কেন্দ্ৰীয় গৃহ ৰাজ্যিক মন্ত্ৰী জি. কৃষ্ণণ ৰেড্ডীয়ে ৯ জুলাইত লোকসভাত কেন্দ্ৰ চৰকাৰে আৰক্ষী বলক আধুনিকীকৰণৰ পূৰ্বৰ আঁচনিক পুনৰুজ্জীৱিত কৰি নতুনভাৱে কাৰ্য্যব্যৱস্থা হাতত লোৱাৰ প্ৰসংগ উত্থাপন কৰে।
নতুনকৈ কেন্দ্ৰ চৰকাৰে মুকলি কৰিব বিছৰা ছাটি নামৰ আঁচনিখনৰ জৰিয়তে বাওঁপন্থী উগ্ৰবাদী অধ্যুষিত অঞ্চল, জম্মু-কাশ্মীৰৰ লগতে উত্তৰ-পূবত আৰক্ষীৰ আধুনিকীকৰণৰ বাবে ২৫,০৬১.৯০ কোটি টকা অনুমোদন কৰা হৈছে বুলি কেন্দ্ৰীয় মন্ত্ৰীগৰাকীয়ে কয়।
এই আঁচনিখনে নিৰাপত্তা সংক্ৰান্তীয় ব্যয় আৰু আৰক্ষী বাহিনীক আধুনিকীকৰণৰ ব্যয়ক সামৰি ল’ব।
কেন্দ্ৰ চৰকাৰে কেন্দ্ৰ চৰকাৰৰ তৰফৰ পৰা ১৮,৬৩৬.৩০ কোটি আৰু ৰাজ্য চৰকাৰৰ পৰা ৬,৪২৫.৬০ কোটি টকাৰ শ্বেয়াৰেৰে সৰ্বামুঠ ২৫,০৬১.৯০ কোটি টকা আঁচনিখনৰ বাবে অনুমোদন জনাইছে বুলি ৰেড্ডীয়ে লোকসভাত উত্থাপিত এক প্ৰশ্নৰ উত্তৰত লিখিত ভাৱে জনায়।
ৰেড্ডীয়ে তাৰোপৰি কয় যে, আঁচনিখনৰ দ্বাৰা উত্তৰ-পূব, কাশ্মীৰ আৰু মাওঁ অধ্যুষিত অঞ্চলসমূহত আৰক্ষীৰ বাবে আধুনিক গৃহ নিৰ্মাণকে ধৰি আন্তঃগাঠনিৰ উন্নয়ণ, অত্যাধুনিক মাৰাণাস্ত্ৰ ক্ৰয় আদি দিশ সামৰি ল’ব।
জম্মু-কাশ্মীৰ, উত্তৰাখণ্ড, হিমাচলপ্ৰদেশ তথা ছিকিমকে ধৰি উত্তৰ-পূবৰ আঠখন ৰাজ্যই কেন্দ্ৰ চৰকাৰ আৰু ৰাজ্য চৰকাৰৰ ফালৰ পৰা ৯০:১০ অনুপাতত ধন লাভ কৰিব। অন্যান্য ৰাজ্যসমূহে ৬০:৪০ অনুপাতত অনুমোদিত পূজি লাভ কৰিব।
