এটি কণমানি ল’ৰাক যৌন নিৰ্যাতন চলাই অৱশেষত আৰক্ষীৰ জালত পৰিল এজন ব্ৰিটিছ নাগৰিক।
গ্ৰেপ্তাৰ হোৱা ব্ৰিটিছ নাগৰিক জনৰ নাম জন পেট্ৰিক ব্ৰীজ। লোকজনে দীৰ্ঘ দিন ধৰি ওড়িশাৰ জাৰছুগুডা জিলাৰ কক্স ক’ল’নীত এটা অনাথ গৃহ চলাই আছিল।
৬৮ বছৰীয়া লোক জনে ওড়িশাৰ বিভিন্ন প্ৰান্তৰ পৰা দুৰ্গত শিশু সকলক তেওঁৰ অনাথ গৃহলৈ আনি থকা-খোৱাৰ সুবিধা দিয়াৰ লগতে বিদ্যালয়ত পঢ়ুওৱাৰ দায়িত্বও লৈছিল।
লোকজনে শেহতীয়াকৈ অনাথ গৃহৰ এটি নাবালকক যৌন নিৰ্যাতন চলোৱা বুলি অভিযোগ উঠাৰ পিছতে ওড়িশা আৰক্ষীয়ে আজি ব্ৰিটিছ লোক জনক গ্ৰেপ্তোৰ কৰে।
আৰক্ষীৰ আগত লোকজনে তেওঁৰ দোষ স্বীকাৰ কৰা বুলি জানিব পৰা গৈছে। লোকজনে ইয়াৰ পূৰ্বেও অনাথ গৃহটোৰ আন বহু শিশুক যৌন নিৰ্যাতন চলোৱাৰ কথা আজি বহু কেইটি শিশুৱে আৰক্ষীৰ আগত প্ৰকাশ কৰিছে।
নিউজিলেণ্ডৰ এটা স্বেচ্ছাসেৱী সংস্থাৰ হৈ ভাৰতত অনাথ গৃহ পৰিচালনা কৰি অহা লোক জনৰ বিৰুদ্ধে শেহতীয়াকৈ নিউজিলেণ্ডৰ সংস্থাটোৱে বিত্তীয় খেলি-মেলিৰ অভিযোগ দাখিল কৰিছে।
সেই অভিযোগৰ ভিত্তিতো আৰক্ষীয়ে ব্ৰিটিছ নাগৰিক জন পেট্ৰিক ব্ৰীজৰ বিৰুদ্ধে আন এটা গোচৰ ৰুজু কৰিছে।