সমস্যাই লগ এৰা নাই বিহাৰৰ প্ৰাক্তন মুখ্যমন্ত্ৰী তথা ৰাষ্ট্ৰীয় জনতা দলৰ সভাপতি লালু প্ৰসাদ যাদৱৰ। পুশু খাদ্য কেলেংকাৰীত কাৰাৰুদ্ধ হোৱা লালু প্ৰসাদ যাদৱলৈ কেন্দ্ৰীয় তদন্তকাৰী সংস্থা চিবিআই-এ পুনৰ চমন জাৰি কৰিছে।
সংবাদ সংস্থা এএনআইৰ মতে লালু প্ৰসাদ যাদৱলৈ এইবাৰ ‘ভূমিৰ বিনিময়ত চাকৰি’ দিয়া গোচৰত চমন প্ৰেৰণ কৰা হৈছে। এই গোচৰৰ সংক্ৰান্ত অতি শীঘ্ৰেই প্ৰাক্তন কেন্দ্ৰীয় ৰে’ল মন্ত্ৰীগৰাকীক তদন্তকাৰী সংস্থাটোৱে জেৰা কৰিব।
ইয়াৰ পূৰ্বে সোমবাৰে পুৱা চিবিআইৰ এটা দলে বিহাৰৰ প্ৰাক্তন মুখ্যমন্ত্ৰী তথা লালু প্ৰসাদ যাদৱৰ পত্নী ৰাবৰি দেৱীৰ বাসগৃহত উপস্থিত হৈ প্ৰায় পাঁচ ঘণ্টা ধৰি সোধা-পোছা কৰিছিল।
এই সন্দৰ্ভত চিবিআইৰ বিষয়াসকলক সংবাদ মাধ্যমে প্ৰশ্ন কৰিছিল যদিও সাংবাদিকক কোনো সঁহাৰি দিয়া নাছিল। ‘ভূমিৰ বিনিময়ত চাকৰি’ দিয়াৰ গোচৰতে দলটোৱে ৰাবৰি দেৱীক জেৰা কৰা বুলি জানিব পৰা গৈছে। এই গোচৰত লালু প্ৰসাদ যাদৱ কন্যাৰ নামো সাঙুৰ খাই আছে।
অহা ১৫ মাৰ্চ লালু প্ৰসাদ যাদৱ, তেওঁৰ পত্নী ৰাবৰি দেৱী আৰু কন্যা মিছা ভাৰতীক আদালতত হাজিৰ হ’বলৈ কোৱা হৈছে।
উল্লেখ্য যে, ২০০৪ চনৰ পৰা ২০০৯ চনৰ ভিতৰত লালু প্ৰসাদ যাদৱ ইউ পি এ চৰকাৰত ৰে’ল মন্ত্ৰী আছিল।লালু প্ৰসাদ যাদৱে ৰে’ল মন্ত্ৰী হৈ থকাৰ সময়ত ৰে’ল বিভাগত নিযুক্তিৰ ক্ষেত্ৰত কেলেংকাৰী সংঘটিত কৰাৰ অভিযোগ উত্থাপন হৈছিল। অভিযোগ অনুসৰি চাকৰি বিনিময়ত চাকৰি প্ৰাৰ্থীসকলৰ পৰা মাটিৰ প্লট লোৱা হৈছিল। এই বিষয়ত চিবিআইয়ে তদন্তৰ অন্তত লালু প্ৰসাদ যাদৱ আৰু তেওঁৰ কন্যা মিছা ভাৰতীৰ বিৰুদ্ধে গোচৰ ৰুজু কৰে।
অভিযোগ অনুসৰি গ্ৰহণ কৰা ভূমিবোৰ ৰাবৰি দেৱী আৰু মিছা ভাৰতীৰ নামত লোৱা হৈছিল। এই গোচৰটো বিজয় চিংলাকে ধৰি ১০ জনৰ বিৰুদ্ধে চিবিআইয়ে এফআইআৰ ৰুজু কৰিছে।
