মঙলবাৰে নিশা কলিকতাৰ কেন্দ্ৰীয় ভাগত থকা নিউ মাৰ্কেট অঞ্চলত এক উত্তেজনাময় পৰিস্থিতিৰ সৃষ্টি হয়। একাংশ লোকে বুলড‘জাৰ লৈ গৈ ঐতিহাসিক হগ মাৰ্কেটৰ সমীপত থকা তৃণমূল কংগ্ৰেছৰ এটা কাৰ্যালয় ভাঙি পেলায়। এই ঘটনাৰ পিছতে সমগ্ৰ অঞ্চলটোত আতংকৰ সৃষ্টি হয় আৰু স্থানীয় ব্যৱসায়ীসকলে লৰালৰিকৈ নিজৰ দোকান-পোহাৰ বন্ধ কৰি নিৰাপদ স্থানলৈ পলাবলৈ বাধ্য হয়। প্ৰাথমিক খবৰ অনুসৰি, এই ঘটনাত তৃণমূলৰ নিউ মাৰ্কেট ইউনিয়নৰ কাৰ্যালয়টো সম্পূৰ্ণৰূপে ধ্বংস হৈছে। অঞ্চলটোত সৃষ্টি হোৱা এই বিশৃংখলতা আৰু ধ্বংসলীলাৰ ভিডিঅ‘ মুহূৰ্তৰ ভিতৰতে বিয়পি পৰে, যাৰ ফলত স্থানীয় লোকসকলৰ মাজত তীব্ৰ ভয়ৰ সৃষ্টি হয়। অৱশ্যে ঘটনাৰ খবৰ পোৱাৰ লগে লগে আৰক্ষীৰ দল ঘটনাস্থলীত উপস্থিত হৈ পৰিস্থিতি নিয়ন্ত্ৰণলৈ আনে আৰু অঞ্চলটোত তহলদাৰী বৃদ্ধি কৰে।
পশ্চিমবংগৰ শেহতীয়া নিৰ্বাচনী ফলাফলৰ পিছতে ৰাজনৈতিক উত্তেজনা বৃদ্ধি পোৱাৰ সময়তে এই ঘটনা সংঘটিত হোৱা দেখা গৈছে। এই সন্দৰ্ভত প্ৰতিক্ৰিয়া প্ৰকাশ কৰি তৃণমূলৰ জ্যেষ্ঠ নেত্ৰী মহুৱা মৈত্ৰই এক্স যোগে ঘটনাটোৰ এটা ভিডিঅ‘ শ্বেয়াৰ কৰে আৰু বিজেপিৰ পৰিৱৰ্তনৰ শ্লোগানৰ তীব্ৰ সমালোচনা কৰে। আনহাতে, জ্যেষ্ঠ তৃণমূল নেতা ডেৰেক অ‘ব্ৰায়েনে অভিযোগ কৰে যে আৰক্ষীৰ সন্মতি মৰ্মে আৰু কেন্দ্ৰীয় বাহিনীৰ উপস্থিতিতে এই ধ্বংসকাৰ্য চলোৱা হৈছে। তেওঁ লগতে দাবী কৰে যে বিজয় উৎসৱৰ অংশ হিচাপে মাংসৰ দোকানবোৰ ভাঙিবলৈ উদ্দেশ্যপ্ৰণোদিতভাৱে বুলড‘জাৰ অনা হৈছিল। তৃণমূল কংগ্ৰেছে আন এক বিবৃতিত এই ঘটনাক বিজেপি সমৰ্থকৰ গুণ্ডাগিৰি বুলি আখ্যা দিছে আৰু অভিযোগ কৰিছে যে কেন্দ্ৰীয় নেতাসকলৰ উদগনিতে এই বুলড‘জাৰ ৰাজনীতি আৰম্ভ হৈছে।
অৱশ্যে স্থানীয় ৰাইজ আৰু একাংশ ব্যৱসায়ীয়ে তৃণমূলৰ এই দাবীসমূহ নস্যাৎ কৰিছে। তেওঁলোকৰ মতে, ভাঙি পেলোৱা ঘৰটো আচলতে এটা অবৈধ নিৰ্মাণ আছিল। পূৰ্বে এজন সাধাৰণ দোকানীৰ পৰা বলপূৰ্বকভাৱে ঠাইখিনি দখল কৰি পিছত তাক ইউনিয়নৰ কাৰ্যালয়লৈ ৰূপান্তৰিত কৰা হৈছিল। স্থানীয় লোকসকলে লগতে স্পষ্ট কৰি দিয়ে যে ভাঙি পেলোৱা স্থানটো কোনো মাংসৰ দোকান নাছিল, বৰঞ্চ মাছ আৰু মাংসৰ বজাৰৰ কাষত থকা এটা বেআইনী কাৰ্যালয়হে আছিল। বৰ্তমান এই সমগ্ৰ ঘটনাৰ পিছত অঞ্চলটোত শান্তি-শৃংখলা অটুট ৰাখিবলৈ আৰক্ষীৰ কটকটীয়া নিৰাপত্তা ব্যৱস্থা গঢ়ি তোলা হৈছে।
