মহাব্যাধি ক’ৰ’ণাই বিশ্বত বহুতৰে প্ৰাণ কাঢ়ি নিছে।
বহুতে হেৰুৱাইছে নিজৰ পিতৃ, মাতৃ,ভাতৃ,ভগ্নী আৰু আন বহু আত্মীয় স্বজনক।
আমেৰিকাৰ ছান আণ্টোনিওৰ বাসিন্দা ৰাইডেন গঞ্জালেছে তেওঁৰ পিতৃ-মাতৃক হেৰুৱাইছে ক’ৰ’ণাতে। মাত্ৰ ১০০ দিনৰ ব্যৱধানত পিতৃ-মাতৃক হেৰুওৱা গঞ্জালেছৰ নিজৰ বুলি কবলৈ এতিয়া আৰু কোনো নাই।
৫ বছৰীয়া শিশুটিৰ আলাই আথানি দেখি দূৰ সম্পৰ্কীয় লোক এজনে গঞ্জালেছক তেওঁলোকৰ ঘৰলৈ লৈ গৈছিল।
অনাথ শিশুটিৰ জন্মদিন প্ৰতিবছৰে পিতৃ-মাতৃয়ে ধুমধামেৰে পাতিছিল।
কিন্তু এইবাৰ গঞ্জালেছৰ জন্মদিন পাতিবলৈ তেওঁৰ কাষত নাই পিতৃ আদান আৰু মাতৃ মাৰিয়ান।
পিছে গঞ্জালেছক তেওঁৰ জন্মদিনটোত নিৰাশ কৰিব নিবিচাৰিলে ছান আণ্টোনিওৰ বাসিন্দাসকলে।
কণমানি গঞ্জালেছৰ জন্মদিনটো ছান আণ্টোনিওৰ বাসিন্দাসকলে অলপ ব্যতিক্ৰমী ৰূপত উদযাপন কৰাৰ সিদ্ধান্ত ল’লে।
সেইমৰ্মে চাহৰ খনৰ বাসিন্দাসকলে গঞ্জালেছৰ জন্মদিনটোত উলিয়ালে এক বিশাল সমদল।সমদলৰ আগত স্থানীয় লোক এজনৰ কোলাত উঠি গ’ল গঞ্জালেছ।
সমদলত গঞ্জালেছক মনোৰঞ্জন দিবলৈ কোনোৱাই সাজিলে স্পাইডাৰমেন,কোনোৱাই চুপাৰমেন আৰু যে কত’ কি।গঞ্জালেছৰ জল্মদিনৰ সমদলত কেৱল যে ছান আণ্টোনিও চহৰৰ বাসিন্দাসকলেই ভাগ ল’লে তেনে নহয়।
এই সমদলত ভাগ ল’লে চহৰ খনৰ আৰক্ষীৰ লগতে অগ্নিনিৰ্বাপক বাহিনীৰ কৰ্মীসকলেও।চহৰৰ বাসিন্দাসকলেই মিলিজুলি কৰিলে খোৱা-বোৱাৰ আয়োজন।
মুঠৰ ওপৰত ক’ৰ’ণাই অনাথ কৰা গঞ্জালেছক চহৰৰ বাসিন্দাসকলে মুঠেও অনুভৱ কৰিবলৈ নিদিলে তেওঁৰ পিতৃ-মাতৃ নথকাৰ কথা।
সঁচাকৈয়ে ইয়াকে কয় মানৱতা।
