কাটাৰত গ্ৰুপ পৰ্যায়ৰ অন্তিমখন খেলতো ঘটিল অঘটন। আনকি চলিত বিশ্বকাপৰ এইটো আটাইতকৈ ডাঙৰ ঘটনাটো বুলি ক’ব পাৰি। শুকুৰবাৰে দোহাৰ লুচেইল ষ্টেডিয়ামত ব্ৰাজিল কেমেৰুনৰ হাতত ০-১ গ’লত পৰাজিত হয়। ভিনচেণ্ট আবুবাকাৰে ইনজুৰী টাইমত খেলখনৰ একমাত্ৰ গ’লটো কৰে। তেওঁ সোঁফালৰ পৰা উৰি অহা এটা ক্ৰছত হেড কৰি ঐতিহাসিক বিজয় কাঢ়ি লৈছিল।
আবুবাকাৰ হৈছে বিশ্বকাপত ব্ৰাজিলৰ বিৰুদ্ধে গ’ল কৰা তৃতীয় আফ্ৰিকান ফুটবলাৰ। কিন্তু গ’লটোৰ উত্তেজনাত তেওঁ জাৰ্চিটো খুলি দ্বিতীয় হালধীয়া কাৰ্ডখন অৰ্থাৎ ৰঙা কাৰ্ড দেখিলে।
বিশ্বকাপত অঘটনৰ এইটো তৃতীয় ৰাউণ্ড। স্পেইন আৰু পৰ্তুগালৰ পিছত এইবাৰ ব্ৰাজিল। টিটেৰ দলে প্ৰথম দুখন খেলত মসৃন বিজয় সাৱ্যস্ত কৰিছিল। আশা কৰা হৈছিল যে ব্ৰাজিল গ্ৰুপত তিনিখন মেচ জিকা প্ৰথম দল হিচাপে কাটাৰ বিশ্বকাপৰ ছেমি ফাইনেললৈ যাব। কিন্তু ইয়াৰ বিপৰীতে হাৰি থাকিল পাঁচবাৰৰ বিশ্ব চেম্পিয়ন।
দুদিন আগৰ ফ্ৰান্সৰ দৰে হ’ল ব্ৰাজিলৰ অৱস্থা। ফ্ৰান্সৰ প্ৰশিক্ষকে টিউনিছিয়াৰ বিৰুদ্ধে খেলত দলটোত ৯টা পৰিৱৰ্তন কৰিছিল। ফলস্বৰূপে ফৰাচীসকলৰ খেলখনত উৎসাহ নাছিল। ছন্দও হেৰুৱাইছিল। তাৰ পুনৰাবৃত্তি ঘটিল ব্ৰাজিলৰ। কিন্তু একে সময়তে বহু সুযোগ নষ্ট হৈছিল, ফিনিছিঙৰ অভাৱতে ডুবিল ব্ৰাজিল। নেইমাৰে গেলেৰীত বহি দলটোৰ পৰাজয়ৰ সাক্ষী হৈ থাকিল। ব্ৰাজিলে ইতিমধ্যে প্ৰথম দুখন মেচ জিকি অন্তিম ষোল্লত উপনীত হৈছিল।
চেলেকাও বাহিনীৰ সন্মুখত শীৰ্ষ স্থান ধৰি ৰখাৰ যুঁজ আছিল। কিন্তু টিটে দলটোত কেইবাটাও পৰিৱৰ্তন কৰিছিল। তদুপৰি, আঘাতৰ দ্বাৰা জৰ্জৰিত ব্ৰাজিল শিবিৰ। দলৰ একাধিক ফুটবল খেলুৱৈ ফ্লুত ভুগি আছে। খেলখনৰ আৰম্ভণিৰ পৰাই ব্ৰাজিলে আক্ৰমণাত্মক ফুটবল খেলিছিল। ১১ মিনিটত প্ৰথম সুযোগ। কিন্তু মাৰ্টিনেলীয়ে দলটোক আগুৱাই নিব নোৱাৰিলে। তিনি মিনিটৰ পিছত কেমেৰুনৰ গ’লৰক্ষক আপাচিয়ে ফ্ৰেডৰ ক্ৰছৰ পৰা ব্ৰাজিলিয়ান ষ্ট্ৰাইকাৰৰ হেডটো ৰক্ষা কৰে। আবুবাকাৰে কেইবাবাৰো বিপক্ষৰ বাকচত আতংকৰ সৃষ্টি কৰিছিল। তেওঁ বিৰতিৰ ঠিক আগতে গ’ল কৰিব পাৰিলেহেঁতেন। কিন্তু কেমেৰুনৰ তাৰকা ফুটবলাৰজনে সুযোগ হেৰুৱাইছিল।
দ্বিতীয়াৰ্ধত কেমেৰুনে ব্ৰাজিলৰ প্ৰতিৰক্ষাৰ ওপৰত চাপ বৃদ্ধি কৰে। সকলো আক্ৰমণৰ আঁৰত আছিল আবুবাকাৰ। অৱশ্যে ব্ৰাজিলৰ আক্ৰমণ চাৰিগুণ অধিক আছিল। চেলেকাওৰ দলে গ’লৰ লক্ষ্যত ২০ টা শ্বট মাৰিছিল। কিন্তু ফিনিছিঙৰ অভাৱ আছিল। মাৰ্টিনেলি, এন্থনী, ৰড্ৰিগোহঁতে এটাৰ পিছত এটা কৈ সুযোগ হেৰুৱাইছিল। ফলস্বৰূপে, নিজেই কেমেৰুনক ইতিহাস ৰচিবলৈ সুযোগ দিছিল। খেলখনৰ ৫৬ মিনিটত মাৰ্টিনেলীৰ দীঘলীয়া দূৰত্বৰ শ্বটটো আপাচিয়ে ৰক্ষা কৰে। তথাপিও, কমেও ৪-৫ টা নিশ্চিত সম্ভাৱনা আছিল। কিন্তু গ’ল দেখা নগ’ল। আবুবাকাৰে বিজয়ী গ’লটো অৰ্জন কৰাৰ সুযোগৰ সদ্ব্যৱহাৰ কৰিছিল।
কেমেৰুন বিশ্বকাপত ব্ৰাজিলক পৰাস্ত কৰা প্ৰথম আফ্ৰিকান দেশ হিচাপে পৰিগণিত হৈছে। অৱশ্যে, তাৰ প্ৰভাৱ গ্ৰুপৰ তালিকাত নপৰিল। ব্ৰাজিল হৈছে অন্তিম ষোল্লত প্ৰৱেশ কৰা প্ৰথম দল। দ্বিতীয় দল হিচাপে যোগ্যতা অৰ্জন কৰিছে চুইজাৰলেণ্ডে।