উত্তৰ পূব সীমান্ত ৰে’লৱেৰ নিৰ্মাণৰ সৈতে জড়িত এক দুৰ্নীতিৰ গোচৰত গুৱাহাটীৰ বিভিন্ন স্থানত দেওবাৰে চিবিআইয়ে তালাচী চলায়।
কেন্দ্ৰীয় তদন্তকাৰী সংস্থা চিবিআইয়ে গুৱাহাটীৰ মালিগাঁওস্থিত উত্তৰ পূব সীমান্ত ৰে’লৱেৰ মুখ্য কাৰ্যালয়কে ধৰি কেইবাটাও স্থানত অভিযান চলায়।
অভিযানৰ সময়ত চিবিআইয়ে গোচৰটোৰ সৈতে জড়িত থকাৰ অভিযোগত উত্তৰ পূব সীমান্ত ৰে’লৱেৰ মুখ্য প্ৰশাসনিক বিষয়া এম এছ চৌহানক গ্ৰেপ্তাৰ কৰে।
বাতৰি অনুসৰি, ১ কোটি টকা উৎকোচ লোৱাৰ গোচৰত মহেন্দ্ৰ সিং চৌহানক গ্ৰেপ্তাৰ কৰা হয়। চিবিআইয়ে অভিযানকালত চৌহানৰ ঘৰৰ পৰা নগদ ৫৪ লাখ টকা উদ্ধাৰ কৰা বুলি জানিব পৰা গৈছে।
তেওঁ মালিগাঁওৰ মুখ্য কাৰ্যালয়ত উত্তৰ পূব সীমান্ত ৰে’লৱেৰ নিৰ্মাণ শাখাত কাৰ্যনিৰ্বাহ কৰি আছিল।
চৌহান ভাৰতীয় ৰে’লৱেৰ আভিযান্ত্ৰিক সেৱাৰ ১৯৮৫বৰ্ষৰ এগৰাকী বিষয়া।
তেওঁ উত্তৰ পূব সীমান্ত ৰে’লৱেত ঠিকা দিয়াৰ নামত ব্যক্তিগত কোম্পানীৰ পৰা উৎকোচ লোৱাৰ ঘটনাত জড়িত আছিল।
চিবিআইয়ে লগতে উত্তৰ পূব সীমান্ত ৰে’লৱেৰ নিৰ্মাণ শাখাৰ অতিৰিক্ত মুখ্য অভিযন্তা হেম চন্দ্ৰ বৰাৰ গুৱাহাটীৰ জুৰোডৰ বাসগৃহতো তালাচী চলায়।
সূত্ৰসমূহে জানিবলৈ দিয়া মতে তালাচীৰ সময়ত বহুতো আপত্তিজনক নথিপত্ৰৰ লগতে নগদ ১৮ লাখ টকা উদ্ধাৰ কৰা হৈছে।
একেধৰণৰ অভিযান আন কেইবাঠাইতো চলাইছে কেন্দ্ৰীয় তদন্তকাৰী সংস্থাটোৱে।
সূত্ৰসমূহে জানিবলৈ দিয়া মতে উত্তৰ পূব সীমান্ত ৰে’লৱেৰ নিৰ্মাণ শাখাৰ আৰু কেইবাগৰাকীও বিষয়া গ্ৰেপ্তাৰ হোৱাৰ সম্ভাৱনা আছে।
