কাজিৰঙা ৰাষ্ট্ৰীয় উদ্যানৰ কহঁৰা, বাগৰি আৰু অগৰাতলি বনাঞ্চল বিশ্বৰ পৰ্যটকৰ বাবে আনুষ্ঠানিকভাৱে মুকলি কৰাৰ পিচত আজি ৰাষ্ট্ৰীয় উদ্যানখনৰ বুঢ়াপাহাৰ বনাঞ্চল আনুষ্ঠানিকভাৱে পৰ্যটকৰ বাবে মুকলি কৰা হয়৷
জল সম্পদ বিভাগৰ মন্ত্ৰী কেশৱ মহন্তই বন্তি জ্বলায় ফিটা কাটি পৰ্যটকৰ বাবে মুকলি কৰে বুঢ়াপাহাৰ বনাঞ্চল৷
এই উপলক্ষে কলিয়াবৰ মহকুমাৰ ঘোঁৰাকাটিত অৱস্থিত বুঢ়াপাহাৰ বনাঞ্চলৰ কাৰ্যালয়ৰ সমীপৰ প্ৰৱেশদ্বাৰত আয়োজিত অনুষ্ঠানত মন্ত্ৰী কেশৱ মহন্তৰ উপৰিও কলিয়াবৰ মহকুমাৰ মহকুমাধিপতি বিতোপন নেওঁগ, কাজিৰঙাৰ সঞ্চালক পি শিৱকুমাৰ, ডি এফ অ’ ৰমেশ কুমাৰ গগৈ, দ্বিতীয় বন সুৰক্ষা বাহিনীৰ অধিনায়ক মুকুল শইকীয়া, কলিয়াবৰৰ মহকুমাধিপতি মৃন্ময় দাস, বনাঞ্চলিক বিষয়া প্ৰদীপ গোস্বামী, অভিনেত্ৰী বৰদলৈৰ উপৰিও স্থানীয় পাৰিপাৰ্শ্বিক উন্নয়ন সমিতিৰ বিষয় ববীয়াৰ উপৰিও বন বিষয়া আৰু কৰ্মীও উপস্থিত থাকে৷
বুঢ়া পাহাৰ বনাঞ্চলৰ উপৰিও মন্ত্ৰী কেশৱ মহন্তই বুঢ়াপাহাৰৰ চিৰাং পাহাৰত পৰ্যটকৰ বাবে মুকলি কৰা ট্ৰেকিং পথ আৰু কাজিৰঙা ৰাষ্ট্ৰীয় উদ্যানৰ নতুন সংযোজন কুঠৰীৰ বান্দৰডুবি অঞ্চলৰ পৰ্যটন পথো আনুষ্ঠানিকভাৱে মুকলি কৰে৷
উদ্বোধনীৰ পিচত দিয়া ভাষণত কেশৱ মহন্তই বুঢ়াপাহাৰ, চিৰাং পাহাৰৰ ট্ৰেকিং আৰু বান্দৰডুবি অঞ্চলৰ পৰ্যটনে অঞ্চলতোৰ জনসাধাৰণ আৰ্থ সামাজিক উন্নয়নত সহায় কৰিব বুলি জনায়৷ ইয়াৰ লগতে কাজিৰঙাৰ কাঞ্চনজুৰিৰ প্ৰৱেশ দ্বাৰ আৰু পৰ্যটকক চাইকেল চলোৱাৰ বাবে সুবিধা প্ৰদান কৰিবৰ বাবেও তেওঁ আহ্বান জনায়৷
আজিৰ উদ্বোধনী অনুষ্ঠানৰ পিচত তিনিটা স্থানেই পৰিদৰ্শন কৰে মন্ত্ৰী গৰাকীয়ে৷ উল্লেখ্য যে সম্প্ৰতি বৱঢ়াপাহাৰ বনাঞ্চলৰ ২২ কিলোমিটাৰ পথ, চিৰাং পাহাৰৰ ২ কিলোমিটাৰ ট্ৰেকিং পথ আৰু বান্দৰডুবি ৬ কিলোমিটাৰ পথ পৰ্যটকৰ বাবে মুকলি কৰা হয়৷
