সীমান্ত সুৰক্ষা বাহিনী চমুকৈ বি এছ এফৰ অভিযানত পুনৰ জব্দ হ’ল বৃহৎ পৰিমাণৰ ভাং। বি এছ এফৰ দলটোৱে ত্ৰিপুৰাৰ ধলাই জিলাৰ আম্বাছাত অভিযান চলাই এখন ট্ৰাকৰ পৰা বৃহৎ পৰিমাণৰ ভাঙৰ লগতে এই ঘটনাৰ লগত জড়িত তিনিজন লোকক আটক কৰিবলৈ সক্ষম হয়।
জব্দকৃত ভাঙখিনিৰ ওজন প্ৰায় ৯৫৭ কিলোগ্ৰাম আৰু ইয়াৰ বজাৰ মূল্য ৪৮ লাখ ৫০ হেজাৰ হ’ব বুলি বি এছ এফৰ অভিযানকাৰী দলটোৱে জানিবলৈ দিয়ে।
উল্লেখ্য যে HR-38-U-5420 নম্বৰৰ ট্ৰাকখনত অবৈধভাৱে ভাঙখিনি সৰবৰাহ কৰা বুলি বি এছ এফৰ দলটোৱে গোপন সূত্ৰৰ পৰা জানিবলৈ পোৱাত লগে লগে অভিযান চলাই আগৰতলাৰ পৰা গুৱাহাটী অভিমুখে আহি থকা অৱস্থাত ৮ নং ৰাষ্ট্ৰীয় ঘাইপথৰ পৰা ট্ৰাকখন জব্দ কৰে।
ট্ৰাকখন বি এছ এফৰ দলটোৱে জব্দ কৰাৰ পাছত স্থানীয় আৰক্ষী আৰু ৰাইজৰ সহযোগত অনুসন্ধান চলোৱাত ট্ৰাকখনৰ পৰা উক্ত বৃহৎ পৰিমাণৰ ভাঙখিনি জব্দ কৰিবলৈ সক্ষম হয়।
আনহাতে আটকাধীন সৰবৰাহকাৰী কেইজনক আৰিফ খান, মহম্মদ তৌকিন আৰু ৰঞ্জিত দেববৰ্মা বুলি চিনাক্ত কৰিছে। ইয়াৰে আৰিফ খান আৰু মহম্মদ তৌকিনৰ ঘৰ হাৰিয়ানা আৰু দেববৰ্মাৰ ঘৰ পশ্চিম ত্ৰিপুৰাত বুলি জানিবলৈ দিয়ে।
