বিটিচি পৰিষদীয় নিৰ্বাচনলৈ যিমানেই দিন চমু চাপি আহিছে সিমানেই আকৰ্ষণীয় আৰু উত্তপ্ত হৈ পৰিছে বিটিচিৰ ৰাজনৈতিক বতাহ। এটা ৰাজনৈতিক দলে আন এটা ৰাজনৈতিক দলক সভা-সমিতিৰ জৰিয়তে সমালোচনাৰে ভোটাৰ ৰাইজক আকৃষ্ট কৰিবলৈ চেষ্টা কৰি আহিছে।
শনিবাৰে বাক্সা জিলাৰ ২৯ নং শুক্লাই চেৰফাং বিটিচি পৰিষদীয় সমষ্টিৰ অন্তৰ্গত নাওকাটাত এখন বিশাল নিৰ্বাচনী সভা অনুষ্ঠিত কৰি নিজৰ শক্তি প্ৰদৰ্শন কৰে বিপিএফ দলে।
শুক্লাই চেৰফাং পৰিষদীয় সমষ্টিৰ বিপিএফ দলৰ পৰা প্ৰক্ষেপিত প্ৰাৰ্থী বিটিচিৰ প্ৰাক্তন কাৰ্যবাহী সদস্য তথা এম চি এল এ গণেশ কছাৰীৰ সমৰ্থনত শুক্লাই চেৰফাং ব্লক বিপিএফৰ সভাপতি জিনাৰাম বড়োৰ সভাপতিত্বত অনুষ্ঠিত হোৱা সভাত মুখ্য অতিথিৰূপে উপস্থিত থাকি ৰাজ্যসভাৰ সাংসদ বিশ্বজিৎ দৈমাৰীয়ে এবছুৰ সদ্য প্ৰাক্তন সভাপতি তথা য়ু পি পি এলৰ সভাপতি প্ৰমোদ বড়ো আৰু আৰু ৫ নং কোকৰাঝাৰ লোকসভা সভা সমষ্টিৰ সাংসদ নৱ কুমাৰ (হীৰা) শৰণীয়াক তীব্ৰ ভাষাৰে সমালোচনা কৰে।
সাংসদ গৰাকীয়ে লগতে কয়, “নিৰ্বাচনে আমাৰ ভৱিষ্যতৰ ভাল-বেয়া, উন্নতি আদিৰ দিশবোৰ নিৰ্ধাৰণ কৰে। সেয়ে ৰাইজে নিজৰ বহুমূলীয়া ভোটদানৰ ক্ষেত্ৰত সচেতন হোৱা প্ৰয়োজন। এই নিৰ্বাচনৰ জৰিয়তে এজন উপযুক্ত জনপ্ৰতিনিধি নিৰ্বাচন কৰি একোটা অঞ্চলৰ উন্নয়ন, শান্তি-প্ৰগতি, বিভিন্ন কল্যাণমূলক আঁচনিৰ বুনিয়াদ সৃষ্টি কৰা হয়। প্ৰাৰ্থী নিৰ্বাচনৰ ক্ষেত্ৰত ৰাইজে এবাৰ ভুল কৰিলে পিছত অনুশোচনা কৰি লাভ নাই”।
ভাষণ প্ৰসংগত দৈমাৰীয়ে প্ৰমোদ বড়োৰ প্ৰসংগ উত্থাপন কৰি এবছুৰ সভাপতিৰ দৰে পদত থকাৰ পিছতো শান্তি চুক্তিত সাক্ষৰ কৰি য়ুপিপিএলৰ দৰে ৰাজনৈতিক দলত যোগদান কৰি এবছুক ধ্বংস কৰা বুলি কটাক্ষ কৰি সদায় বড়ো বড়ো বুলি চিঞৰি ৰাজভোগ দখল কৰিবলৈ ওলোৱাটো দুৰ্ভাগ্যজনক বুলি আখ্যা দিয়ে।
প্ৰমোদ বড়োও এতিয়া আন ৰাজনৈতিক দলৰ নেতাৰ দৰে হৈ পৰিল বুলি কৈ তেওঁৰ কথাত ৰাইজক বিভ্ৰান্ত নহ’বলৈ আহ্বান জনায়।
আনহাতে কোকৰাঝাৰৰ সাংসদ নব কুমাৰ শৰণীয়াই বড়ো আৰু অনাবড়োৰ নামত ৰাজনীতি কৰি নিজৰ ৰাজনৈতিক উদ্দেশ্য সিদ্ধি কৰি ৰাইজক অশান্তিৰ বাদে একো দিব পৰা নাই বুলি উল্লেখ কৰি নব কুমাৰ শৰণীয়া নেতৃত্বাধীন গণ সুৰক্ষা দল গঠন কৰিলেও ৰাইজক একো সুৰক্ষা দিৱ নোৱাৰিব বুলি তাৎপৰ্যপূৰ্ণ মন্তব্য কৰে।
