্চ উন্মোচন কৰে গোলাঘাটৰ উপায়ুক্ত বিভাষ মোদীয়ে৷
অধিৱেশনৰ স্মৃতিগ্ৰন্থ “দয়ানিধি” উন্মোচন কৰে শ্ৰীমন্ত শংকৰদেৱ বিশ্ববিদ্যালয় উপাচাৰ্য্য ড০ কন্দৰ্প দাসে ৷
আনহাতে বোকাখাতৰ পৰা প্ৰকাশিত জিতু শৰ্মা ৰাজখোৱাৰ দ্বাৰা সম্পাদিত ৰাইজৰ খৱৰৰ বিশেষ সংখ্যাও আনুষ্ঠানিকভাৱে উন্মোচন কৰে অধিবেশনৰ মুখ্য সমন্বয়ক পবিত্ৰ প্ৰাণ বৰাই ৷
আদৰণী সমিতিয়ে জানিবলৈ দিয়া মতে, অধিৱেশনৰ মুঠ বাজেট ২ কোটি ৮০ লাখ টকা। পুঁজিৰ ক্ষেত্ৰত আদৰণী সমিতি প্ৰাৰম্ভিকতে কিছু পৰিমাণে সংকটেত পৰিছিল যদিও শেষত চৰকাৰৰ পৰা সকলো ধৰণৰ সহযোগিতা লাভ কৰা বুলি জনায়।