দিল্লীৰ লালকিল্লাৰ সমীপত সংঘটিত হোৱা ভয়ংকৰ বিস্ফোৰণ কাণ্ডত এতিয়া নতুন তথ্য পোহৰলৈ আহিছে। সোমবাৰে নিশা অমিত শ্বাহে কৈছিল যে ‘হুণ্ডাই আই২০ গাড়ীয়েই বিস্ফোৰণৰ প্ৰকৃত কাৰণ’। ইয়াৰ পিছতে গাড়ীখন কাৰ নামত পঞ্জীয়ন কৰা হৈছে সেই তথ্য জানিব পৰা গ’ল।
প্ৰথম অৱস্থাত গম পোৱা গৈছিল যে গাড়ীখনত হাৰিয়ানাৰ নম্বৰ প্লেট আছে। এনডিটিভিৰ প্ৰতিবেদন অনুসৰি গাড়ীখন ছলমান নামৰ এজন ব্যক্তিৰ নামত পঞ্জীয়ন কৰা হৈছে। পিছত গাড়ীখন ওখলাত আন এজন ব্যক্তিক বিক্ৰী কৰা হয়। গাড়ীখনৰ নম্বৰ আছিল HR 26 CE 7674।
শেহতীয়া আপডেট অনুসৰি আৰক্ষীয়ে গাড়ীখনৰ প্ৰথম মালিক ছলমানক গ্ৰেপ্তাৰ কৰিছে। এতিয়া তেওঁৰ পৰা গাড়ীখনৰ বিষয়ে বাকী তথ্য জানিবলৈ চেষ্টা কৰা হ’ব। সোমবাৰে নিশা সংঘটিত হোৱা বিস্ফোৰণৰ সৈতে তেওঁৰ কোনো ধৰণৰ সম্পৰ্ক আছে নে নাই সেয়াও তদন্ত কৰা হ’ব।
গুৰগাঁও আৰক্ষীৰ মুখপাত্ৰ সন্দীপ কুমাৰে জনোৱা মতে, বৰ্তমান দুজন লোকক গাড়ীখনৰ মালিকীস্বত্ব সন্দৰ্ভত জেৰা চলি আছে। গাড়ীখন মহম্মদ ছলমান নামৰ এজন ব্যক্তিৰ নামত পঞ্জীয়ন কৰা হৈছিল। পিছত তেওঁ গাড়ীখন দেৱেন্দ্ৰ নামৰ এজন ব্যক্তিক বিক্ৰী কৰে। প্ৰায় ডেৰ বছৰ আগতে গাড়ীখন বিক্ৰী কৰিছিল ওখলাৰ বাসিন্দা দেৱেন্দ্ৰ নামৰ এজন ব্যক্তিক।
কিন্তু এই ঘটনাত নদীম নামৰ আন এজন ব্যক্তিৰ নাম আহি পৰে। খবৰ অনুসৰি তেওঁ গাড়ীখনৰ বৰ্তমানৰ মালিক আছিল।
ইতিমধ্যে নিশাই ঘটনাস্থলীত উপস্থিত হয় দেশৰ গৃহমন্ত্ৰী অমিত শ্বাহ। তাৰ আগতে তেওঁ সংবাদমেল অনুষ্ঠিত কৰিছিল। তেওঁ কয়, “সকলো সম্ভাৱনা পৰীক্ষা কৰা হ’ব। চিচিটিভিও পৰীক্ষা কৰা হ’ব। যিবোৰ তথ্য উপলব্ধ হ’ব, সেই সকলো তথ্য জনসাধাৰণৰ সন্মুখত অনা হ’ব।”
প্ৰসংগক্ৰমে তেওঁক সংবাদ মাধ্যমে সুধিছিল যে এয়া সন্ত্ৰাসবাদী আক্ৰমণ নেকি? এই সন্দৰ্ভত অমিত শ্বাহে কয়, “এতিয়াও নিশ্চিত নোহোৱাকৈ ক’ব নোৱাৰি।” বিস্ফোৰণস্থলী পৰিদৰ্শন কৰাৰ উপৰিও তেওঁ চিকিৎসালয়খনো পৰিদৰ্শন কৰে।
এই পৰ্যন্ত দিল্লী বিস্ফোৰণত ১১ জন লোকৰ মৃত্যু হোৱাৰ লগতে ৩০ জন আহত হৈছে। জানিব পৰা মতে, আহতসকলৰ আঘাত মূলতঃ অগ্নিকাণ্ডৰ বাবে। কোনো সেই স্তৰৰ আই ই ডি বা বোমা বিস্ফোৰণ নহয়। অৰ্থাৎ সন্দেহযুক্ত বাহনখনত বোমা নিৰ্মাণৰ সামগ্ৰীও কঢ়িয়াই অনা বুলি সন্দেহ কৰা হৈছে। অৱশ্যে কেন্দ্ৰই এই ঘটনাক সন্ত্ৰাসবাদী আক্ৰমণ বুলি ঘোষণা কৰা নাই।