নব শৰণীয়াই কোনো জাতিৰ বাবে উন্নয়নৰ একো কাম কৰিবলৈ সক্ষম হোৱা নাই যদিও বড়ো-অনাবড়ো ৰাইজৰ মাজত সংঘাত অনাৰ ক্ষেত্ৰত ঠিকেই কাম কৰা বুলিও সাংসদ দৈমাৰীয়ে কটাক্ষ কৰে। লগতে নৱকুমাৰ শৰণীয়াই চিঞৰি অহা অনাবড়ো প্ৰকৃততে কোন বুলি তাৎপৰ্যপূৰ্ণ প্ৰশ্ন কৰি তেওঁক নিৰ্বাচনত উপেক্ষা কৰাৰ বাবে ৰাইজক আহ্বান জনায়।
শুক্লাই চেৰফাং ব্লক বিপিএফৰ সম্পাদক দিগন্ত বেজবৰুৱাই আঁত ধৰা বিশাল নিৰ্বাচনী প্ৰচাৰ সভাখনত উপস্থিত থাকি আন এগৰাকী বক্তা তথা বিটিচিৰ চিএমবিৰ সদস্য চাহাবুদ্দিন আহমেদে গোবিন্দ বসুমতাৰী, প্ৰমোদ বড়ো, নব কুমাৰ শৰণীয়াক সমালোচনা কৰি তেওঁ কয় যে হাগ্ৰামা মহিলাৰীৰ নেতৃত্বাধীন বিপিএফ দলৰ শাসন কালত বিটিচি অঞ্চলত বৈপ্লবিক উন্নয়ন সাধন হৈছে।
য়ুপিপিএলৰ সভাপতি প্ৰমোদ বড়োয়ে এবছুৰ নেতৃত্ব লৈ থাকোতে এন আৰ চিৰ সময়ত বাঙালী আৰু গোর্খা সম্প্ৰদায়ৰ লোক সকলৰ বিৰুদ্ধে মাত মাতিছিল বুলিও মন্তব্য কৰি আগন্তক নিৰ্বাচনত প্ৰমোদ বড়ো নেতৃত্বাধীন য়ুপিপিএলক প্ৰত্যাখ্যান কৰিবলৈ ৰাইজক আহ্বান জনায়।
যুৱ বিপিএফৰ কেন্দ্ৰীয় সমিতিৰ সাধাৰণ সম্পাদক সোমনাথ বসুমতাৰীয়ে সভাত ভাষণ ৰাখি কয় যে আগন্তুক বিটিচি নিৰ্বাচনত গণেশ কছাৰীক ৰাখিব পৰা শক্তি কাৰো নাই, তেওঁ অপ্ৰতিৰোধ্য।
তেওঁ পুনৰ কয় যে এনডিএফবি নেতাক জেলত ৰাখি বিটিচি চীফ হোৱাৰ প্ৰমোদ বড়োৰ যি সপোন সেয়া কেতিয়াও পূৰণ নহয়।
সভাত বাক্সা জিলা বিজেপিৰ সম্পাদক তথা বিগত পৰিষদীয় নিৰ্বাচনৰ প্ৰাৰ্থী বাসুদেৱ বসুমতাৰী, সুৱাগপুৰ শাখা গোৰ্খা ছাত্ৰ সন্থাৰ সভাপতি ইশ্বৰ ছেত্ৰী, দেওচুঙা প্ৰাইমাৰী এবছুৰ সভাপতি শান্তি বড়ো আদিকে ধৰি য়ুপিপিএল, বিজেপি, অবড়ো সুৰক্ষা সমিতি, আগছু, কংগ্ৰেছ, চিপিআই(এম), এবছু, প্ৰাক্তন এনডিএফবি সমন্বয়ৰক্ষী সমিতি আদিকে ধৰি বিভিন্ন ৰাজনৈতিক-অৰাজনৈতিক দল-সংগঠনৰ চাৰি শতাধিক সদস্যই আনুষ্ঠানিকভাৱে বিপিএফ দলত যোগদান কৰে।
সভাত তামুলপুৰ বিপিএফৰ ভাৰপ্ৰাপ্ত সভাপতি আদিত্য সিনহা, সম্পাদক উপেন বসুমতাৰী, যুব বিপিএফৰ সভাপতি মৃদুল ব্ৰহ্ম, সম্পাদক ৰুবুল আলী, এনডিএফবি(চাওৰাইগৌৰা) গোটৰ এৰিয়া কমাণ্ডাৰ বি দাহাল ঠুংগৰী, সহকাৰী কমাণ্ডাৰ বি বিফাং আদিকে ধৰি বিপিএফ দলৰ নেতা-কৰ্মী, মহিলা বিপিএফ নেত্ৰী সকল উপস্থিত থাকে।
ইপালে সভাত এনডিএফবি (চাওৰাইগৌৰা) ফৈদৰ একাংশ নেতা বিপিএফৰ নিৰ্বাচনী সভাত উপস্থিত থকা কাৰ্যই বিটিচিৰ ৰাজনীতিত বিশেষ তাৎপৰ্য বহন কৰিছে। আগন্তুক পৰিষদীয় নিৰ্বাচনৰ প্ৰতি লক্ষ্য ৰাখি জিনাৰাম বড়োক অধ্যক্ষ আৰু কৃষ্ণ সুবেদীক মুখ্য আহ্বায়ক হিচাপে লৈ ২৯ নং শুক্লাই চেৰফাং পৰিষদীয় সমষ্টিৰ নিৰ্বাচন পৰিচালনা সমিতিখনো গঠন কৰা হয়।