হাৰিয়ানাৰ মুখ্যমন্ত্ৰী মনোহৰ লাল খাট্টাৰৰ কনভয়ক বাধা প্ৰদান কৰাৰ অভিযোগত হাৰিয়ানাৰ ১৩ জন কৃষকৰ বিৰুদ্ধে গোচৰ ৰুজু কৰা হৈছে।
উল্লেখ্য মংগলবাৰে কেন্দ্ৰীয় চৰকাৰে প্ৰণয়ন কৰা তিনিখন কৃষি আইনৰ বাতিলৰ দাবীত আন্দোলনৰত বিদ্ৰোহী কৃষকে আম্বালাত হাৰিয়ানাৰ মুখ্যমন্ত্ৰী মনোহৰ লালা খাট্টাৰৰ কনভয়ক বাধা প্ৰদান কৰিছিল।
পিটিআইৰ আগত আৰক্ষীয়ে কয় যে মুখ্যমন্ত্ৰী কনভয়ক আৱদ্ধ কৰি ৰখাৰ লগতে বাধা প্ৰদান কৰাৰ অভিযোগত মংগলবাৰে নিশা ১৩ কৃষকৰ বিৰুদ্ধে গোচৰ ৰুজু কৰা হৈছে।
আৰক্ষীয়ে ভাৰতীয় দণ্ডবিধি আইনৰ ৩০৭, ১৪৭, ১৪৮, ১৪৯, ১৮৬, ৩৫৩ আৰু ৫০৬ৰ কেবাটাও ধাৰাত অভিযুক্ত ১৩ গৰাকী কৃষক বিদ্ৰোহীৰ বিৰুদ্ধে গোচৰ পঞ্জীয়ন কৰা বুলি পিটিআইক জনাইছে।
মংগলবাৰে আম্বালাৰ এখন জনসভাত অংশগ্ৰহণৰ উদ্দেশ্যে হাৰিয়ানাৰ মুখ্যমন্ত্ৰী মনোহৰ লাল খাট্টাৰে কৃষক সমদলৰ মাজেৰে যাত্ৰা কৰিছিল।
তেতিয়াই আগ্ৰাসেন চ’কত বিক্ষোভ প্ৰদৰ্শন কৰি থকা কৃষক সমদলে মুখ্যমন্ত্ৰী খাট্টাৰৰ কনভয়ক আৱদ্ধ কৰি ৰাখি আগলৈ যোৱাত বাধা প্ৰদান কৰিছিল।
