নেপালৰ ঝাপা জিলাৰ ভদ্ৰপুৰ বিমানবন্দৰত অৱতৰণৰ সময়তে এখন যাত্ৰীবাহী বিমান ৰাণৱেৰ পৰা পিছলি দুৰ্ঘটনাত পতিত হয়। শুকুৰবাৰে নিশা দুৰ্ঘটনাত পতিত এই বিমানখনত ক্ৰু সদস্যসহ মুঠ ৫৫ গৰাকী লোক আছিল।
কাঠমাণ্ডুৰ পৰা ভদ্ৰপুৰলৈ উৰা মৰা বুদ্ধ এয়াৰৰ (Buddha Air) ৯০১ নম্বৰৰ বিমানখনত ৫১ গৰাকী যাত্ৰী আৰু ৪ গৰাকী ক্ৰু সদস্য আছিল। সৌভাগ্যক্ৰমে, এই দুৰ্ঘটনাত কোনো লোক হতাহত হোৱা নাই। নেপাল আৰক্ষীয়ে জনোৱা মতে, অৱতৰণৰ সময়তে বিমানখন নিয়ন্ত্ৰণহীন হৈ ৰাণৱেৰ পৰা আঁতৰি যায়। আৰক্ষী তথা উদ্ধাৰকাৰী দলে ক্ষিপ্ৰতাৰে সকলো যাত্ৰী আৰু ক্ৰু সদস্যক নিৰাপদে উদ্ধাৰ কৰিবলৈ সক্ষম হয়।
নেপাল আৰক্ষীয়ে ছ’চিয়েল মিডিয়া প্লেটফৰ্ম ‘এক্স’ (X)-ত প্ৰকাশ কৰা অনুসৰি, “ভদ্ৰপুৰ বিমানবন্দৰত বুদ্ধ এয়াৰৰ বিমানখন দুৰ্ঘটনাত পতিত হৈছিল যদিও আৰক্ষী আৰু সংশ্লিষ্ট কৰ্তৃপক্ষই সকলো লোকক সুৰক্ষিতভাৱে উদ্ধাৰ কৰিছে।”
আনহাতে, বুদ্ধ এয়াৰে এক বিবৃতিত জনাইছে যে পৰিস্থিতিৰ বুজ ল’বলৈ কাঠমাণ্ডুৰ পৰা এটি কাৰিকৰী আৰু সাহায্যকাৰী দল ইতিমধ্যে ভদ্ৰপুৰলৈ প্ৰেৰণ কৰা হৈছে। উল্লেখযোগ্য যে, নিশা ৮:২৩ বজাত কাঠমাণ্ডুৰ পৰা যাত্ৰা আৰম্ভ কৰা বিমানখন পিছদিনা পুৱা পুনৰ কাঠমাণ্ডুলৈ উভতি যোৱাৰ কথা আছিল। বিমানখনৰ কাৰিকৰী মূল্যায়ন সম্পূৰ্ণ হোৱাৰ পিছতহে দুৰ্ঘটনাৰ প্ৰকৃত কাৰণ জানিব পৰা যাব।
বিগত কিছু বছৰত ধাৰাবাহিক বিমান দুৰ্ঘটনাৰ বাবে নেপালৰ বিমান সুৰক্ষাক লৈ বিশ্বজুৰি প্ৰশ্ন উত্থাপন হৈছে। ২০২৪ চনৰ জুলাই মাহত কাঠমাণ্ডুত শৌৰ্য এয়াৰলাইন্সৰ এখন বিমান দুৰ্ঘটনাগ্ৰস্ত হৈ ১৮ গৰাকী লোকৰ মৃত্যু হৈছিল। এনে পৰিপ্ৰেক্ষিতত শেহতীয়া এই ঘটনাই যাত্ৰীসকলৰ মাজত পুনৰ আতংকৰ সৃষ্টি কৰিছে।
