দিল্লী বিধানসভা নিৰ্বাচনত বিজেপিয়ে সংখ্যাগৰিষ্ঠতা লাভ কৰাৰ পিছতে পূৰ্বৰ আপ চৰকাৰে কেন্দ্ৰীয় চৰকাৰ আৰু ইয়াৰ উপ-ৰাজ্যপালৰ বিৰুদ্ধে দাখিল কৰা সকলো গোচৰ খতিয়াই চাবলৈ আৰম্ভ কৰিছে আইন মন্ত্ৰালয়ে। সূত্ৰৰ পৰা জানিব পৰা মতে, আপে দাখিল কৰা সকলো গোচৰৰ বিৰুদ্ধে যুঁজিবলৈ কেন্দ্ৰই ইতিমধ্যে ৩০০ কোটি টকা ব্যয় কৰিছে।
বাতৰি অনুসৰি, দিল্লীৰ নতুন চৰকাৰে সেই গোচৰসমূহ প্ৰত্যাহাৰ কৰিব পাৰে। ইতিমধ্যে কেন্দ্ৰীয় আইন মন্ত্ৰালয়ে এই গোচৰৰ সবিশেষ প্ৰতিবেদন বিচাৰিছে।
আইন মন্ত্ৰালয়ৰ এক সূত্ৰই দাবী কৰিছে যে আপ চৰকাৰে দাখিল কৰা গোচৰৰ যুঁজত কোটি কোটি টকা খৰচ হোৱাই নহয়, বহু কামৰ সময়ো অপচয় হৈছিল। ২০২২ চনত ভি কে ছাক্সেনাই দিল্লীৰ লেফটেনেণ্ট গৱৰ্ণৰ হিচাপে এই পদত যোগদান কৰাৰ পিছতে অধিকাংশ গোচৰ ৰুজু কৰা হৈছিল।
তদানীন্তন আপ চৰকাৰে লেফটেনেণ্ট গৱৰ্ণৰৰ ক্ষমতাক প্ৰত্যাহ্বান জনাই কেইবাটাও গোচৰ ৰুজু কৰিছিল আৰু যমুনা প্ৰদূষণ ৰোধৰ বাবে লেফটেনেণ্ট গৱৰ্ণৰৰ নেতৃত্বত গঠন হোৱা উচ্চ পৰ্যায়ৰ কমিটীখনক প্ৰত্যাহ্বান জনাইছিল।
কেন্দ্ৰীয় চৰকাৰৰ এগৰাকী জ্যেষ্ঠ বিষয়াই কয় যে দিল্লীৰ নতুন চৰকাৰে সেই গোচৰসমূহ প্ৰত্যাহাৰ কৰিবলৈ আদালতত আবেদন দাখিল কৰিব পাৰে। কাৰণ সেই গোচৰবোৰ চলোৱাৰ কোনো ন্যায্যতা আৰু নাই। যিহেতু বিজেপি চৰকাৰ কেন্দ্ৰ আৰু দিল্লীত থাকিব, সেয়েহে গোচৰ প্ৰত্যাহাৰ কৰিবলৈ বেছি সময় নালাগিব।
আইন মন্ত্ৰালয়ে অতিৰিক্ত মুখ্য সচিব পৰ্যায়ৰ সকলো বিষয়া, সকলো প্ৰধান সচিব আৰু সচিবক সকলো গোচৰৰ বিশদ নথি-পত্ৰ প্ৰেৰণ কৰিবলৈ বিভাগীয় নিৰ্দেশনা জাৰি কৰিছে। এটা গোচৰৰ অগ্ৰগতি আৰু সেই গোচৰত সংশ্লিষ্ট আদালতে দিয়া ৰায়ৰ বিষয়ে বিতং প্ৰতিবেদন দাখিল কৰিব লাগিব।
