ভাৰত আৰু চীনৰ মাজত সংঘাত চলি থকাৰ মাজতে কেন্দ্ৰীয় চৰকাৰে ব্ৰহ্মপুত্ৰ নৈৰ তলত ১৪ কিলোমিটাৰ দৈৰ্ঘ্যৰ সুৰংগ নিৰ্মাণৰ সিদ্ধান্তত অনুমোদন দিছে।
দেশৰ প্ৰথমটো এই নদীৰ তলেৰে নিৰ্মাণ হ’বলগীয়া পথ পৰিবহন সুৰংগ পূব চীনৰ তাইহু হ্ৰদৰ তলেৰে নিৰ্মাণ কৰি থকা পথ পৰিবহনৰ সুৰংগতকৈ অধিক দীঘল হ’ব।
অত্যাধুনিক প্ৰযুক্তিৰে নিৰ্মাণ হ’বলগীয়া এই সুৰংগ অসম-অৰুণাচল প্ৰদেশৰ মাজত গোটেই বছৰ যোগাযোগ অব্যাহত ৰখাৰ দৃষ্টিৰে অতি গুৰুত্বপূৰ্ণ হিচাপে বিবেচিত হৈছে।
অহা-যোৱাৰ বাবে দুটা সুকীয়া টিউব যুক্ত এই সুৰংগেৰে সেনাৰ বাহন, খাদ্য-সামগ্ৰী কঢ়িওৱা বাহন ৮০ কিলোমিটাৰ গতিৰে লক্ষ্যত উপনীত হ’ব পাৰিব।
হিন্দুস্তানত প্ৰকাশিত বাতিৰ অনুসৰি, চৰকাৰে অসমৰ গহপুৰ (৫৪নং ৰাষ্ট্ৰীয় ঘাইপথ)ৰ পৰা নুমলীগড়(৩৭নং ৰাষ্ট্ৰীয় ঘাইপথ)ক সংযোগিত কৰিবলৈ ব্ৰহ্মপুত্ৰৰ তলেৰে চাৰিলেনযুক্ত পথ পৰিবহন সুৰংগ নিৰ্মাণৰ পৰিকল্পনাত ক্ষিপ্ৰতাৰে কাম কৰি আছে।
বাতৰি অনুসৰি, পথ পৰিবহন তথা ৰাষ্ট্ৰীয় ঘাইপথ মন্ত্ৰ্যালয়ৰ অধীনৰ এনএছএআইডিচিএলে আমেৰিকাৰ কোম্পানী লুইছ বাৰ্জাৰৰ দ্বাৰা প্ৰস্তুত কৰা প্ৰি-ফিজিবিলিটি ৰিপ’ৰ্ট তথা ডিপিআৰত আনুষ্ঠানিক অনুমোদন জনাইছে।
বাতৰিত মন্ত্ৰ্যালয়ৰ শীৰ্ষ বিষয়াৰ সূত্ৰৰ উল্লেখেৰে কোৱা হৈছে যে এলানমেন্টকে ধৰি প্ৰায় সকলো প্ৰক্ৰিয়া সম্পূৰ্ণ কৰি তোলা হৈছে আৰু ডিচেম্বৰত সুৰংগ নিৰ্মাণৰ কাম আৰম্ভ কৰা হ’ব।
তিনিটা পৰ্যায়ত নিৰ্মাণ হ’বলগীয়া এই পথ পৰিবহন সুৰংগটো মুঠ ১৪.৮৫কিলোমিটাৰ দৈৰ্ঘৰ হ’ব। আনহাতে পূব চীনৰ তাইহু হ্ৰদৰ তলত নিৰ্মাণৰত পথ পৰিবহন সুৰংগটোৰ দৈৰ্ঘ্য হৈছে ১০.৭৯ কিলোমিটাৰ।
এই সুৰংগ পথটোৰ ভিতৰত পানী সোমাব নোৱাৰাকৈ কেইবাটাও সুৰক্ষা চক্ৰ থাকিব। তদুপৰি, সুৰংগটোত সজীৱ বতাহ প্ৰবহনৰ বাবে ভেন্টিলেশ্যন চিষ্টেম, ফায়াৰ ফাইটিং, ৰেলিংযুক্ত ফুটপাথ, নলাৰ ব্যৱস্থা, জৰুৰীকালীন প্ৰস্থানৰ ব্যৱস্থা আদিও থাকিব।
