কেন্দ্ৰীয় মাধ্যমিক শিক্ষা পৰিষদ (Central Board of Secondary Education বা CBSE)-এ ইয়াৰ অধীনৰ চৰকাৰী বিদ্যালয়বোৰৰ দশম আৰু দ্বাদশ শ্ৰেণীৰ এছ চি/এছ টি শিক্ষাৰ্থীৰ পৰীক্ষাৰ মাচুল ২৪ গুণ বৃদ্ধি কৰিছে।
যোৱা সপ্তাহত ঘোষণা কৰা এই মাচুল বৃদ্ধিক লৈ বিভিন্ন ধৰণৰ প্ৰতিক্ৰিয়া হৈ থকাৰ মাজতে আন এটা শংকাই দেখা দিছে, যিটোৰ ক্ষেত্ৰত অভিভাৱক আৰু ছাত্ৰ-ছাত্ৰী অৱগত হোৱা প্ৰয়োজন।
সংবাদ মাধ্যমত প্ৰকাশ পোৱা খবৰ মতে, পৰিষদে বিদ্যালয়বোৰলৈ এইটো জাননী জাৰি কৰিছে যে যিসকল বিদ্যালয়ে পুৰণি নিৰিখত মাচুল লৈ ইতিপূৰ্বে ছাত্ৰ-ছাত্ৰীৰ পঞ্জীয়ন কৰিলে, তেওঁলোকে ছাত্ৰ-ছাত্ৰীৰ পৰা নতুন নিৰিখৰ বাকী অংশটো সংগ্ৰহ কৰিব লাগিব। অন্যথা ছাত্ৰ বা ছাত্ৰীগৰাকীৰ পঞ্জীয়ন নহ’ব পাৰে আৰু পৰীক্ষা দিয়াৰ পৰা বঞ্চিত হ’ব পাৰে।
পঞ্জীয়নৰ নিয়ম হ’ল, দশম শ্ৰেণীৰ পৰীক্ষাৰ বাবে নৱম শ্ৰেণীত আৰু দ্বাদশ শ্ৰেণীৰ পৰীক্ষাৰ বাবে একাদশ শ্ৰেণীতে পঞ্জীয়ন হয়।
ইতিমধ্যে বহুতো বিদ্যালয়ে পুৰণি নিৰিখত পঞ্জীয়ন কৰা বুলি পৰিষদে শংকা প্ৰকাশ কৰি এই নিৰ্দেশ জাৰি কৰিছে।
উল্লেখযোগ্য যে চি বি এছ ইৰ অধীনৰ চৰকাৰী বিদ্যালয়বোৰত পূৰ্বে এই দুটা শ্ৰেণীৰ পৰীক্ষাৰ মাচুল হিচাপে অনুসূচিত জাতি (এছ চি) আৰু অনুসূচিত জনজাতি (এছ টি)ৰ শিক্ষাৰ্থীয়ে মাত্ৰ ৫০ টকা দিব লগীয়া হৈছিল। কিন্তু নতুন নিৰিখ মতে তেওঁলোকে এতিয়াৰ পৰা ১২০০ টকাকৈ দিব লগীয়া হ’ব। বৃদ্ধিৰ হাৰ ২৪ গুণ।
আনহাতে সাধাৰণ বৰ্গৰ পৰীক্ষাৰ্থীয়ে দিব লগীয়া এই মাচুল ৭৫০ টকাৰ পৰা ১৫০০ টকা কৰা হৈছে, যিটোৰ বৃদ্ধিৰ হাৰ ২গুণ।
এই বৃদ্ধিৰ ফলত সাধাৰণ বৰ্গৰ শিক্ষাৰ্থী আৰু এছ চি-এছ টি শিক্ষাৰ্থীৰ মাচুল প্ৰায় সমান হৈছেগৈ।
আনহাতে যদি উপৰঞ্চি এটা বিষয়ত পৰীক্ষা দিব খোজে এছ চি-এছ টি শিক্ষাৰ্থীয়ে ৩০০ টকা অতিৰিক্ত দিব লাগিব, যিটো পূৰ্বে বিনামূলীয়া আছিল।
সাধাৰণ বৰ্গৰ শিক্ষাৰ্থীয়েও একোটা অতিৰিক্ত বিষয়ৰ বাবে ৩০০ টকা দিব লাগিব, যিটো পূৰ্বে ১৫০ টকা আছিল।
“পুৰণি নিৰিখত পঞ্জীয়ন কৰা যিবোৰ শিক্ষাৰ্থীয়ে এই বৰ্ধিত মাচুলৰ বাকী অংশ অন্তিম তাৰিখৰ ভিতৰত জমা নিদিয়ে তেওঁলোকৰ পঞ্জীয়ন নহ’ব আৰু ২০১৯-২০২০ চনৰ পৰীক্ষাত বহাৰ অনুমতি দিয়া নহ’ব”, পৰিষদৰ এজন বিষয়াৰ উদ্ধৃতি ৰাষ্ট্ৰীয় কাকতত।
