সীমান্ত সুৰক্ষা বাহিনী (বিএছএফ)ৰ এগৰাকী বিষয়া মুজিবুৰ ৰহমানক যোৰহাটৰ বিদেশী ন্যায়াধীকৰণে বিদেশী বুলি ঘোষণা কৰিছে।
ৰহমানৰ পত্নীকো বিদেশী ঘোষণা কৰা হৈছে। কিন্তু কৰ্তৃপক্ষই তেওঁৰ পিতৃ-মাতৃ তথা তেওঁৰ ভাতৃ-ভগ্নীৰ ভাৰতীয় নাগৰিকত্বত কোনো সন্দেহ কৰা নাই।
ৰহমান অসম-নাগালেণ্ড সীমান্তৰ গোলাঘাট জিলাৰ মেৰাপানীৰ উদইপুৰ-মিকিৰপট্টিৰ মূল বাসিন্দা।
বৰ্তমান পঞ্জাৱত কৰ্মৰত ৰহমানে ছুটীত ঘৰলৈ অহাৰ সময়তে তেওঁ ৰায়টোৰ বিষয়ে জানিব পাৰিছিল।
‘’মই এগৰাকী প্ৰকৃত ভাৰতীয় নাগৰিক কিন্তু এগৰাকী মদাহীৰ ভাষ্যৰ ভিত্তিত মোক বিদেশী ঘোষণা কৰা হৈছে,’’-সংবাদ মাধ্যমৰ আগত ৰহমানে কয়।
‘’মই আঁতৰত আছিলো আৰু মোৰ পৰিয়ালে ন্যায়াধীকৰণৰ জাননী পোৱা নাছিল। আমাৰ গাঁৱৰ গাওঁবুঢ়ায়ো মোক জনোৱা নাছিল,’’-ৰহমানে লগতে কয়।
‘’অলপতে মই যেতিয়া ছুটীত ঘৰলৈ আহো, মই জানিব পাৰো যে ন্যায়াধীকৰণে মোক বিদেশী বুলি ঘোষণা কৰিছে,’’-তেওঁ কয়।
‘’সীমান্ত আৰক্ষীয়ে এজগৰাকী মদাহীৰ কথাৰ ভিত্তিত মোৰ বিৰুদ্ধে বিদেশী ন্যায়াধীকৰণত এক প্ৰতিবেদন দাখিল কৰিছিল,’’-ৰহমানে অভিযোগ কৰি কয়।
ৰহমানে লগতে জানিব দিয়ে যে তেওঁ ইতিমধ্যে এই সন্দৰ্ভত গুৱাহাটী উচ্চ ন্যায়ালয়ৰ দ্বাৰস্থ হৈছে।
‘’অবৈধ অনুপ্ৰৱেশকাৰীৰ বিৰুদ্ধে যিকোনো ব্যৱস্থা গ্ৰহণত মই সমৰ্থন কৰো, কিন্তু মই প্ৰকৃত ভাৰতীয় নাগৰিক হাৰাশাস্তি হোৱাটো নিবিচাৰো। আমাৰ ১৯২৩ চনৰে ভূমিৰ নথি আছে,’’-ৰহমানে কয়।
বিদেশী ন্যায়াধীকৰণে সেনা বা বিএছএফৰ কোনো বিষয়াক বিদেশী বুলি চিনাক্ত কৰা এইয়াই প্ৰথম ঘটনা নহয়।
সেনাৰ অৱসৰপ্ৰাপ্ত কেপ্টেইন মহম্মদ ছানাউল্লাহকো চলিত বৰ্ষৰ যোৱা ২৮ মে’ত বিদেশী বুলি ঘোষণা কৰা হৈছিল আৰু গোৱালপাৰাৰ ডিটেনশ্যন কেম্পলৈ প্ৰেৰণ কৰা হৈছিল।
গুৱাহাটী উচ্চ ন্যায়ালয়ে পাছত ছানাউল্লাহৰ জামিন মঞ্জুৰ কৰে।
