২২ ডিচেম্বৰৰ পৰা গুৱাহাটীত চলি থকা দেশৰ সীমান্ত সুৰক্ষা বাহিনী আৰু বৰ্ডাৰ গাৰ্ড বাংলাদেশৰ ৫১ সংখ্যক সঞ্চালকপ্ৰধান পৰ্যায়ৰ সীমান্ত সমন্বয়ৰক্ষী সন্মিলনত অংশগ্ৰহণ কৰা দুয়োটা বাহিনীৰ প্ৰতিনিধিসকলক গোলাঘাট জিলাৰ কহৰাৰ আৰক্ষী অতিথিশালাত আয়োজিত এক অনুষ্ঠানত মত বিনিময় অনুষ্ঠানত অসম চৰকাৰৰ হৈ অসম আৰক্ষীয়ে আদৰণি জনায়।
উল্লেখযোগ্য যে, ২৬ ডিচেম্বৰত এই সন্মিলনৰ সামৰণি পৰিব আৰু প্ৰথমবাৰৰ বাবে দিল্লীৰ বাহিৰত এই সন্মিলন অনুষ্ঠিত হৈছে।
অনুষ্ঠানত অংশগ্ৰহণ কৰি অসমৰ মুখ্য সচিৱ জিষ্ণু বৰুৱাই ভাৰত আৰু বাংলাদেশ দুয়োখন দেশৰ ঐতিহাসিক আৰু সাংস্কৃতিক সাদৃশ্যৰ বিষয়ে উল্লেখ কৰি দুয়োখন দেশ আৰু দুয়োখন দেশৰ বাহিনীসমূহৰ মাজত পাৰস্পৰিক সহযোগিতা বৃদ্ধিত গুৰুত্ব আৰোপ কৰে।
মত বিনিময় অনুষ্ঠানত দুয়োটা বাহিনীৰ প্ৰতিনিধিসকলক আদৰণি জনাই অসম আৰক্ষী সঞ্চালকপ্ৰধান ভাস্কৰজ্যোতি মহন্তই এনে অনুষ্ঠানৰ প্ৰয়োজনীয়তাৰ কথা উল্লেখ কৰি ইয়াৰ জৰিয়তে ভাৰত আৰু বাংলাদেশৰ আন্তঃৰাষ্ট্ৰীয় সীমান্তত উদ্ভৱ হোৱা সমস্যাসমূহৰ সমাধানৰ পথ সুগম হ’ব বুলি আশা প্ৰকাশ কৰে।
অনুষ্ঠানত অংশগ্ৰহণ কৰি বৰ্ডাৰ গাৰ্ড বাংলাদেশৰ সঞ্চালকপ্ৰধান মেজৰ জেনেৰেল মঃ চাফিনুল ইছলামে আনুষ্ঠানিকভাৱে এই মত বিনিময় অনুষ্ঠান আয়োজন কৰাৰ বাবে অসম চৰকাৰক ধন্যবাদ জ্ঞাপন কৰি আন্তঃৰাষ্ট্ৰীয় সীমান্তৰ সমস্যাবোৰ সমাধানৰ ক্ষেত্ৰত দুয়োখন দেশৰ মাজত পাৰস্পাৰিক সহযোগিতা বৃদ্ধিত গুৰুত্ব আৰোপ কৰে।
