সোমবাৰে পুৱাই ছৌদি আৰৱৰ মক্কাৰ পৰা মদিনা অভিমুখী পথত সংঘটিত হোৱা ভয়ংকৰ বাছ দুৰ্ঘটনাত কমেও ৪২ জন ভাৰতীয় উমৰাহ যাত্ৰী নিহত হয়। বিভিন্ন আন্তঃৰাষ্ট্ৰীয় সংবাদ মাধ্যমত প্ৰকাশিত তথ্য অনুসৰি ভাৰতীয় সময় অনুসৰি নিশা প্ৰায় ১:৩০ বজাত এখন যাত্ৰীবাহী বাছে ডিজেল টেংকাৰৰ সৈতে খুন্দা মাৰে। সংঘৰ্ষৰ লগে লগে বাছখনত অগ্নিকাণ্ড সংঘটিত হয়। দুৰ্ঘটনা সংঘটিত হোৱাৰ সময়ত অধিকাংশ যাত্ৰী শুই আছিল আৰু অগ্নিদগ্ধ হৈছিল।
বাছখনত থকা অধিকাংশ যাত্ৰী হায়দৰাবাদৰ বাসিন্দা আছিল। যাত্ৰীৰ ভিতৰত কেইবাজনো মহিলা আৰু শিশুও আছিল। দুৰ্ঘটনাৰ পিছতে স্থানীয় বাসিন্দাসকলে ক্ষিপ্ৰতাৰে উদ্ধাৰ অভিযান আৰম্ভ কৰে। অগ্নিনিৰ্বাপক বাহিনী আৰু উদ্ধাৰ কৰ্মীয়ে গোটেই নিশা কাম কৰিছিল। অৱশ্যে মৃতকৰ সঠিক সংখ্যা এতিয়াও আনুষ্ঠানিকভাৱে ঘোষণা কৰা হোৱা নাই।
স্থানীয় সংবাদ মাধ্যমৰ সূত্ৰ অনুসৰি তীব্ৰ অগ্নিকাণ্ড আৰু বিস্ফোৰণৰ ফলত থিতাতে বহু যাত্ৰীয়ে প্ৰাণ হেৰুৱাইছে। গুৰুতৰভাৱে আহত একাংশক ওচৰৰ চিকিৎসালয়ত ভৰ্তি কৰোৱা হৈছে।
হায়দৰাবাদৰ সাংসদ আছাদুদ্দিন ওৱেছিয়ে কয় যে দুৰ্ঘটনাৰ খবৰ পোৱাৰ লগে লগে মহানগৰীৰ দুটা ট্ৰেভেল এজেন্সীৰ সৈতে যোগাযোগ কৰি মৃত আৰু আহতসকলৰ তথ্য ভাৰতীয় কৰ্তৃপক্ষলৈ প্ৰেৰণ কৰে।
ওৱাইছিয়ে কয় যে, “মক্কাৰ পৰা মদিনালৈ যোৱাৰ সময়ত উমৰাহ যাত্ৰী কঢ়িয়াই অনা বাছখনত জুই লাগিছিল। মই ৰিয়াদত থকা ভাৰতীয় দূতাবাসৰ মিছনৰ উপ-মূৰব্বী আবু মাথেন জৰ্জৰ সৈতে কথা পাতিছিলো। তেওঁ কয় যে তথ্য সংগ্ৰহৰ কাম চলি আছে।”
সাংসদ ওৱাইছিয়ে কেন্দ্ৰীয় চৰকাৰক মৃতদেহবোৰ শীঘ্ৰে ভাৰতলৈ ঘূৰাই অনাৰ দাবী জনায়। তেওঁ কয়, “মৃতকৰ দেহ শীঘ্ৰে ভাৰতলৈ অনাৰ ব্যৱস্থা কৰিবলৈ বৈদেশিক পৰিক্ৰমা মন্ত্ৰী এছ জয়শংকৰক অনুৰোধ কৰিছো। লগতে আহতসকলে যাতে উপযুক্ত চিকিৎসা লাভ কৰে তাৰ প্ৰতিও নিশ্চিত হ’ব লাগে।”
দুৰ্ঘটনা সন্দৰ্ভত সঠিক তথ্য, মৃত আৰু আহত লোকৰ সঠিক সংখ্যা এতিয়াও আনুষ্ঠানিকভাৱে ঘোষণা কৰা নাই ছৌদি প্ৰশাসনে। উদ্ধাৰ কাম সম্পূৰ্ণ হোৱাৰ পিছত বিতং তথ্য প্ৰকাশ পাব পাৰে। কিন্তু প্ৰাৰম্ভিক খবৰ অনুসৰি এই ভয়াবহ অগ্নিকাণ্ডত মৃত্যু হোৱা লোকৰ সংখ্যা ৪০ জনতকৈ অধিক হ’ব পাৰে, ইয়াৰে অধিকাংশই ভাৰতীয় উমৰাহ যাত্ৰী।
ভাৰতীয় দূতাবাস, তেলেংগানা চৰকাৰ আৰু কেন্দ্ৰীয় বৈদেশিক পৰিক্ৰমা মন্ত্ৰালয়ে এই ঘটনাৰ পৰিস্থিতি নিৰীক্ষণ কৰি আছে। পৰৱৰ্তী পদক্ষেপ হ’ব আহতসকলৰ চিকিৎসা, মৃতদেহ চিনাক্তকৰণ আৰু মৃতদেহ ঘূৰাই অনাৰ প্ৰক্ৰিয়া।
জেদ্দাত থকা ভাৰতৰ কনছুলেট জেনেৰেলে এই সন্দৰ্ভত এক্স হেণ্ডেলত এটা পোষ্ট কৰিছে। প্ৰশাসনে তাত থকা ভাৰতীয় দূতাবাসত ২৪ ঘণ্টীয়া হেল্পলাইন আৰম্ভ কৰা বুলি জনোৱা হৈছে। হেল্পলাইন নম্বৰ হৈছে ৮০০২৪৪০০৩।
এই সন্দৰ্ভত বৈদেশিক পৰিক্ৰমা মন্ত্ৰী ড০ এছ জয়শংকৰে টুইট কৰি এক্সত লিখিছে, ‘চৌদি আৰৱৰ মদিনাত যি দুৰ্ঘটনা সংঘটিত হৈছে সেয়া অতি মৰ্মান্তিক। ৰিয়াদত থকা ভাৰতীয় দূতাবাস আৰু জেদ্দাত থকা আমাৰ কনছুলেট এই দুৰ্ঘটনাত ক্ষতিগ্ৰস্ত ভাৰতীয় আৰু তেওঁলোকৰ পৰিয়ালৰ কাষত সম্ভৱপৰ সকলো প্ৰকাৰে থিয় দিছে। মৃতকৰ পৰিয়াললৈ মোৰ আন্তৰিক সমবেদনা জনাইছো। আহতসকলৰ আশু আৰোগ্যৰ বাবে প্ৰাৰ্থনা কৰিছো।’
