ধনুষ আৰু নয়নতৰাৰ সংঘাতে শিৰোণাম অধিকাৰ কৰিছে। অভিনেতা-প্ৰযোজক ধনুষে নয়নতৰাৰ বিৰুদ্ধে ১০ কোটি টকাৰ ক্ষতিপূৰণৰ বাবে আইনী জাননী প্ৰেৰণ কৰিছে। ‘এন অ’ চি’ নিদিয়া সত্ত্বেও নয়নতৰাৰ তথ্যচিত্ৰ ‘নয়নতৰা: বিয়ণ্ড দ্য ফেয়াৰটেল’ত তেওঁৰ দ্বাৰা নিৰ্মিত ছবিৰ ফুটেজ ব্যৱহাৰ কৰা হৈছে বুলি অভিযোগ আনিছে। ইয়াৰ পিছত ছ’চিয়েল মিডিয়াত সৰৱ হৈ পৰে দক্ষিণৰ ‘লেডী ছুপাৰষ্টাৰ’। তেওঁৰ অভিযোগ যে ধনুষে ‘ভাল মানুহৰ’ মুখা পিন্ধে। এই সকলোবোৰৰ মাজতে একেখন ৰভাৰ তলত দেখা গৈছিল দুই তাৰকাক।
আইনী যুঁজ চলি আছে। ইফালে একেটা অনুষ্ঠানতে ধনুষ আৰু নয়নতৰাক দেখা গ’ল। দক্ষিণৰ প্ৰযোজক আকাশ ভাস্কৰণৰ বিয়াত উপস্থিত আছিল ধনুষ আৰু নয়নতৰা-ভিগনেশ। আকাশে ধনুষৰ সৈতে একেলগে প্ৰযোজনা কৰিছে নতুন ছবি ‘ইদলী কড়াই’। এই সপ্তাহতে তেওঁৰ বিয়াত উপস্থিত আছিল তামিল উদ্যোগৰ কেইবাগৰাকীও তাৰকা। নয়নতৰা আৰু ধনুষো তাৰ ভিতৰত আছিল। তাৰেই এটা ভিডিঅ’ ভাইৰেল হৈছে ছ’চিয়েল মিডিয়াত।
ভিডিঅ’টোত দেখা গৈছে যে বিয়াঘৰত একেখন ৰভাৰ তলত থাকিও ধনুষ আৰু নয়নতৰাই ইজনে সিজনৰ লগত কথা পতা নাই। দেখিও তেওঁলোকে ইজনে সিজনক এৰাই চলিছিল। দেখা যায় যে ধনুষ আৰু নয়নতৰা চোফাখনৰ একেবাৰে সন্মুখৰ শাৰীতে বহি আছে, কিন্তু দুয়ো দুই মূৰত। অনুষ্ঠানলৈ অহা বাকী অতিথিসকলৰ লগত কথা পাতিছে। এই ভিডিঅ’ দ্ৰুতগতিত ভাইৰেল হৈ পৰিছে।
এখন মুকলি পত্ৰত অভিনেত্ৰীগৰাকীয়ে অভিযোগ কৰিছিল যে ধনুষে শত্ৰুতা সৃষ্টিৰ বাবে ১০ কোটি টকাৰ ক্ষতিপূৰণৰ বাবে আইনী জাননী প্ৰেৰণ কৰিছে। তেওঁৰ মতে, ধনুষ আনৰ ভাল কামত সুখী নহয়, সেই বিশেষ চিনেমাখন সফল হ’লেও ধনুষে সেইটো ভালভাৱে মানি লোৱা নাছিল। সেই ‘হিংসা’ৰ পৰাই অভিনেতা-প্ৰযোজকগৰাকীয়ে এনে কাম কৰিছে বুলি নয়নতৰাই দাবী কৰে।
