কৰ’নাত আক্ৰান্ত এছিয়ান গেমছৰ স্বৰ্ণপদক বিজয়ী বক্সাৰ সৰিতা দেৱী
এছিয়ান গেমছত স্বর্ণ পদক বিজয়ী ভাৰতীয় বক্সাৰ মণিপুৰৰ সৰিতা দেৱী কৰ’না ভাইৰাছৰ দ্বাৰা আক্ৰান্ত হৈছে।
সোমবাৰে খেলুৱৈগৰাকীয়ে নিজেই কৰ’না পজিটিভ হোৱাৰ খৱৰ দিয়ে।
জানিব পৰা মতে, বিগত তিনিদিন ধৰি তেওঁ জ্বৰত ভূগিছিল আৰু শৰীৰত বিষ অনুভৱ কৰিছিল।
ইয়াৰ পাছতে সৰিতাই কৰ’না টেষ্ট কৰায় আৰু পৰীক্ষাত তেওঁৰ দেহত কৰ’না ভাইৰাছৰ উপস্থিতি ধৰা পৰে।
আনহাতে, সৰিতাৰ স্বামীৰ শৰীৰতো কৰ’না পজিটিভ ধৰা পৰে। অৱশ্যে, তেওঁলোকৰ সন্তানৰ ৰিপ’ৰ্ট নিগেটিভ পোৱা যায়।
বৰ্তমান সৰিতা দেৱী আৰু তেওঁৰ স্বামী থৈবা সিং ইম্ফলৰ এটা কোভিড কেয়াৰ চেন্টাৰত চিকিৎসাধীন হৈছে।
উল্লেখ্য যে ইয়াৰ পূৰ্বে আন এগৰাকী ভাৰতীয় বক্সাৰ মণিপুৰৰ ডিংকো সিঙো কৰ’নাত আক্ৰান্ত হৈছিল। বৰ্তমান তেওঁ সুস্থ হৈ উঠিছে।
ইপিনে, কৰ’নাত আক্ৰান্ত ভাৰতীয় হকী দলৰ ছয়গৰাকী খেলুৱৈ বৰ্তমান সুস্থ হৈ উঠিছে।
স্প’ৰ্টছ অথৰিটি অফ ইণ্ডিয়াৰ ফালৰ পৰা জানিবলৈ দিয়া মতে সোমবাৰে পুৱাই ভাৰতীয় হকী দলৰ অধিনায়ক মনপ্ৰীত সিঙকে ধৰি ছয়গৰাকী খেলুৱৈক বেংগালুৰুৰ হাস্পাতলৰ পৰা যাবলৈ দিয়া হৈছে।