বৰ্ধিত অনলাইন অপৰাধত উদ্বিগ্ন কেন্দ্ৰ! ১৭ হাজাৰৰো অধিক হোৱাটছএপ একাউণ্ট নিষিদ্ধ চৰকাৰৰ
দেশত ভয়ানক হাৰত বৃদ্ধি পোৱা অনলাইন অপৰাধ তথা ডিজিটেল এৰেষ্ট দুষ্কাৰ্য ৰোধৰ উদ্দেশ্যে কেন্দ্রীয় চৰকাৰে শেহতীয়াকৈ ১৭ হেজাৰৰো অধিক হোৱাটছএপ একাউন্ট বন্ধ কৰিছে। দক্ষিণ-পূব এছিয়াৰ দেশসমূহৰ পৰা অনলাইন অপৰাধীসকলে ব্যৱহাৰ কৰা সেই হোৱাটছএপ একাউণ্টসমূহৰ জৰিয়তে ডিজিটেল এৰেষ্টৰ পৰা আৰম্ভ কৰি নতুন নতুন চাইবাৰ প্ৰতাৰণা সংঘটিত কৰি আহিছে।
কেন্দ্ৰীয় চৰকাৰৰ গৃহ মন্ত্ৰালয়ে বন্ধ কৰা এই একাউন্টসমূহৰ পঞ্চাশ শতাংশৰো অধিক একাউন্ট যোৱা জানুৱাৰীৰ পৰাহে সক্রিয় কৰা হৈছিল। ভাৰতীয় লোকক বিভিন্ন প্রযুক্তিৰ সহায়ত ডিজিটেল এৰেষ্ট প্ৰতাৰণাৰে লুণ্ঠন চলোৱা ঘটনাৰ বিষয়ে সংবাদ মাধ্যমৰ পৰা আৰম্ভ কৰি বিভিন্ন মাধ্যমত প্রকাশ হ’বলৈ লোৱাৰ পৰা কেন্দ্ৰীয় চৰকাৰে বিষয়টোৰ ওপৰত সতর্ক দৃষ্টি নিবদ্ধ কৰে।
উল্লেখ্য যে দক্ষিণ-পূব এছিয়াৰ দেশ কম্বোডিয়া, ম্যানমাৰ, লাউচ আৰু থাইলেণ্ড আদিৰ পৰা ভাৰতত অনলাইন অপৰাধ চক্ৰটোৱে লুটপাত চলোৱাৰ তথ্য পোহৰলৈ আহিছে। গৃহ মন্ত্রালয়ে বিগত কিছুদিনত ভয়ানক মাত্রাত বৃদ্ধি পোৱা ডিজিটেল এৰেষ্টসহ পাকিস্তানৰ কুৰামত অনলাইন অপৰাধৰ অভিযোগসমূহ গভীৰভাৱে পৰ্যালোচনা কৰাৰ অন্তত এই সিদ্ধান্ত গ্রহণ কৰিছে।
গৃহ মন্ত্ৰালয়ৰ চাইবাৰ কোষে সদৰী কৰা তথ্য অনুসৰি দেশত দৈনিক প্রায় ছয় কোটি টকাৰ হৰলুকী হৈছে এই দুষ্কাৰ্যৰ জৰিয়তে। চলিত বৰ্ষৰ যোৱা দহ মাহত আশ্চর্যজনকভারে ২,১৪০ কোটি টকা লুট কৰা হয় এই দুষ্কাৰ্যৰে। গৃহ মন্ত্ৰ্যালয়ে চাইবাৰ কোষৰ ফালৰ পৰা আৰু সদৰী কৰা হৈছে যে যোৱা অক্টোবৰ মাহলৈকে ৯২,৩৩৪টা ডিজিটেল এবেষ্ট প্ৰতাৰণাৰ গোচৰ ৰুজু হৈছে।