শেহতীয়াকৈ কিছুদিন ধৰি বিতৰ্কিত মন্তব্যৰে চৰ্চাত থকা মহাৰাষ্ট্ৰ নৱনিৰ্মাণ সেনাৰ মুৰব্বী ৰাজ ঠাকৰেৰ বিৰুদ্ধে উচতনিমূলক ভাষণ দিয়াৰ বাবে গোচৰ ৰুজু কৰা হৈছে।
মহাৰাষ্ট্ৰৰ আৰক্ষী প্ৰধান ৰজনীশ শেঠে ঔৰঙ্গাবাদ আৰক্ষী আয়ুক্তই ঠাকৰেৰ বিৰুদ্ধে উপযুক্ত আইনী ব্যৱস্থা গ্ৰহণ কৰিব বুলি মন্তব্য কৰিছে।
উল্লেখ্য যে এক ভাষণত ৰাজ ঠাকৰেয়ে ৩ মে’ৰ ভিতৰত মছজিদৰ পৰা লাউডস্পীকাৰ আঁতৰ কৰিবলৈ দাবী জনাইছিল।
লগতে যদি মছজিদৰ পৰা লাউডস্পীকাৰ আঁতৰ কৰা নহয়, তেনেহ’লে মছজিদৰ বাহিৰত হনুমান চালিচা বজাবলৈ হিন্দু লোকসকলক আহ্বান জনাইছিল ঠাকৰেই।
“মছজিদৰ পৰা লাউডস্পীকাৰ আঁতৰাবলৈ ৩ মে’ৰ সময়সীমা দিয়া হৈছে। ইয়াৰ পিছত যি ঘটিব তাৰ বাবে মই দায়বদ্ধ নহ’ম।”- ঔৰঙ্গাবাদত এক ৰাজহুৱা ৰেলীত এইদৰে মন্তব্য কৰিছিল ৰাজ ঠাকৰেই।
ইফালে আজি মহাৰাষ্ট্ৰৰ গৃহমন্ত্ৰী দিলীপ ৱালছে পাটিল আৰু আৰক্ষী প্ৰধান শেঠৰ লগতে জ্যেষ্ঠ আৰক্ষী বিষয়াসকলৰ সৈতে ৰাজ্যখনৰ আইন-শৃংখলা পৰিস্থিতিৰ পৰ্যালোচনা কৰে।
আনহাতে ৰাজ ঠাকৰেৰ নিৰ্দেশৰ পিছতে মহাৰাষ্ট্ৰ নৱনিৰ্মাণ সেনাৰ ঔৰঙ্গাবাদ গোটৰ মুৰব্বী সুমিত খাম্বেকাৰে “দলৰ মুৰব্বী ৰাজ ঠাকৰেৰ যিকোনো আদেশ অনুসৰণ কৰা হ’ব” বুলি মন্তব্য কৰিছে।
শেহতীয়াকৈ দেশৰ বিভিন্ন প্ৰান্তক লাউডস্পীকাৰ বিতৰ্কই গা কৰি উঠিছে। এনে সময়তে ঠাকৰেৰ এই মন্তব্য বিশেষভাৱে চৰ্চিত হৈছে।
