মুখ্য নিৰ্বাচন আয়ুক্ত জ্ঞানেশ কুমাৰৰ পদত্যাগৰ দাবীত দিল্লীত হোৱা প্ৰতিবাদৰ মাজতে প্ৰতিবাদকাৰীক প্ৰহাৰ কৰাৰ অভিযোগত গ্ৰেপ্তাৰ হৈছে চাৰিজন লোক। শনিবাৰে দিল্লীত সংঘটিত এই ঘটনাৰ এটা ভিডিঅ’ সামাজিক মাধ্যমত ব্যাপকভাৱে প্ৰচাৰ হোৱাৰ পিছতে আৰক্ষীয়ে ব্যৱস্থা গ্ৰহণ কৰে। ‘দ্য হিন্দু’ৰ প্ৰতিবেদন অনুসৰি, গ্ৰেপ্তাৰ হোৱা লোককেইজনে হিন্দুত্ববাদী সংগঠন হিন্দু ৰক্ষা দলৰ সদস্য বুলি দাবী কৰা বুলি জানিব পৰা গৈছে।
সামাজিক মাধ্যমত ভাইৰেল হোৱা ভিডিঅ’টোত এজন পুৰুষ প্ৰতিবাদকাৰীক এজন লোকে প্ৰহাৰ কৰা দেখা গৈছে। সেই সময়তে এগৰাকী মহিলাই তেওঁক বাধা দিবলৈ চেষ্টা কৰে। ভিডিঅ’টোৰ আন এটা অংশত আন এজন লোকে এগৰাকী মহিলাক প্ৰহাৰ কৰি মাটিত পেলাই দিয়া দেখা যায়। ঘটনাস্থলীত আৰক্ষীৰ লোকো উপস্থিত আছিল। ভিডিঅ’টোৰ ভিত্তিতে আৰক্ষীয়ে নিজাববীয়াকৈ গোচৰ ৰুজু কৰি তদন্ত আৰম্ভ কৰা বুলি ‘দ্য ইণ্ডিয়ান এক্সপ্ৰেছ’ৰ প্ৰতিবেদনত প্ৰকাশ পাইছে।
এই ঘটনাত অভিযুক্ত চাৰিজনক ৰমন ছাইনী (৫০), বিবেকানন্দ ওৰফে বিবেক (৩২), কপিল কুমাৰ (২৭) আৰু ৰবীন্দৰ সিং ওৰফে গোবিন্দ হিন্দু (৩৫) বুলি চিনাক্ত কৰা হৈছে। দিল্লীৰ দীনদয়াল উপাধ্যায় মাৰ্গৰ কামলা মাৰ্কেট আৰক্ষী থানাৰ অধীনৰ অঞ্চলত এই ঘটনা সংঘটিত হৈছিল।
ঘটনাটোক লৈ তীব্ৰ প্ৰতিক্ৰিয়া প্ৰকাশ কৰিছে ককৰোচ জনতা পাৰ্টিয়ে। সামাজিক মাধ্যমত ভিডিঅ’টো প্ৰকাশ কৰি দলটোৱে ঘটনাটোক ‘অত্যন্ত উদ্বেগজনক’ বুলি অভিহিত কৰিছে। দলটোৰ অভিযোগ অনুসৰি, প্ৰতিবাদকাৰীক প্ৰহাৰ কৰা লোককেইজন ভাৰতীয় জনতা পাৰ্টি আৰু ইয়াৰ আদৰ্শগত সংগঠন ৰাষ্ট্ৰীয় স্বয়ংসেৱক সংঘৰ সৈতে জড়িত গুণ্ডা।
ককৰোচ জনতা পাৰ্টিয়ে দিল্লী আৰক্ষীৰ ভূমিকাক লৈও প্ৰশ্ন উত্থাপন কৰিছে। আৰক্ষীয়ে প্ৰতিবাদকাৰীক সুৰক্ষা দিয়াৰ পৰিৱৰ্তে অভিযুক্ত লোককেইজনক সহায় কৰা বুলি অভিযোগ কৰিছে দলটোৱে। দলটোৱে সামাজিক মাধ্যমত লিখিছে যে দিল্লী আৰক্ষীৰ উপস্থিতিতে বিজেপি-আৰ এছ এছৰ লোকসকলে এগৰাকী যুৱতীক প্ৰহাৰ কৰিছিল আৰু এগৰাকী আৰক্ষী বিষয়াই ভিডিঅ’ ৰেকৰ্ডিং বন্ধ কৰিবলৈ নিৰ্দেশ দিছিল।
কংগ্ৰেছ নেতা ৰাহুল গান্ধীয়েও ঘটনাটোৰ ভিডিঅ’ৰ এটা দৃশ্যাংশ সামাজিক মাধ্যমত প্ৰকাশ কৰি দিল্লী আৰক্ষীক সমালোচনা কৰিছে। কেন্দ্ৰীয় গৃহমন্ত্ৰী অমিত শ্বাহৰ অধীনত থকা দিল্লী আৰক্ষী ‘গুণ্ডাগিৰিত নামি পৰিছে’ বুলি মন্তব্য কৰে তেওঁ। ৰাহুল গান্ধীৰ অভিযোগ, আৰক্ষীয়ে মহিলাৰ লগতে যুৱক-যুৱতীৰ ওপৰত আক্ৰমণ চলাবলৈ আৰ এছ এছ-বিজেপিৰ লোকসকলক মুকলিকৈ উৎসাহ আৰু অনুমতি প্ৰদান কৰিছে।
