দুই কিশোৰ-কিশোৰীক নৃশংস হত্যা: বিদ্যালয়লৈ যোৱাৰ পথতে পেলাই থোৱা হ’ল শিৰচ্ছেদ কৰা মৃতদেহ
মধ্যপ্ৰদেশৰ পান্না জিলাত সোমবাৰে সংঘটিত হয় এক নৃশংস হত্যাকাণ্ড। এগৰাকী কিশোৰ আৰু এগৰাকী কিশোৰীক তীক্ষ্ণ অস্ত্ৰৰে ডিঙি কাটি নৃশংসভাৱে হত্যা কৰা হৈছে জিলাখনত।
এগৰাকী আৰক্ষী বিষয়াই সংবাদ মাধ্যমৰ আগত উল্লেখ কৰা মতে, সোমবাৰে বিদ্যালয়লৈ যোৱা পথত ১৮ বৰ্ষীয় কিশোৰগৰাকী আৰু ১৬ বছৰীয়া কিশোৰীগৰাকীৰ মৃতদেহ উদ্ধাৰ হয়।
মৃত কিশোৰীগৰাকীয়ে অধ্যয়ন কৰা বিদ্যালয়খনলৈ যোৱাৰ পথতে দুয়োৰে মৃতদেহ উদ্ধাৰ হয়। স্থানীয় লোকে মৃতদেহ দুটা দেখা পোৱাৰ পিছত আৰক্ষীক খবৰ দিয়ে আৰু খবৰ লাভৰ পিছতে স্থানীয় আৰক্ষীৰ এটা দল ঘটনাস্থলীত উপস্থিত হয়।
কিশোৰ-কিশোৰীহালৰ হত্যাৰ কাৰণ উদ্ধাৰৰ বাবে আৰক্ষীয়ে মৃত ছাত্ৰকেইগৰাকীৰ পৰিয়াল আৰু স্থানীয় গাওঁবাসীক সোধা-পোছা কৰিছে বুলি জিলাখনৰ আৰক্ষী অধীক্ষক গৰাকীয়ে জানিবলৈ দিয়ে।
আনহাতে প্ৰাৰম্ভিক অনুসন্ধানৰ পিছত দুয়োৰে ডিঙিত তীক্ষ্ণ অস্ত্ৰৰে আঘাতৰ স্পষ্ট প্ৰমাণ পোৱা গৈছে বুলি আৰক্ষী বিষয়াগৰাকীয়ে জানিবলৈ দিয়ে।
মৃতদেহ দুটাৰ মৰণোত্তৰ পৰীক্ষাৰ প্ৰতিবেদনত হত্যাৰ প্ৰমাণ নিশ্চিত হোৱাৰ লগতে ঘটনাস্থলীৰ পৰা অন্যান্য ফৰেনচিক প্ৰমাণ সংগ্ৰহ কৰা হৈছে বুলিও তেওঁ জানিবলৈ দিয়ে।
আৰক্ষীয়ে জানিবলৈ দিয়া মতে, মৃত কিশোৰ-কিশোৰীহাল ওচৰ চুবুৰীয়া আছিল। দুয়োগৰাকী ‘অনাৰ কিলিঙ’ৰে বলি হোৱা বুলি আৰক্ষীয়ে সন্দেহ কৰিছে যদিও এতিয়ালৈকে এই সন্দৰ্ভত কোনো স্পষ্ট প্ৰমাণ পোৱা নাই।
অৱশ্যে ত্ৰিকোণীয়া প্ৰেমৰ বাবেও এই হত্যাকাণ্ড সংঘটিত হোৱাৰো আশংকা প্ৰকাশ কৰিছে আৰক্ষীয়ে। অৱশ্যে হত্যাৰ প্ৰকৃত কাৰণ উদ্ঘাটনৰ বাবে আৰক্ষীয়ে তদন্ত অব্যাহত ৰাখিছে বুলি আৰক্ষী অধীক্ষকগৰাকীয়ে অৱগত কৰে।