বলীউডৰ অন্যতম জনপ্ৰিয় অভিনেত্ৰী মমতা কুলকাৰ্ণী পুনৰ বাতৰিৰ শিৰোনামত। শেহতীয়াকৈ তেওঁ বলীউডৰ পৰা অৱসৰ লোৱাৰ কথা ঘোষণা কৰে আৰু প্ৰয়াগৰাজত অনুষ্ঠিত মহা কুম্ভত ২০২৫ত সন্ন্যাস গ্ৰহণ কৰিছে। নব্বৈৰ দশকৰ অন্যতম সফল অভিনেত্ৰী আছিল মমতা কুলকাৰ্ণী। তেওঁ কেইবাখনো ব্লকবাষ্টাৰ চিনেমাত অভিনয় কৰিছে। কিন্তু এতিয়া তেওঁৰ জীৱনে সম্পূৰ্ণ নতুন ৰূপ ল’বলৈ ওলাইছে।
মমতা কুলকাৰ্ণীয়ে মহা কুম্ভ ২০২৫ত অংশগ্ৰহণ কৰি সন্ন্যাস দীক্ষা গ্ৰহণ কৰি নতুন জীৱনৰ আৰম্ভণি কৰে। তেওঁ কয়, “যেতিয়ালৈকে মই বলীউডত কাম কৰিছো, তেতিয়ালৈকে মই সফল হৈছিলো।কিন্তু এতিয়া মই মোৰ আধ্যাত্মিকতা আৰু আত্ম-অন্বেষণৰ ওপৰত গুৰুত্ব দিছো।” মমতাৰ অৱসৰৰ পিছত তেওঁ “মাই মাতা নন্দ গিৰি” নামেৰে পৰিচিত হৈছে। শুকুৰবাৰে সন্ধিয়া অভিনেত্ৰীগৰাকীৰ দীক্ষা অভিষেক অনুষ্ঠিত হয় ।
এসময়ত বলীউডৰ শীৰ্ষ অভিনেত্ৰী আছিল মমতা কুলকাৰ্ণী। এশখনতকৈও অধিক ছবিত গুৰুত্বপূৰ্ণ ভূমিকাত অভিনয় কৰিছে। তেওঁৰ কেইখনমান উল্লেখযোগ্য চিনেমা হৈছে “চুপাৰ ৰুষ্টম”, “কৰণ অৰ্জুন”, “চাইনা গেট”, “কিলা” আৰু “জানে জিগাৰ”।
কিন্তু ২০০০ চনৰ পৰা মমতাই আধ্যাত্মিক জীৱনক অগ্ৰাধিকাৰ দিবলৈ আৰম্ভ কৰে। মমতাৰ মতে, “মই আধ্যাত্মিকতাৰ প্ৰতি অনুপ্ৰাণিত আছিলো আৰু ১৯৯৬ চনত গুৰু গগন গিৰি মহাৰাজক লগ কৰো, তেতিয়াৰ পৰাই মোৰ আধ্যাত্মিক যাত্ৰা আৰম্ভ হৈছিল।”
মমতা কুলকাৰ্ণীৰ জীৱনত আধ্যাত্মিকতাৰ গুৰুত্ব বহুদিনৰ আগৰ পৰাই আছিল। বলীউডত তেওঁৰ কেৰিয়াৰ সফল হৈছিল যদিও ব্যক্তিগত জীৱনত নতুন দিশ বিচাৰি পালে। মমতাই বহুদিন ডুবাইত বাস কৰিছিল, য’ত তেওঁ একেবাৰে তপস্বী জীৱন কটায়। ১২ বছৰ ধৰি তেওঁ ব্ৰক্ষ্মচাৰী আছিল আৰু অতি কঠোৰ জীৱন যাপন কৰিছিল।
