গোপনে চলিছে অসম গণ পৰিষদৰ কেন্দ্ৰীয় অধিৱেশনৰ প্ৰস্তুতি। অহা ২৭ আগষ্টত আমবাৰীৰ মুখ্য কাৰ্য্যালয়ত অনুষ্ঠিত হ’ব এই অধিৱেশন।
অধিৱেশনলৈ মাজত মাথো ১৩ টা দিন বাকী, তথাপি আনুষ্ঠানিকতা ৰক্ষা কৰি সংবাদ মাধ্যম অথবা সামাজিক মাধ্যমৰ জৰিয়তেও এই কথা প্ৰচাৰ চলোৱা নাই।
ভয় খাই গোপনে অধিৱেশনৰ চলোৱা বুলিও বিভিন্নজনে এইক্ষেত্ৰত সমালোচনা কৰিছে।
কিন্তু এই সম্পৰ্কে বিশেষ সূত্ৰৰ পৰা জানিব পাৰি আমি যোগাযোগ কৰিছিলো অগপৰ সাধাৰণ সম্পাদক কমলা কলিতাৰ লগত। কলিতাই এই কথা স্বীকাৰ কৰাৰ লগতে প্ৰস্তুতি সম্পৰ্কে আংশিকভাৱে অৱগত কৰে।
নৰ্থ ইষ্ট নাওৰ সাংবাদিকৰ আগত কমলা কলিতাই কয় ‘মোটামুটি প্ৰস্তুতি আগবাঢ়িছে। ডেলিগেট বিলাকৰ নাম পঞ্জীয়ন কৰি থকা হৈছে।‘
ইপিনে, এই অধিৱেশনত নেতৃত্বৰ সলনি হ’ব নেকি বুলি সোধাত তেওঁ নহয় বুলি সদৰী কৰে।
তেওঁ কয় ‘নাই নাই এতিয়াই নেতৃত্ব সলনিৰ কথা অহা নাই। এতিয়ালৈকে নেতৃত্ব সলনিৰ প্ৰয়োজনো বোধ কৰা নাই।‘
সংবিধান অনুসৰি সাধাৰণ পৰিষদৰ সকলো সদস্যকে নিমন্ত্ৰণ জনোৱা হ’ব বুলি তেওঁ জনায়।
ইপিনে, গোপনে এই অধিৱেশনৰ প্ৰস্তুতি চলোৱা হৈছে বুলি উঠা অভিযোগ সন্দৰ্ভত সোধাত কলিতাই কয় ‘নাই নাই জনোৱা হৈছে। প্ৰস্তুতিটো আৰম্ভ কৰা হৈছে। কোভিদৰ বাবে যথেষ্ট অসুবিধাৰ মাজৰে আগবাঢ়িবলগীয়া হৈছে।‘
ইপিনে, বিভিন্ন সময়ত দলীয় নেতৃত্বৰ বিৰুদ্ধে সৰব হৈ থকা দুগৰাকী জ্যেষ্ঠ নেতা তথা বিধায়কক সোধাত তেওঁলোকে বৰ্তমানলৈকে অধিৱেশনৰ নিমন্ত্ৰণ লাভ কৰা নাই বুলি জনায়। তেওঁলোক হৈছে ক্ৰমে পাটাছাৰকুছি সমষ্টিৰ বিধায়ক পবীন্দ্ৰ ডেকা আৰু তেজপুৰৰ বিধায়ক তথা প্ৰাক্তন মন্ত্ৰী বৃন্দাবন গোস্বামী।
ইপিনে, বৰ্তমানৰ অগপ নেতৃত্বক লৈ তেওঁলোক সন্তুষ্ট নে বুলি আমাৰ সাংবাদিকে সুধিছিল।
এই প্ৰশ্নৰ উত্তৰত পবীন্দ্ৰ ডেকাই কয় ‘এই সন্দৰ্ভত মতামত মই নিদিওঁ। অধিৱেশনখনত প্ৰতিনিধিসকল আহি কি কয় সেইটোৰ ওপৰতহে নেতৃত্বৰ সাল-সলনি নিৰ্ভৰ কৰিব। তেওঁলোকৰ ওপৰত এতিয়া মতামত নিদিওঁ। তেওঁলোকৰ কাৰু-কাৰ্য্যবিলাক মই নীৰিক্ষণ কৰি আছো।
আনহাতে, দলৰ নেতৃত্ব সন্দৰ্ভত একেটা প্ৰশ্ন সোধা হৈছিল তেজপুৰৰ বিধায়ক বৃন্দাবন গোস্বামীক।
উত্তৰত গোস্বামীয়ে কয় ‘মই এই দল প্ৰতিষ্ঠা কৰা মানুহ গতিকে এতিয়া মই ৰাজহুৱাভাৱে এই কথা নকওঁ। দলৰ নিয়মানুবৰ্তিতা আমি সদায় মানি চলি আহিছো। কিবা কথা ক’বলৈ থাকিলে দলৰ বাহিৰত মই মৰিলে নকওঁ। এই দলটোৰ বাবে মই বহু ত্যাগ কষ্ট কৰিবলগীয়া হৈছে।‘
অৱশ্যে নেতা কেনেকুৱা হ’ব লাগে তাৰ সংক্ষেপে বাখ্যা দাঙি ধৰি গোস্বামীয়ে কয় ‘নেতা সেইজন যিজনে এটা পথৰ নিৰ্দেশ কৰি মানুহক লৈ যাব পাৰে।‘
এতিয়া দলীয় কৰ্মীয়ে নেতৃত্বৰ পৰিৱৰ্তন নোহোৱা কথাটো কেনেদৰে গ্ৰহণ কৰে সেয়া সময়ত লক্ষণীয় হ’ব।
