কেন্দ্ৰীয় মাধ্যমিক শিক্ষা ব’ৰ্ডে (চিবিএছই) এইবাৰৰ কেন্দ্ৰীয় শিক্ষক যোগ্যতা পৰীক্ষা (চি-টেট)ৰ অধিসূচনা প্ৰকাশ কৰিছে। ছেপ্টেম্বৰ মাহত সমগ্ৰ দেশতে আয়োজন কৰা হ’ব এই পৰীক্ষা। মঙলবাৰৰ পৰা (১২ মে) পৰীক্ষাৰ বাবে পঞ্জীয়ন কৰিব পাৰিব। ইচ্ছুক প্ৰাৰ্থীসকলে নিৰ্দিষ্ট ৱেবছাইটত গৈ পঞ্জীয়ন কৰিব পাৰিব।
চিবিএছইয়ে এইবাৰ চি-টেটৰ ২২ সংখ্যক সংস্কৰণৰ আয়োজন কৰিব। অহা ৬ ছেপ্টেম্বৰত অনুষ্ঠিত হ’বলগীয়া এই পৰীক্ষাৰ আয়োজন কৰা হ’ব দেশৰ ১৩২খন চহৰৰ নিৰ্বাচিত পৰীক্ষা কেন্দ্ৰত। সেইদিনা চি-টেটৰ প্ৰথম আৰু দ্বিতীয় পেপাৰ অনুষ্ঠিত হ’ব। প্ৰাৰ্থীসকলে এইবাৰ ২৭টা ভাষাত চি-টেট দিব পাৰিব। অক্টোবৰৰ শেষ সপ্তাহত পৰীক্ষাৰ সম্ভাৱ্য ফলাফল ঘোষণা হোৱাৰ সম্ভাৱনা আছে।
কেনেকৈ পঞ্জীয়ন কৰিব?
১/ প্ৰাৰ্থীসকলে প্ৰথমে ctet.nic.in বা cbse.gov.in ৱেবছাইটলৈ যাব লাগিব।
২) তাত ‘Apply Online’ লিংকত ক্লিক কৰক।
৩) লিংকটোত ক্লিক কৰাৰ পিছত সকলো তথ্যৰে আৱেদন প্ৰ-পত্ৰ সঠিকভাৱে পূৰণ কৰিব লাগিব।
৪) ইয়াৰ লগতে প্ৰাৰ্থীৰ ফটো আৰু স্বাক্ষৰও ৱেবছাইটত আপলোড কৰিব লাগিব।
৫) পৰৱৰ্তী ঢাপত পৰীক্ষাৰ বাবে আবেদন মাচুল জমা দিব লাগিব।
৬) আবেদন মাচুল জমা দিয়াৰ পিছত ‘কনফাৰ্মেশ্যন পেজ’টো ডাউনলোড কৰি প্ৰিন্ট কৰি নিজৰ লগত ৰাখিব লাগিব।
মন কৰিবলগীয়া যে প্ৰথম আৰু দ্বিতীয় পেপাৰৰ এটা বা দুয়োটা পেপাৰৰ বাবে প্ৰাৰ্থীসকলে পৰীক্ষা দিব পাৰে। এটা পেপাৰৰ বাবে সংৰক্ষিত প্ৰাৰ্থীৰ আবেদন মাচুল ৫০ টকা। অসংৰক্ষিত প্ৰাৰ্থীয়ে ১০০০ টকা জমা দিব লাগিব। দুয়োখন পেপাৰৰ বাবে সংৰক্ষিত প্ৰাৰ্থীয়ে ৬০০ টকা আৰু অসংৰক্ষিত প্ৰাৰ্থীয়ে ১২০০ টকা জমা দিব লাগিব। আৱেদন জমা দিয়াৰ অন্তিম তাৰিখ ১০ জুন। আৱেদন প্ৰ-পত্ৰত ভুল হ’লে ১৫ৰ পৰা ১৮ জুনৰ ভিতৰত শুধৰণি কৰিব পাৰিব। অৱশ্যে শুধৰণিৰ সুযোগ এবাৰহে দিয়া হ’ব।
পৰীক্ষাৰ্থীসকলে নিজৰ পছন্দৰ পৰীক্ষা কেন্দ্ৰ বাছি লোৱাৰ সুযোগ নাপাব বুলি ব’ৰ্ডে অৱগত কৰিছে। য’ত ব’ৰ্ডে আসন আবণ্টন দিব মহানগৰীৰ সেই কেন্দ্ৰটোলৈকে যাব লাগিব।
উল্লেখ্য যে, মূলতঃ কেন্দ্ৰীয় চৰকাৰৰ অধীনস্থ বিদ্যালয়ত পাঠদানৰ বাবে চি-টেট উত্তীৰ্ণ হোৱাটো বাধ্যতামূলক। প্ৰথম শ্ৰেণীৰ পৰা পঞ্চম শ্ৰেণীলৈকে প্ৰাথমিক পৰ্যায়ত শিক্ষকতা কৰিব বিচৰাসকলে প্ৰথম পেপাৰত উত্তীৰ্ণ হ’ব লাগিব।
যিসকলে ষষ্ঠ শ্ৰেণীৰ পৰা অষ্টম শ্ৰেণীলৈ অৰ্থাৎ উচ্চ প্ৰাথমিক পৰ্যায়লৈ পঢ়ুৱাব বিচাৰে তেওঁলোকে দ্বিতীয় পেপাৰত উত্তীৰ্ণ হ’ব লাগিব। আৰু কোনোবাই যদি প্ৰথম শ্ৰেণীৰ পৰা অষ্টম শ্ৰেণীলৈকে ছাত্ৰ-ছাত্ৰীক পঢ়ুৱাব বিচাৰে তেন্তে দুয়োখন পেপাৰ পাছ কৰিব লাগিব।
