দেশৰ ন্যায় ব্যৱস্থাৰ ওপৰত আস্থা হেৰুৱাই অৱশেষত শিৱসাগৰৰ দৰিদ্ৰ পৰিয়াল এটাই ৩১ জুলাই অৰ্থাৎ বুধবাৰে জিলা উপায়ুক্তৰ কাৰ্যালয়ৰ সন্মুখত অনশনত বহে।
প্ৰাপ্ত অভিযোগ অনুসৰি শিৱসাগৰ নগৰৰ হস্পিতেল ৰোডৰ ২৭৫৮ দাগ আৰু একচনা পট্টা নং ২১ ত থকা প্ৰায় ২ কঠা মাটি প্ৰয়াত উপেন গগৈৰ নামত বৰ্তমানো নামজাৰী হৈ আছে। উক্ত মাটিৰ খাজানা দি আহিছে উপেন গগৈৰ পুত্ৰ প্ৰবীণ গগৈয়ে।
কিন্তু উক্ত মাটি খিনি দীৰ্ঘদিন ধৰি বেদখল কৰি আছে মনিষ দাস নামৰ কলকতাৰ এজন ব্যক্তিয়ে। প্ৰয়াত উপেন দাসৰ মৃত্যুৰ পাছত তেওঁৰ পত্নীয়ে মাটি খিনি ঘূৰাই বিচাৰিছিল যদিও মনিষ দাসে দাবী ধমকি দি খেদি পঠাইছিল।
পৰৱৰ্তী সময়ত প্ৰবীন গগৈৰ মাতৃৰ মৃত্যুৰ পাছত প্ৰবীন গগৈ আৰু তেওঁৰ ককায়েকে মাটিখিনি বিচাৰি মনিষ দাসৰ ওচৰলৈ যোৱাত পূৰ্বৰ দৰেই দাসে নানা ভয় ভাবুকি প্ৰদান কৰে। এই কথা প্ৰকাশ কৰে প্ৰবীন গগৈৰ কন্যা নয়নমণি গগৈয়ে।
আৰ্থিক ভাৱে টনকিয়াল কলিকতাৰ নিবাসী মনিষ দাসৰ বিৰুদ্ধে কোনো পদক্ষেপ ল’ব পৰা নাছিল দৰিদ্ৰ প্ৰবীন গগৈ আৰু তেওঁৰ পৰিয়ালে। ঘটনা সন্দৰ্ভত প্ৰবীন গগৈৰ পৰিয়ালে বিভিন্নজনক অৱগত কৰোৱাত সকলোৰে পৰামৰ্শ মতে যোৱা ৫ মে’ত মনিষ দাসে অন্যায় ভাৱে তেওঁলোকৰ মাটি বেদখল কৰি থকা সন্দৰ্ভত শিৱসাগৰ আৰক্ষী থানাত এখন এজাহাৰ দাখিল কৰে।
কিন্তু শিৱসাগৰ আৰক্ষীয়ে মনিষ দাসৰ বিৰুদ্ধে ৰুজু কৰা নাই গোচৰ। আৰক্ষীৰ পৰা কোনো সহাৰি নোপোৱাত দুৰ্ভগীয়া পৰিয়ালটোৱে ১০ জুলাইত শিৱসাগৰ উপায়ুক্তক এখন অভিযোগ পত্ৰ দাখিল কৰে আৰু এই অভিযোগ পত্ৰৰ ভিত্তিত জিলা উপায়ুক্তই শিৱসাগৰ ৰাজহ চক্ৰ বিষয়াৰ কাৰ্যালয়ক বিষয়টো তদন্তৰ বাবে নিৰ্দেশ দিয়ে।
উপায়ুক্তৰ নিৰ্দেশৰ পিছতো ৰাজহ চক্ৰ কাৰ্যালয়ে বিষয়টোৰ তদন্তত কোনো গুৰুত্ব প্ৰদান কৰা নাই। শিৱসাগৰ জিলা প্ৰশাসন, আৰক্ষী বিভাগ আৰু ৰাজহ চক্ৰ বিভাগৰ পৰা কোনো সহাঁৰি নাপায় দেশৰ ন্যায় ব্যৱস্থাৰ ওপৰত আস্থা হেৰুৱাই পেলোৱা দুৰ্ভগীয়া পৰিয়ালটোৱে বুধবাৰে শিৱসাগৰ জিলা উপায়ুক্তৰ কাৰ্যালয়ৰ সন্মুখত অনশনৰ কাৰ্যসূচী ৰূপায়ণ কৰে।
নিজৰ প্ৰাপ্য অধিকাৰ দাবী কৰি অনশনত বহা দুৰ্ভগীয়া পৰিয়ালটোৱে জিলা উপায়ুক্তক এখন স্মাৰক পত্ৰ প্ৰদান কৰে।
ইফালে একাংশ সচেতন লোকে জিলা প্ৰশাসনক ধিক্কাৰ জনোৱাৰ লগতে বহিৰাগত মনিষ দাসৰ প্ৰতি কিয় এনে দৰদ উপজিছে তাক লৈও প্ৰশ্ন উত্থাপন কৰে।
জাতি মাটি ভেটিৰ শ্ল’গান দিয়া মুখ্য মন্ত্ৰী সৰ্বানন্দ সোণোৱাল নেতৃত্বধীন চৰকাৰে কিয় খিলঞ্জীয়া পৰিয়ালক সুৰক্ষা দিব পৰা নাই। বাহিৰাগত ব্যক্তিয়ে খিলঞ্জীয়া পৰিয়ালৰ মাটি গুণ্ডাগিৰি কৰি বছৰ বছৰ ধৰি বেদখল কৰি থকা বিষয়টোৱে বিভিন্ন পক্ষক উদ্বিগ্ন কৰি তুলিছে।
এতিয়া এই ঘটনা সন্দৰ্ভত পৰিয়াল তথা ৰাইজে জিলা উপায়ুক্তৰ হস্তক্ষেপ বিচাৰিছে।